Iruruputo 21 - BAṈARA KO VAIRU AMA LEVELEVEO

Paula ko zio Jerusalema

¹ Ni eṉeta ṉe uluemake se ti ṉebeta tadaoke inio. Ṉe dadaoke ti sidopua pakeo inio ṉebeta evake ni ṉe baroake Kosi udu kale, koko raneo kale inio ṉe baroake Rodisi udu kale, ni sai kazo eṉeta ṉeda olake Patara peuru kale.

² Sai nio eṉeta ṉe veake kala pado tepe vaka Ponisia obe zio kiolani, so sole ṉeda zazuke sai ni ṉeda tadaoke.

³ Ne baroake sai Saipirasi udu ṉebe roveakoi kelo, ti udu ko palo rana vasia pakeo ṉe evake Siria. Ni eṉeta ṉe vikuake Taea, sai voa vaka o saqoratakoi ko lomaloma.

⁴ Sai nio eṉeta ṉe meake kake seke tuvevo putani ni eṉeta ṉe evake sai sekasi sikeura ṉaniu. Ni Tabu ala Auvana ko pizato kale seta ke bazuevake vo Paula tu vota pui o ziovou Jerusalema va kikelake.

⁵ Melai eṉeko saizama elo sekasi ama ta kota okotake, ni ṉe vaekake sai. Nio sea kiadamu ni seko reko poso ni meqora poso ta ke lulueṉelake eṉe koa peuru kale azo ni ṉeda saqorake muli saka, sai nio eṉea kiada ṉela ta ṉe iqeiqeake ni ṉe vararaitake.

⁶ Ni eṉeta ṉe uluekiniake muli, ni eṉeta ṉe zazuake vaka topi ni seta ke vaitake ke peuru kale.

⁷ Ni mata ṉebeta olake talio, ni ṉe daliake Taea azo ti Tolimaisi, sai eṉe ṉe doraemekoi seke tuvevo putani ni ṉe evake sai omadeu ṉaniu.

⁸ Ni koko raneo kale inio eṉeta ṉeda olake ni ṉe baroake Sizaria? Sai nio ṉe evake Pilipi ko pade kale vo okai bazubazutani vo Jisu ko Uri ama Bazu, kala pado seke pitoini kale ala ke tauvezateni Jerusalema.

⁹ Vota ariku sinaqu rusu meqora sala se kekai bazubazutani vo Baṉara ko bazubazu Tabu ala Auvana ko mai avozio kale.

¹⁰ Lula kubo ṉaniu ṉeda evake sai pado inio kala pado poropita Aqabasi va kikelani o baroake sai Jiudia azo.

¹¹ Ni vota o ṉelai kuevake eṉe, ni ota va koake Paula ko beleti, ni vota o bibulikake o ṉaviko kiti ni ṉase topi, ni eri kiolake, “Eri nio vo Tabu ala Auvana kiolani: komia beleti sala ta soa pirievo inio ke elou se Jiu amu Jerusalema peuru kale, ni seta ke vaevou se pui Jiu amu ko pizato kale,” kiolake.

¹² Nio so keru ko ṉe viqa keru eṉe ni mata kake maba poso, eṉeta ṉevai titiake vo Paula tu vota pui o zio Jerusalema.

¹³ Melai vota eri kiolake, “Noi sole inio meta meda zia ni upotuqu meda la ika aṉako bulo? Aṉata a inainaova tu pui aba piriziovou pala Jerusalema melai vou melai a bikou vo Lekasa Jisu ko ṉikale avo,” kiolake.

¹⁴ Ni eṉeta pui ṉe roveake lopaevo vo, so sole niaba ṉeda evake ni eri kiṉelake, “Vo Baṉara ko vatolo ta ko ereilou,” kiṉelake.

¹⁵ Nio kama taku poso ko tova vasi nio eṉeta ṉe zarizariake ni ṉeda olake Jerusalema.

