Hiburu 7 - BAṈARA KO VAIRU AMA LEVELEVEO

Vo Melekizedeki siama

¹ Voa Melekizedeki ta Selema peuru kale lekasa o eveni ni Matu Raura kala Baṉara vo siama. So keru Ebarahami obeta vaita keru pazokinio kale azo opa ruvurime keru ariku lekasa, so keru inio Melekizedeki ta opa toraevake vo, ni vota o maurumauruevake vo,

² nio Ebarahami ta o kativake vo koko toni ama koa lomaloma poso ko, vo sai opa koema. (Kuleto ama Melekizedeki ko ṉi ko kio ni kalo ta “Sidopu ko Lekasa,” ni seta mata kevai nokaeke “Bule ko Lekasa,” ako vota lekasa o eve Selema peuru kale sole, ko Hiburu pesio kale “Bule” kekai nokaekema.)

³ Tabu ama Riki kale ta pui kopa rikiziovi ko lainioqa inio voko niania ni mama, ni pui kopa kasei vota ukoa vikuvikula kale ala inio kio, ni pui kopa kasei voko alilo ni voko vou. Sole vota Baṉara vo Meqora jari ala, ako voko siama iruruputo ta noqola kobeta eva.

⁴ Kerukeruekomo Melekizedeki ko matu raura elo. O ṉavi Ebarahami animevo kulekuleto ala taite melai o roveake pitasiko kiadama quli vo o koema pazokinio kale nio o kativake koko toni ama.

⁵ Ni se siama madu Livai ko vikuvikula kale amu ta ke soruike vo Mosese ko Bazu kale kude tu seta ke padoeko kiadama quli ko toni ama Izireli amu kasi azo, ni sea kiadama maba poso ta vo Ebarahami ko ṉisa vikuvikula kale amu, melai keta ma koake ke ṉaviko mabamu ko ṉase topi azo.

⁶ Melekizedeki ta pui Livai ko toutou kale ala inio melai vota o koe ko toni ama Ebarahami kasi azo ni so jari vota o maurumauruevake vo Ebarahami, vo Baṉara lula ova kasekeni voko leveleveo poso.

⁷ Animeta me baqumuka ta vo mauru o ikazateni ta raura kala vo mauruto o koeni kasi azo kio.

⁸ Livai ko vikuvikula kale ama siama madu seke koeni ko toni ama ta keta vouva, melai Melekizedeki vo o koeni ko toni ama ta obeta saeva jari, ko Tabu ama Riki kikolani jari.

⁹ Komia taku Livai ko vikuvikula kale ama siama madu inio ke padoekani koa toni ama. Melai se inio mata ke kativeni jari ko toni ama vo Melekizedeki, so keru vo Ebarahami o kative keru ko toni ama.

¹⁰ Ako Ebarahami o toraeve keru vo Melekizedeki ta pui nio o alilake vo Livai melai vota obeta evake vovo taite Ebarahami ko dara kale.

¹¹ Livai madu ko siama elo ko taku keru inio se Izireli amu ta ke koake ko Mosese ko Bazu. Melai sea siama madu ko iruruputo ta pui nio ko male, so sole kala pado siama ta o puratake, vo inio vo Jisu Melekizedeki ko keve o luluekeni, pui Eroni ko keve.

¹² Ako so keru kuleto ama siama iruruputo ko besieke keru ko vairu ama siama iruruputo inio bazu melai mata soa besizio ko evake.

¹³ Ni so jari vo animevo Lekasa Jisu vo aṉa avai bazutani ta edoloma toutou kale ala, ako vota Jiuda toutou kale ala ni puliala inio koa toutou kale ala siama opa eveni.

¹⁴ Ako matu zakaremu ikio vo Jisu ta Jiuda toutou kale ala kio, melai koa toutou ta pui opa kaseke vo Mosese so keru vo okai pesi keru ko siama iruruputo.

Jisu, Melekizedeki jaria edolola siama

¹⁵ Animeta meqai nianiia komi quli, ako vo edolola siama ta o purate sole, Melekizedeki jari ala.

¹⁶ Vota siama o eve, pui siama ko imo ko bazu kale, melai noqola kama saevo ko pizato kale.

¹⁷ Ako ko Tabu ama Riki ta ko kaseka ta, “Ṉota kala noqola kala siama ṉo elou, omadeuvo Melekizedeki jari.”

¹⁸ Lulama siama ko bazu ta kota vaekaziake, ako kota lekuleku ama ni pui ko roveako pakiemo se maba poso sole.

¹⁹ Ako vo Mosese ko Bazu ta pui ko roveake sidopu puto Baṉara ko kelokelozato kale, melai erisaṉa vo Karisito ko siama elo kale qulepo ama keru ta me ṉeamuka anime, ko anime sipole ko imelako vo Baṉara kasi.

²⁰ Koko ziokale ta ikoana vo Baṉara ko kejo. Livai ko vikuvikula kale ama siama iruruputo ko eve keru ta puliama soama kejo kopa eve.

²¹ Melai Jisu siama o evake, so keru inio Baṉara ta kejo saṉa o ikake voko pesio ni eri kiolake, “Aṉata lula kejo a iṉa tu ṉota noqola siama ṉo elou, ni aṉako vatolo ta pui kopa besiziovou,” kiolake.

²² Ako koa kejo kale Jisu ta tuvevo saṉa ni vinavina o ika ko leveleveo ni vokale kude animeta meqai nianiia ta kota kokai paloasa ko lulama leveleveo.

²³ Ka pado edolovo Jisu ko ta sea kubo lulama siama madu Livai ko vikuvikula kale amu ta pui noqola kepa eve ti seta pui kepa kai noqoi ereko ko siama iruruputo.

²⁴ Melai Jisu ta noqola saevo o eva ni voko siama iruruputo ta pui ko pakea mata kala edolola maba tona.

²⁵ Sokale inio vota pizato sala koko pakiemako kiada keru se maba madu seke kuevani Baṉara ko kuleto vokale kude, ako vota noqola tu o mati petao se vo Baṉara kasi.

²⁶ Sokale inio animeta Jisu ta animevo male ala Ṉisa Siama. Vota tabu ala ni sarueko pide ala, ni vo Baṉara ta o edolivake vo se sarueko samu kasi azo ni o koivievake aukale sai Baṉara o evakoi, ni vota oma lekasa pua kiadama maba poso.

²⁷ Vo Jisu ta pui o erekani ko siqasiqa kiadama ṉaniu sea ṉisa siama madu jari, o ṉaviko sarueko ko siqasiqa kuleto Saita, ni koko tova ta mata sea maba poso ko. Vota pui so o kavani, ako vota sarueko pide ala sole. Melai vota o ereke omadeu siqasiqa o ṉaviko tupu kale, omadeu pado taku ko malezikako kiadama taku.

²⁸ Mosese ko Bazu kale ta ke pitoi se maba madu, se sarueko kekai zomaneni ereko, tu seta ṉisa siama madu ke elo; melai Baṉara ko kejo sama leveleveo ta ko baroake Mosese ko Bazu ko tova, ni kokale inio vota o pitoevake vo Meqora, ni noqola sidopu ala Ṉisa Siama o ivake, so sole vo inio voa Ṉisa Siama animevo male ala.