Iruruputo 13 - BAṈARA KO VAIRU AMA LEVELEVEO

Banabasi ni Saula ko pitoilo ni soroilo

¹ Ni Anitioko peuru kale ama lotu qoqono kale ta iniseana so keru kake poropita madu ni titisa madu: seta Banabasi, Simeoni (Sibi ala va kikelani), Lusiasi (Sairini ala), Manaeni (vo Herodi qavuna sase ke rapukiveni) ni Saula.

² Ni so keru se kebe ilusiva keru vo Lekasa Jisu seko lotumato kale, ni kebeta tabutabua keru seko pui vuato kale, inio vo Tabu ala Auvana ta eri kiolake sekasi, “La edolikomo Banabasi ni Saula, tu nioqata qo ereko koa iruruputo ko lula aṉa aqai pitoekako nioqa,” kiolake vo Tabu ala Auvana.

³ Nio seta ke tabutabuake ni ke vararaitake ni seta kekai ivikake seko ṉase nioqako lezu topi, ni ke soroekake nioqa.

Saipirasi udu kale

⁴ Vo Tabu ala Auvana ta o soroekake Banabasi ni Saula so sole nioqata qo olake Seleusia ni qo pakeake Saipirasi udu kale kala tepe vaka kale.

⁵ Ni so keru nioqa qo varerike keru Salamisi peuru kale inio nioqata qokai bazubazutake vo Baṉara ko bazubazu saizama Jiu amu ko ilusato ko pade poso kale. Ni nioqata qo vati keve vo Jone Maka tu vota o tauvezato koa iruruputo kale.

⁶ Ni seta keta roraoke koa udu kale ni ke baroake Paposi peuru kale, sai nio seta ke toraevake kala kakokakoto ko maba Ba-Jisu va kikelani, vota kala Jiu ala vo okai rairiziani ko poropita.

⁷ Vota koa udu kale ala qavuna vo baerebaere inio Sejiosi Polasi va kikelani, vota kala nianiiola maba. Ni vota o nokaekake Banabasi ni Saula voko tanama kale ako vota oka zariake viqo vo Baṉara ko bazubazu sole.

⁸ Melai voa kakokakoto ko maba ta o tizaekake nioqa, vo Elimasi va kikelani (ko ikio Quriki kale ama vo Ba-Jisu ko ṉi), vo o madoeveni tizaevo vo qavuna tu pui ovai oqu vo Jisu.

⁹ Nio Saula, vo Paula ṉi o koeni, ta kovai sukatake vo Tabu ala Auvana ko pizato ni vota o toiritoirivake voa maba kakokakoto ko iruruputo o erekani,

¹⁰ ni eri kiolake, “Noa Setani vo meqora ṉa! Ṉota kiadama sidopu ama quli vo kana ṉa inio. Ṉota koṉai sukata ko ruqe ama ubeubezato ni lipalipato, ni kiada keru ṉota ṉo madoekani ṉa lipato tava iko vo Baṉara ko tuveano!

¹¹ Vo Baṉara ko ṉase ta ko saqorou ṉo tona erisaṉa; ni ṉota paru ṉo elou ni ṉota pui ṉoba kelou koa taku ko ṉaniu ko zakaremu,” kiolake. Nio maba koa taku kale inio kutumana kama rovuzu ta kota va boulukake jari voko vilu, ni vota ota utu jutujutuitake talio ni sarusaruilole o vailivake kala tu o odievo vo ṉase tava kamako kale.

¹² Nio so keru vo qavuna o kea keru koko ereima quli, vota ota tuvevo putake, ako vota matu aqasiele okai evake vo Lekasa Jisu vai nianiiekato sole.

Anitioko peuru kale Pisidia rana

¹³ Ni Paula ni voko baerebaere kidi ta ke tadaoke kala tepe vaka kale Paposi azo ni ke kuevake Peqa peuru kale Pamipilia rana, sai nio Jone Maka ta o vaekake nioqa ni ota vaitake Jerusalema.

¹⁴ Ni nioqata qopeta olake talio ni qo baroake Anitioko peuru kale Pisidia rana, ni Sabati ṉaniu kale inio nioqata qo amaqeake Jiu amu ko ilusato ko pade kale ni qo papuake sai.

¹⁵ Ni kala ta o tiromikake Mosese ko Bazu ni se poropita madu ko riki kale ama tiromo saita inio koa ilusato ko pade ko vilua pikopiko madu ta kekai soroekake nioqa ko bazu eri kikovema, “Baerebaere kidi, eṉeta ṉe baseqela qe tu qeta qe pesiovou se maba poso kasi, zuvarato ko bazubazu qe borikani qela tea, tu ko zuvarimo se,” kikelake.

