Iruruputo 20 - BAṈARA KO VAIRU AMA LEVELEVEO

Masedonia ni Akaia rana kale

¹ Ni koa ṉiṉoreo ko epezake, nio Paula ta o padoemake se disaipeli madu ni o zuvarimake se ni o uluemake se. Ni vota ota zolaike ni ota olake Masedonia peuru poso kale.

² Vota o olake koa kena kale ama peuru poso kale ni o zuvarimake se kubo bazubazu kale. Saita inio vota o olake Akaia peuru poso kale,

³ sai vo zouke kaboso o evekoi. Ni vota ota inainaoke tu ota pakeo sai kazo Siria kiolake, melai vota okai nianiiovi se Jiu amu ko abamuvo vo; so sole vota o pitoekake tu o vaito Masedonia kude.

⁴ Ni Sopata Pirasi vo meqora Berea ala ta o luluevake vo, ni so jari Arisitakasi ni Sekadasi Tesalonaika nioqa; Qaiasi ni Timoti Debia nioqa; ni Tikikasi ni Toropimasi ta Eisia rana nioqa.

⁵ Ni sea kiadamu ta ke pakeake Toroasi tu ke tareṉelo eṉe sai, melai eṉeta ṉeda loivake Pilipai.

⁶ Ni eṉeta ṉe dadaoke Pilipai azo Isiti pide ama Bereti Ṉojola ko tova, ni sike ṉaniu ko paloasake inio eṉeta ṉe doraemake se Toroasi, ni eṉeta sikeura ṉaniu ṉeda evake sai.

Paula ko tovama soipiko ko Toroasi peuru

⁷ Ni Sarere ipu inio eṉeta ṉe badoivake tu ṉe ereko ko tabu ama sokesokeo. Ni Paula ta o bazubazuemake se maba poso ni vota pui o lalamatake bazubazuto ti kobeta baroake ipu tiania, ako koko raneo kale ta vota ota ziovou sole.

⁸ Kubo juke poso ta ko bainake okate ama lose kale sai eṉe ṉe badoivakoi.

⁹ Ni kala vairu ala rusu lutikasi va kikelani ta obeta papuake vuida topi, ni Paula ko bazubazuto ta rosi kota evake, so sole lutikasi ta ota dureduretake ti obeta umatiake ti obeta piake inio zouke volei kama pade topi azo ti miduku kale. Ni so keru se kepa niaqueva keru vo, vota lula ota vouva.

¹⁰ Melai Paula ta o saqorake ni ovai tekuake vo ni o zuzuevake vo ni eri kiolake, “Pui tiṉoliṉoli elo, vota ota saeva mata sole!” kiolake.

¹¹ Ni vota mata ota koitake okate ama volei kale, ni o palamukake ko bereti ni o kuake. Koko tova inio Paula ta rosia pesipesito oma evake ti ṉaniu kobeta peatake. Ni Paula ta ota olake.

¹² Ni seta ke vati vaitake voa vairu ala maba saevola pade kasi ni seta keta matu patukake.

Toroasi azo Miletasi peuru kale

¹³ Ni eṉeta ṉebeta olake kuleto vaka kale Asosi peuru kale, melai o ṉavi Paula ta ota roraoke sai, ni eṉeko korokoroti kale eṉeta ṉe zazuevou vo sai sole.

¹⁴ Ni so keru vo o toraeṉela keru Asosi peuru kale, eṉeta ṉe zazuevake vo ni ṉeda olake Mitileni peuru kale.

¹⁵ Sai kazo ṉe dadaoke ni ṉe varerikake Kiosi udu ko sipole koko raneo kale. Ni koko tovala ṉaniu kale inio eṉeta ṉe vikuake Samosi, ni koko raneo kale eṉeta ṉe baroake Miletasi.

¹⁶ Ni Paula ta oka zariake kai alokato ko Epesasi peuru ako vota pui oka zariake ṉamuko ko taku Eisia sole. Vota ota jijirake tu kai baro ko Penetikositi ṉaniu Jerusalema, ko roveovou tea, kiolake sole.

Paula ko uluto sama pesio Epesasi ama lotu tanatanamu kasi ama

¹⁷ Ni Miletasi azo inio Paula ta o soroekake ko bazu Epesasi, tu saizama lotu tanatanamu ta ke toraevou vo.

¹⁸ Ni so keru seke baroa keru, vota eri kiolake sekasi, “Meta meqai nianiia aṉa a qaevo koa pado ama taku kale aṉa a eve keru me sate, so keru aṉa a baroi keru azo komia Eisia rana.

¹⁹ Kiadama aṉako zarazarailo ni kubo aṉako deumu sate aṉata a erekake aṉako iruruputo aṉako va nabuluputo kale vo Baṉara koa tapata kama taku poso kale koko baroima aṉa kasi se Jiu amu ko la abamato kale sole.

²⁰ Meta meqai nianiia ta aṉata pui aba tamela kaitike kama tauvezato sama quli so keru aṉa a bazubazute keru ni a nianiiekate keru meko padoilo kale ni me ṉaviṉavi ko pade poso kasi.

²¹ Aṉata amai matu titiake se Jiu amu ni so jari pui Jiu amu tu ke lilizio seko sarueko kale azo ni ke tuvevo puevo vo Lekasa Jisu.

²² Ni erisaṉa aṉata a zio Jerusalema aṉako zorivo kale vo Tabu ala Auvana ni aṉata pui aqai nianiia aṉa a doraeko ama quli sai.

²³ Aṉa aqai nianiiako ta kiadama peuru kale ta olai bazueka vo Tabu ala Auvana ko piri ni tapata ta kobe tarela aṉa.

²⁴ Melai aṉata pui aqai tuqutuqua a ṉaviko saevo tu a ṉamuko. Aṉako zario ta a okotiko aṉako soru ni a baiko koa iruruputo vo Lekasa Jisu o katilema aṉa tu a ereko, tu aqai bazubazuto ko Uri ama Bazu vo Baṉara ko pakiezato sama roquano sama.

²⁵ “Aṉata lula a lipilipite mea kiada mela kasi kai bazubazutole vo Baṉara ko lekasa puo. Ni aṉata aqai nianiia ta puliala me azo ta mata opa tova lelou aṉa.

²⁶ So sole matu tuvevo avole aṉata a melai bazueka komi quli me vairutu, vo Baṉara ta o koqotaemelou me heli kale, ta aṉata pui aba kai kuiriziovou meko koqotailo.

²⁷ Ako aṉata pui aba lupaovi kaseko vo Baṉara ko pado ama vatolo mekasi sole.

²⁸ So sole meta kati vailomo meko saevo ni kati vailomo kiadama koa lotu qoqono vo Tabu ala Auvana lula o vaekako meko vailo kale. Omadeuvo vo sipi o kati vailani maba ta o kati vaila voko rovaṉa jari meta kati vailomo vo Baṉara ko lotu qoqono ko lula o ṉaviko o ikema vovo Meqora siqasiqa ma elo kale voko voukale.

²⁹ “Ni aṉata aqai nianiia ta aṉako tova, ta kade ama piru siele jari ama maba poso ta ke kilou mekasi tu ke madoeko ruvurimo meko rovaṉa.

³⁰ Ni kake mekale ama maba poso ta ke puratou ni ke lipalipaemou seke tuvevo putani tu ke luluemo se.

³¹ So sole vailomo, ni kerukeruekomo aṉako nianiiekimelo mea kiada mela kubo deumu sate ipu ni ṉaniu zouke sabere ko poro kale.

³² “Ni erisaṉa aṉata a vaemela me vo Baṉara ko vailo kale tu voko tauvezato sama roquano ko bazubazu ta ko melati vailou me, ni ko pizatimelou me ni ko katimelou me koa reketekete vo Baṉara oma inainaekake kiadama voko tabu ama lotu maba poso.

³³ Aṉata pui aba tavai zari kala ko siliva ni qolo ni suma.

³⁴ Ni meta lula meqai nianiia ko aṉata a irurupute komia aṉako ṉase kale tu a dabariko kiadama quli a baerebaere poso ni a ṉavi ṉeqa zarima quli.

³⁵ Aṉata a mela kasa pueke tu komia keve kale animeta me matu iruruputo tu me dauvemo se lekuleku amu, kerukerueko kale ko bazubazu o ṉavi vo Lekasa Jisu o rukuekema, ‘Matuma zoleilo katizato kale ama ta kota ka qulepa koazato kale ama,’ ka kiovema,” kiolake vo Paula.

³⁶ Ni so keru Paula o paika keru bazubazuto, inio vota o iqeiqeake se sate ni o vararaitake.

³⁷ Ni sea kiadamu ta keta ziake ni ke zuzuevake ni ke lumevake ni ke uluevake vo.

³⁸ Voko bazuemo se ta pui mata kepa tova velou vo, ko ikio matu duki ko imema. Nio sea kiadamu ta ke saqorake vo sase vaka kasi.