Iruruputo 23 - BAṈARA KO VAIRU AMA LEVELEVEO

¹ Nio Paula ta o toiritoirimake se Kauniseli madu ni eri ma kiolake, “A lolo poso mela, aṉako kerukeru ta maba pui kopa titizile aṉa aṉako va nabuluputo kale vo Baṉara ti kobeta baroa komia ṉaniu kale,” kiolake.

² Ni vo Ṉisa Siama Ananaiasi ta o bazuemake se kebeta lojoani Paula ko sipole tu keta va pazoko voko suto.

³ Nio Paula ta eri kiolake vokasi, “Ṉo topia uri ṉa! Vo Baṉara ta tuvevo avole o pazoṉou ṉo! Ṉota ṉo bapua sai tu ṉo ditizilo aṉa Bazu ko lulueko kale, melai ṉo ṉavi ta ṉo bikoirika koa Bazu ṉoko bazuemo kale se tu seta ke pazolo aṉa!” kiolake.

⁴ Nio sea maba poso Paula ko sipole ke lojoani ta eri kikelake vokasi, “Kei! Ṉota ṉovai korakoraiva ni ṉo ruqe kaseva vo Baṉara vo Ṉisa Siama!” kikelake.

⁵ Nio Paula ta o opatake, ni eri kiolake, “A baerebaere poso mela, aṉata pui aba vai nianiila ta vo inio vo Ṉisa Siama kio. Ako ko Tabu ama Riki ta eri nio kikolani sole, ‘Ṉota pui ruqe kasevo elo vo ṉoko qoqono o mati vailani,’ ” kiolake.

⁶ Ni Paula ta o meake koa poqala maba poso kake ta Sadiusi madu se mata saevo voukale azo pui ke tuvevo puekani, ni kake ta Parese madu, seke tuvevo puekani ko, so sole vota omai velavelaoke se Kauniseli madu ni eri kiolake, “A baerebaere poso mela! Aṉata kala pado Parese lala inio, ni kala Parese vo meqora lala inio. Aṉata a lojoa koi vairutu titizikinio kale ako aṉata a ṉeamukani lala sole ko mata saevo voukale azo ama!” kiolake.

⁷ Ni so keru vo so be kiola keruṉa inio se Parese madu ni se Sadiusi madu ta keta ziamaziamaekiniake, ni koa poqala kale ama maba poso ta keta pitasiake seko kerukeru kale.

⁸ Ako se Sadiusi madu ta eria tuvevo puto ke evani sole, se maba madu ta pui kepa saevou voukale azo ni puliama mateana poso ni auvana poso kikelani, melai se Parese madu ta ke tuvevo pueka koa kiadama zouke quli.

⁹ Ni matuma ṉiṉoreo ta ko evake sai, ni kake se Mosese ko Bazu kekai nianiiekatani se Parese madu ko poqala kale ke evani ta ke lojoake ni matuvole eri kikelake, “Eṉeta pui ṉeda va kea kama sarueko nea maba! Esa kama pado auvana ma mateana ta ko vati pesiovi vo!” kikelake.

¹⁰ Ni ko zolizoliekinio ta matu ti matu naizato kota evake ni voa solodia madu ko kuleto ala ta ota ṉake tu vo Paula ta silosilo pala ke ivo. So sole vota o bazuemake voko solodia madu tu ke saqoro tu ke noqoevo vo Paula, tu ke vati zio sekasi azo idi qara ko poro kale solodia madu ko zaekale.

¹¹ Ni koa ipu kale inio vo Lekasa Jisu ta o lojoake Paula ko sipole ni eri va kiolake, “Pui ṉalo! Ṉota lula ṉolai bazubazuta aṉa koi Jerusalema peuru kale, ni ṉota mata soa bazubazuto ṉolai elou Romu peuru kale,” kiolake.

Paula madoevo va abamato

¹² Ni koko raneo kale ama vikale kake Jiu amu ta ke padoivake ni ke erekake kama pado nakanakatato. Ni seta ke erekake kama pado vinavina kama kejo tu seta pui ke vuatou ni pui ke nozutou ti kobeta barolou Paula ko vouvaevo kikolako.

¹³ Ariku toni va madu inio ke padoivake ni ke erekake komia nakanakatato.

¹⁴ Nio seta keta olake se raura kama siama madu kasi ni se lotu tanatanamu kasi ni eri kikelake, “Eṉeta lula ṉe ereka muli ko vinavina kama kejo tu eṉeta pui ṉe quovou kama quli ti ṉebe vouvaevou vo Paula.

¹⁵ So sole erisaṉa me ni Kauniseli madu ta soroekomo ko bazu Romu ama solodia madu ko kuleto ala maba kasi tu voko solodia madu ta ke vati kilo vo Paula mekasi, tu meta mevai kuimaekou mata kama kuimanao poso tu meda va kovou voko bazu o ṉavi kasi azo. Melai eṉeta ṉeda va abamatou keve tona ni ṉe vouvaevou vo puliako vo barolo koi,” kikelake.

¹⁶ Melai Paula vo apakora ta o viqake koa abamato ko bazu, so sole vota ota olake idi ko poro kale se solodia madu ko zaekale, ni opa vai bazuekake vo Paula.