¹⁶ Ni kake seke tuvevo putani Sizaria mu ta ke lulueṉelake eṉe ni ke ṉelati olake kala maba ko pade kasi sai eṉe ṉe eloa koi—voa maba ta Nasoni Saipirasi ala, se kuleto ke tuvevo puteni kale ala.

Paula ko soipivo vo Jemisi

¹⁷ Ni so keru ṉe baroa keru Jerusalema, seke tuvevo putani ta ke baroekiṉelake eṉe seko matuma zoleilo kale.

¹⁸ Ni koko raneo kale inio Paula ta o olake Jemisi toraevole eṉe sate ni kiadama lotu tanatanamu ta ke zomanake.

¹⁹ Ni Paula ta o saṉaemake se ni vota o supitikake kaseko kiadama quli vo Baṉara o imaniavo se pui Jiu amu o ṉavi voko iruruputo ko taku kale sekasi.

²⁰ So keta va viqa keru vo nio sea kiadamu ta ke ilusivake vo Baṉara. Ni seta eri kikelake, “Baerebaere Paula, ṉota no rovea melo matu kubo vuro Jiu amu ta lula ke tuvevo puta, ni sea kiadamu ti kekai pataita zoriko vo Mosese ko Bazu.

²¹ Seke viqema ṉoko bazu ta ṉota lula ṉo bazuema ni ṉo nianiiekima kiadama Jiu amu se pui Jiu amu ko valuvalu ke evani tu ukaka ke iko vo Mosese ko Bazu, ṉo bazuema tu seta pui ke movemou seko lasive meqora poso ni pui ke luluekou anime Jiua mela ko kalo.

²² Tuvevo seta ke viqou ta ṉota lula ṉoda barola koi. So sole loma ikio ko ereilou?

²³ Komi quli kio eṉe ṉeqa zariako tu kota ko ereilou. Iniseana ariku maba koi eṉe kasi seke tabutabuani seko pui kobueko kale seko tou.

²⁴ Ola sekasi ni pa mati zomane seko tabutabuo ko bulebuleilo kale, ni ṉota ṉoma tabarikou seke siqaeko ama biaṉa poso, tu seta ke okotikou seko tabutabuo ni qopu rui ke elou. Sokale kude inio kiadamu ta kekai nianiiovou kiadama ṉo ṉa kikelani avo ta pui tuvevo kopa elou, ako ṉo ṉavi ta ṉobe kati vaila vo Mosese ko Bazu sole.

²⁵ Melai se pui Jiu amu seke tuvevo putani ta lula ṉemai soroeka ko bazu tu seta eri pala ke kalou: seta pui ke kuovou ko sailao beku poso kasi lula ko katiziako ni pui ke kuovou ko dara ni kama biaṉa ko ke mukiekako, ni seta pui ke erekou ko pauvezato,” kikelake.

²⁶ So sole Paula ta o odiemake sea ariku maba ni koko raneo kale vota okai zomanake koa bulebuleilo se sate. Ni vota o amaqeake Jelepade kale ni o bazuemake sai ke iruruputani latau ṉaniu tiniavo inio ko elo avo koa bulebuleilo ko taku ti kobeta barou koko paka, so keru seke erekou keru ke ṉaviṉavi ko siqasiqa.

Paula ko noqoevo Jelepade kale

²⁷ Melai so keru koa sikeura ṉaniu vo Paula omai bazuekema ta kota okoto kikolake inio kake se Eisiama Jiu amu ta ke veake vo Paula Jelepade kale. Nio seta ke ikirimake sea matu padopadoilo seko korakorailo sama pesio kale ni ke noqoevake vo Paula.