Vo Paula kai bazubazuto Jisu ko Uri ama Bazu

¹⁶ Nio Paula ta o lojoake ni o zolaekake voko ṉase, ni o taniekake pesio, ni eri kiolake: “Me Izireli amu mela ni kiadama me pui Jiu amu mela me koi me evani mela ni me ilusivani mela vo Baṉara, meta didielomo aṉa!

¹⁷ Se Izireli amu vo Baṉara ta lula o pitoeme animeko taite poso ni vota o variekime se so keru se pakepakeo maba ke eve keru Ijipi. Ni vo Baṉara ta o saqorime se Ijipi peuru kale azo voko matuma pizato kale.

¹⁸ Seta meomeo kamu melai vota pui o aquriake mati vailo se ariku toni sabere lealea kama zaekale.

¹⁹ Ni vota o ruvurikake sikeura toutou Kenani peuru kale ko evema ni o ṉaviko maba madu ta koko raki ota ma ikake koa miduku.

²⁰ Koa kiadama quli ta ko erei ariku paizana sike toni sabere ko tiania. “Ni koko tova vasi nio vota o katimake ko titizato ko maba poso ti kobeta baroi poropita Samuela ko taku.

²¹ Ni seta ke pasevake kala aikovakova, ni Baṉara ta o katimake vo Saula Kisi vo meqora Benijimane ko toutou kale ala, tu vota aikovakova oma elou ariku toni sabere.

²² Ni vo Baṉara ta o saqorivake vo, ni vota aikovakova oma ivake vo Devita. Ni eri nio Baṉara kiovevo vokale avo: ‘Aṉata a vea vo Devita Jese vo meqora, soala maba jari ala inio aṉa ava zariani, voa maba vo o ereko ala kiadama quli aṉa a vati sorueko ama quli vo tu vota o erekou,’ kiolake.

²³ Devita vo vikuvikula kale ala inio vo Jisu, vo Baṉara Izireli amu vo Pakio o iveni vo lula leveleveo oma kaseveni jari.

²⁴ Puliako Jisu tanieko voko iruruputo, Jone Bapitaiso ta okai bazubazutake lilizio sarueko kale azo ama ko bazubazu sea kiadama Izireli amu kasi tu seta bapitaiso ke elo kiolake sole.

²⁵ Ni sipole Jone o paiko voko iruruputo kiola keru, inio vota eri kiolake se maba madu kasi, ‘Nonia kerukeruelo inio mebe evani ko aṉa? Aṉata pui vo meme darevani lala inio ko aṉa. Melai meta viqomo! Vota obeta kueva aṉako tova, ni aṉata pui a malezika tu ada va iviko voko buti voko kiti kale azo,’ kiolake.

²⁶ “Aṉako mabamu mela me Izireli amu mela, vo Ebarahami ko vikuvikula kalea mela, ni kiadama pui Jiu amu mela meme ilusivani mela vo Baṉara: anime kasi inio ko soroi komia pakiezato ko bazu!

²⁷ Sea maba poso Jerusalema ke evani ni seko vilua pikopiko madu ta pui kepa kai nianiiovi ta vo inio voa Pakio kio, ni seta pui kepa paqumuke se poropita madu ko riki kikolani kiadama Sabati poso ko tiromiako. Melai seta ke tuvevo puekake se poropita madu ko pesio seko kuiripato saṉa ivo kale vo Jisu.

²⁸ Seta pui kepa tava roveovi kelo vo Jisu ko saruilo melai seta ke pasevake vo Paelati tu oma vouvaevo.

²⁹ Ni seko vai ereko koa kiadama quli Tabu ama Riki ko pidokivema vo ko tova, seta ke saqorivake vo korosi topi azo ni ke vaevake kama pado keaka niami kale.

³⁰ Melai vo Baṉara ta o saevivake vo voukale azo,

³¹ ni kubo ṉaniu poso kale vota o puratake seke vati taliovini kasi Qalili azo Jerusalema, se kebe vai bazubazutani vo Izireli amu kasi ti kobeta baroa vairutu.

^32-33 Ni eqeta koi tu qe kati kilo ko Uri ama Bazu mekasi, ko eri, ko quli vo Baṉara leveleveo oma kasekema quli animeko taite poso tu o erekou, erisaṉa vota lula o ereka anime kasi, seko vikuvikula mela kasi, vo Jisu ko saevivo voukale azo ama. Omadeuvo ko lula ko rikiziovima Devita ko kera omuqa kale jari, ‘Ṉota aṉavo Meqora ṉa; vairutu aṉata a bazueṉa ṉo, ta aṉata ṉovo Mama lala,’ kiolake.

³⁴ Ni eri nio Baṉara ka kiovevo Jisu ko mata saevo voukale azo, ta pui opa sapeovou niami kale: ‘Aṉata a qatimelou ko tabu ni tuvevo ama mauruto ko aṉa Devita leveleveo ava kasekema,’ kiolake.