¹⁷ Nio Paula ta o nokaevake kala pado se sirula poso kale ala, ni eri kiolake vokasi, “Vati ola nea vairu ala maba se solodia madu vo kuleto ala kasi, vota oka zaria tu ovai bazueko vo kama quli sole,” kiolake.

¹⁸ So sole voa sirula ta o odievake vo, ni o vati olake se solodia madu vo kuleto ala kasi, ni eri va kiolake, “Vo pirito pade kale o evani Paula ta o nokaelala aṉa ni o paselala aṉa tu a vati kilo nea vairu ala maba ṉokasi, ako vota kama quli sala tu oṉai bazueko ṉo kiola sole,” va kiolake.

¹⁹ Ni vo sirula madu vo kuleto ala ta ota va noqoekake voko ṉase ni o vati olake sasa ukibuti tinia, ni o kuimaevake, ni eri kiolake, “Loma quli kio ṉo ṉolai bazueko aṉa ka kiṉolako?” kiolake.

²⁰ Nio vota eri kiolake, “Se Jiu ama tanatanamu ta lula kekai tiorikiniala tu ke paseṉou ṉo lea tu solodia madu ta ke vati saqorou vo Paula Kauniseli madu kasi, tu keta va uria paqumuko ko quli vo kuiripato saṉa kevai ikako ko bazu.

²¹ Melai ṉota pui ṉoda ma viqou se, ako ariku toni va maba madu ta keta va mutailou ni ke tarevou vo sole. Seta lula ke ereka ko kejo tu seta pui ke vuatou ni pui ke nozutou ti kebe vouvaevou vo sole. Seta kevai iṉupa ni kebe tareka inio ṉo kiṉovo avo sole,” kiolake.

²² Nio vo solodia madu vo kuleto ala ta eri kiolake, “Ṉota pui ṉovai bazuekou kala ta ṉota lula ṉoba kai bazutala komi koi kio,” kiolake. Ni vota o viuruevake voa vairu ala maba.

Paula ta o soroivake Qavuna Filekisi kasi

²³ Nio vo solodia madu vo kuleto ala ta o nokaekake omuqa voko sirula kidi ni eri ka kiolake, “Qeta inainaemoko omuqa paizana solodia madu tu ke zio Sizaria peuru kale, sikeura toni solodia hose topi ke zazuani sate, ni omuqa paizana sopere ke borikani sate, tu ke vaekou koi oduadu ipu kale siakava koloko kale.

²⁴ Qeta inainaekoko kama hose vo Paula ko talio ko, ni qeta uria baroekivo eko vo Qavuna Filekisi kasi,” kiolake.

²⁵ Nio vo solodia madu ko kuleto ala ta o rikiekake kama pado leta ko eri kikolako:

²⁶ “Aṉa Kolodiasi Laisiasi lala taṉa paṉao kale ṉoa Qavuna Filekisi ṉa. Matu uri aṉata a rovea rikieko komia leta ṉokasi.

²⁷ Nea maba se Jiu amu ke noqoeveni ni keva zariovini vouvaevo aṉata lula a baqumuve vo ta kala pado Romu ala maba inio, so sole aṉata a olake aṉako solodia madu sate ni a bakieve vo.

²⁸ Aṉata aqa zariake paqumuko ko quli se kevai kuirikema, so sole aṉata a vati olake seko Kauniseli kale.

²⁹ Aṉata aqai potoake ta vota pulia quli opa ereke ko malezikako tu o vou ni pirito pade kale ivo, melai vo kuiripato saṉa kevai ikema ta ke ṉavi seko bazu ko kio kale avo ikio.

³⁰ Nio so keru aṉa a qoe keru koa bazu vo va abamato sama ta sidopu avole aṉata a joroeva vo ṉokasi. Ni aṉata a bazuema mata se kuiripato saṉa ke ivani vo tu ke kaseko ṉoko tanama kale ko quli se pui uria velo kevai evako vo,” kiolake.

³¹ Nio sea solodia madu ta ke luluekake seko soru sama bazu. Ni koa ipu kale seta ke odievake vo Paula ni ke vati olake Anitipatirasi peuru kale.

³² Ni koko raneo kale inio sea kiadama solodia madu se kiti kale ke taliovini ta keta vaitake Jerusalema, se hose topi ke zazini nio ke vati olake vo Paula.

³³ Ni seta ke vati olake vo Sizaria, ni seta ke kativake ko leta saizala Qavuna, ni ke vaevake vo Paula voko ṉase topi.

³⁴ Nio voa Qavuna ta o tiromikake koa leta ni vota ovai kuimanaoke vo Paula lama kena peuru kale azo ala inio vo kio. Nio so keru vo o paqumuva keru ta vota Silisia ala inio kio,

³⁵ nio vo Qavuna ta eri kiolake vokasi, “Aṉata a vailikou ṉo koṉai kuiriziako quli ko tuvevo so keru se keṉai kuirikani ke barolou keru,” kiolake. So sole vota o bazuemake voko solodia madu tu seta ke vati vailo vo Paula o ṉavi Qavuna ko pade kale, Herodi lulavo o erekema matu pade kale.