²⁸ Ni eri kikelake matuma kora kale, “Me Izireli amu mela! Tauveṉelomo! Nea maba inio vo o erekani ko nianiiekato kiadamu kasi kiadama zae poso kale tu o kapakapaemou se Izireli ama maba poso, ni vo Mosese ko Bazu, ni komia Jelepade. Ni erisaṉa ta vota mata o mati kue se pui Jiu amu Jelepade ko poro kale ni seko kapakapato ta lula sarosaroro ko ikala komia tabu ama pade!”

²⁹ Seta so kikelake ako seta lula ke veake vo Toropimasi Epesasi ala Paula sate peuru ko keve tona ni ke kerukerutake ta lula o vati ola Jelepade kale kikelake sole.

³⁰ Nio matu ṉiṉoreo keta evake sea kiadamu koa matu peuru kale amu, ni sea kiadamu ta omadeu rereo ke evake ni ke saputivake vo Paula ni ke rajaevake Jelepade ko kupekupe. Ni taukavole seta ke tibulikake koa Jelepade.

³¹ Ni seta kebe madoekake tu ke vouvaevo vo Paula be kikelake pado inio Jerusalema ko ereivako ṉiṉoreo ko ikirato ko bazu ta ko soroivake Romu ama solodia madu ko kuleto ala kasi.

³² Nio taukavole vota o odiemake kake solodia madu ni sirula madu, ni taukavole ke saqorake sea matuma vaki kasi. Ni so keru sea maba poso ke mea keru se solodia madu, seta keta epezake pazovo vo Paula.

³³ Ni sea solodia madu vo tanala ta o alokatake Paula kasi, ni o noqoevake vo, ni vota o bazuemake voko solodia madu tu seta ke pirievo vo omuqa seini kale. Ni vota o kuimaemake sea vaki, “Lala inio vo nea maba, ni loma ikio vota o sarueka?” ma kiolake.

³⁴ Ni kake koa padopadoilo kale amu ta ke kasekake kama quli, ni kake ta edoloma quli ke kasekake seko ṉiṉoreo kale. Matu ṉiṉoreo keta evake so sole voa tanala ta niuniala ota evake ni pui o roveake taka kovo koko tuveano koko ereivako quli kio, so sole vota o bazuemake voko solodia madu tu ke vati zio vo Paula seko idi qara ko poro kale ama zaekale.

³⁵ Ni so keru seke baroa keru koa idi qara ko veutu tonama bokeboke topi vo sate, nio se solodia madu ta ke borivake vo ako se maba poso ta keta matu ṉaṉiṉaṉitake sole.

³⁶ Sea kiadamu ta ke vati luluekiniake vo upaupatole ni eri kikelake, “Vouvaevomo vo!” kikelake.

Paula ko qaraqarailo sama pesio

³⁷ Ni so keru se solodia madu kebe vati zio kikelake keru vo Paula koa idi qara ko poro kale, vota eri kiolake voa tanala kasi, “Abe roveovou pesio ṉokasi kio?” Ni voa tanala ta o vati tiorikake ni eri kiolake, “Ṉota Quriki pesio laṉa inio kio?

³⁸ Pui ṉo inio ko Ijipia laṉa sakaku ṉobe kati pazokinieni ṉa ko Romu ama qavuna sea ariku vuro vouvato ko maba madu sate ni ṉo odiemeni ṉa lealea kama zaekale kio?” kiolake.

³⁹ Nio Paula ta o vati tiorikake vo ni eri kiolake, “Aṉata Jiua lala inio, Silisia ranama Tasisi a alileni lala koa matu qulepo ama peuru kale azoa lala. Sole aṉai titia tu a besio nia maba poso kasi,” kiolake.

⁴⁰ Nio se solodia madu vo tanala ta o zarievake vo tu o pesio, so sole Paula ta o lojoake bokeboke topi ni o moisemoise-make sea maba poso voko ṉase ma kapokapoeko kale tu ke moizailo. Ni so keru seke moizaiva keru, Paula ta o pesiake sekasi ke ṉaviko Hiburu pesio kale ni eri kiolake: