Iruruputo 14 - BAṈARA KO VAIRU AMA LEVELEVEO

Aikoniami peuru kale

¹ Ni Aikoniami peuru kale melai koa omadeuvo ama iruruputo kobeta ereivake: Paula ni Banabasi ta qo amaqeake se Jiu amu ko ilusato ko pade kale, ni koa omadeuvoa bazubazuto qo evake, ni matu kubo madu se Jiu amu ni pui Jiu amu ta ke tuvevo putake.

² Melai se Jiu amu se pui ke tuvevo putani ta keta ma niumaekake se kutumana kama pui Jiu amu ko kerukeru tu kemai kaikuapo seke tuvevo puteni.

³ Ni omuqa apositolo ta matu tu keu elo qota evake sai, ni nioqata parani putole qovai bazubazutake vo Lekasa Jisu, vo oka tuvevo puekeni nioqako bazubazuto kale voko pakiezato sama roquano voko katiko kale nioqa ko pizato tu qo ereko aqasiele ama iruruputo.

⁴ Ni sea maba poso koa peuru kale amu ta keta pitasiake seko kerukeru kale: kake ta uria kerukeru kema evake se Jiu amu, kake ta uria kerukeru keka evake nioqa apositolo kidi.

⁵ Ni kake pui Jiu amu ni kake Jiu amu ni seko tanatanamu ta kekai kaikuapake nioqa omuqa apositolo kidi ni seta ke taikou kikelake nioqa lado kale.

⁶ Nio so keru nioqa qo lainike keru koa kerukeru, nioqata qota soqoike Lisitara ni Debi peuru kale ni Laikonia ranama peuru poso kale.

⁷ Sai nio nioqata qokai bazubazutake vo Jisu ko Uri ama Bazu.

Lisitara ni Debi peuru kale

⁸ Ni Lisitara peuru kale ta kala raiqo ala maba soa alilo o eveni obeta evake vo pui o roveani talio.

⁹ Vota o papuake sai ni o didiekake Paula kiolani. Ni Paula ta o veake vo ni ota va paqumukake voa maba ta o tuvevo puekake ta vota ota roveovou uriko kiolake, so sole Paula ta o toiritoirivake vo,

¹⁰ ni eri va kiolake vo matuma kora kale, “Suvana lojo eve!” va kiolake. Ni voa maba ta ota sokaoke ni ota tanitake talio.

¹¹ Ni so keru sea padopadoilo ke kea keru Paula o erekako quli, seta ke taniekake upaupato ke ṉaviko Laikonia pesio kale ni eri kikelake, “Se baṉara poso ta maba keta evala ni keta saqora anime kasi!” kikelake.

¹² Ni seta kevai nokaekake Ziusi ṉi vo Banabasi, ni Paula ta Hemusi ṉi kevai nokaekake, ako vo inio vo o matu pesipesitani sole.

¹³ Ni Ziusi baṉara vo siama, vo matu peuru ko kupekupe kota va lojoani voko jelepade, ta o kati kuevake ko bulumakau poso ni sisusisu poso peuru ko veutu tona, ako vota oma zariake sea matuma vaki tu seta keka siqato nioqa omuqa apositolo kidi kiolake sole.

¹⁴ Ni so keru Banabasi ni Paula qo viqa keru sea vaki ke ereko kikelako quli, nioqata qo rotiekake nioqako sabosabo ni qo rereake sea matuma vaki ko tiania, ni qo upaupatake ni eri kiqolake,

¹⁵ “Noi sole inio meta me ereka eri ama quli? Ako eqeta maba qela inio me jaria qela! Eqeta qe kuevani qela inio koi tu kasekole vo Jisu ko Uri ama Bazu, tu meta me lilizio koa utube ama quli kasi azo vo tuvevo ala ni saevola Baṉara kasi vo o erekeni ko au, miduku, ivere ni kiadama quli sai ko evako quli.

¹⁶ Lulali vota o zarieme sea qoqono poso tu seta ke lulueko ke ṉaviṉavi ko keve poso.

¹⁷ Melai kiada keru vota kasa o eve o ṉavi, voko katimo kale se uri ama quli. Ako vota o katimela anime ko nioro ni epa poso koko taku poso kale, ni o mela puarika ko sailao ni o matu zolemela anime,” kiqolake.

¹⁸ Soama pesio nioqako kale melai tapata tu dokolimo sea matuma vaki tu seta pui keka siqato nioqa.

¹⁹ Ni kake Jiu amu ke kuevini Pisidia rana ma Anitioko azo ni Aikoniami azo ta kemai titiake sea matuma vaki tu seta seko rana ke elo, ni seta ke taivake vo Paula lado kale ni ke rajaevake ni ke ṉamuvake peuru ko kupekupe ni ke vaevake sai lula ota vouva kikelake sole.

²⁰ Melai so keru seke tuvevo putani kevai ubure keru vo, inio vota ota zolaike ni ota vaitake koa peuru kale. Ni koko raneo kale Banabasi ni vo ta qota olake Debi.

Vaito Siriama Anitioko

²¹ Ni Paula ni Banabasi ta qokai bazubazutake vo Jisu ko Uri ama Bazu Debi peuru kale ni nioqata qo lilimake kubo maba madu. Ni nioqata qota vaitake Lisitara, sai kazo ta Aikoniami, ti qopeta olake Anitioko Pisidia rana.

²² Ni nioqako ziokale nioqata qo pizatimake seke liliziovini maba poso ni qo zuvarimake tu seta tuvevoa noqoilo ke elo seko oqu kale so sole eri kiqolake. “Animeta me doraekou kubo tapata poso koa keve kale, koko odiemelo ama anime vo Baṉara ko lekasa puo kale,” kiqolake.

²³ Ni nioqata qo pitoemake lotu qoqono poso kale se lotu tanatanamu se koko kuleto keta ka elo amu, ni nioqako vararaito ni tabutabuo kale nioqata qo vaemake vo Baṉara vo kevai oquini ko vailo kale.

²⁴ Ni nioqako pazieko kai talio koa pado ama Pisidia rana ko tova, inio nioqata qo saqorake Pamipilia rana.

²⁵ Sai nio nioqata qo bazubazutake Peqa peuru kale, ni qota saqorake Atalaea zavaṉa kale,

²⁶ ni sai kazo inio qota vaitake tepe vaka kale Anitioko, koa peuru kale sai kuleto ke kati vararaitekoi tu vo Baṉara ko vailo sama roquano kale qo ereko koa iruruputo nioqa lula qo okotikako.

²⁷ Ni so keru nioqa qo baroa keru sai Anitioko peuru kale nioqata qo padoemake kiadama lotu maba poso ni nioqata qomai bazuekake kiadama quli vo Baṉara o erekako quli nioqa kasi ni voko ma veuko se pui Jiu amu ko keve tu seta ke tuvevo puto.

²⁸ Ni nioqata qo evake sai rosi ama taku seke tuvevo putani sate.