³⁵ Ni mata kama pado kobu kale Devita ta eri kiove vo Baṉara kasi vo Jisu kale avo, ‘Ṉota pui ṉoba zarievou ṉovo tabu ala nabulu tu vota o sapeovou niami kale,’ kiove.

³⁶ Ako Devita ta oka nabuluputake vo Baṉara ko vatolo o ṉaviko taku kale, ni koko tova vota ota vouvake, ni voko tupu ta ko mutaivake voko taite poso kasi, ni kota ko sapeake niami kale.

³⁷ Melai kota pui kopa erei voa maba tona, vo Baṉara o saeviveni voukale azo.

^38-39 “Sokale avo inio eqeta qe mela zaria me tu kai nianiiomo ko, me aṉako lolo poso mela Izireli amu mela, vo Jisu kovai ereima quli ta ko kaseka sarueko ko akoezato sama bazubazu mekasi, ni kiadamu seke tuvevo puevani vo ta ke rupasia kiadama sarueko ko kuiripato kale azo. Melai vo Mosese ko Bazu ta pui ko roveako rupasimelo me koa sarueko ko kuiripato kale azo.

⁴⁰ So sole meta balauvomo, so inio se poropita madu ke kasekema quli ta pui ko elou me tona, ko eri kikevema:

⁴¹ ‘Keatini, me meqai balebaleitani mela voko bazu! Meta me vuzeilou ni me vouvou! Ako ko quli aṉa a erekako vairutu ta meta pui tuvevo meba ikou sole, kala zakaremu obe ikou mekasi melai!’” kiolake.

Saizamu kai zoleilo koa Uri ama Bazu

⁴² So keru Paula ni Banabasi qo vaeke keru se Jiu amu ko ilusato ko pade saizama maba poso ta ke taipazikake nioqa tu nioqata qo vaitou mata koko tovama Sabati ṉaniu kale tu nioqata qopa kai bazutou mata kama quli koa bazu kikolani.

⁴³ Ni se maba poso lula ke aere saita, nio kubo Jiu amu ni kubo madu seke liliziovini ni Jiu amu jaria Baṉara ke ilusivani maba ke eveni ta ke luluekake Paula ni Banabasi. Nio nioqa apositolo kidi ta qo katimake se zuvarato sama pesio tu seta kebeta elou Baṉara ko vailo ni roquano kale.

Paula kai bazuto ko Uri ama Bazu se Anitioko amu kasi

⁴⁴ Ni koko tovala Sabati keru ta sipole sea kiadamu koa matu peuru kale amu ta ke kuevake viqole vo Baṉara ko bazubazu.

⁴⁵ Nio so keru se Jiu amu ke kea keru ko matuma padopadoilo sai, inio seta keta matu konoivake, ni pesipesi saṉa ke ikake vo Paula o kasekema quli, ni ke ruqe kasevake vo.

⁴⁶ Melai Paula ni Banabasi ta matu parani putole qo pesiake ni eri kiqolake, “Ko male ikio tu mekasi nio kuleto ko kaseilo vo Baṉara ko bazu, melai meta meda ka lupaova viqo ko ti lula kuiripato saṉa meda eva me ṉavi ni pui me malezika ko noqola kama saevo, so sole eqeta qe vaemelou me ni qeta ziovou pui Jiu amu kasi.

⁴⁷ Ako komi kio koa bazu vo Baṉara eqe lula o katiqelema ko eri kikolako, ‘Aṉata lula se pui Jiu amu ko juke jari a iṉe ṉo tu peuru ma peuru kale amu ta ke pakiovou,’ kikolako,” kiqolake.

⁴⁸ Nio so keru se pui Jiu amu ke viqe keru ko, seta keta zoleike ni matu uri ka kikeve vo Baṉara ko bazu, ni seke pitoini tu ke kovo amu koa noqola kama saevo ta ke tuvevo putake.

Jiu amu ko butueko omuqa apositolo kidi

⁴⁹ Ni vo Lekasa Jisu ko bazu ta ko aerake koa kiadama Pisidia ranama peuru poso kale.

⁵⁰ Melai se Jiu amu ta ke jituemake se koa Pisidiama Anitioko peuru kale ama tanatanamu ni so jari se pui Jiu ama matuma rekoreko poso seke ilusivani vo Baṉara Jiu amu sase. Ni sea matuma maba poso ta ke taniekake naqueko Paula ni Banabasi ni seta ke butuekake nioqa Pisidia ranama peuru poso kale azo.

⁵¹ So sole nioqa omuqa apositolo ta qo papazikake ko pari nioqako kiti kale ama tu ko mamola pueko ko saizamu ta pui Baṉara ko maba madu inio kio, ni qota vatutake Aikoniami peuru kale.

⁵² Ni se Anitioko ama maba poso seke tuvevo putani ta keta matu zoleivake ni omai sukatake vo Tabu ala Auvana.