Hiburu 6 - BAṈARA KO VAIRU AMA LEVELEVEO

¹ So sole animeta me zuato koa nianiiekato, ko muqaro ko imelo ama anime auvana kale, tu pui me noqoeko pala ko kuleto ama quli lotu ko. Koa kuleto ama quli lotu ko ta pui me dova tanieko zakaremu pueko, ko eri ama: ko lilizio utu ama iruruputo ko ereko kale azo, koko melati ziovo ama auvana kale ama voukale; vo Baṉara vai oqu,

² ko bapitaiso poso ko nianiiekato ni ṉase mai iviko ko tabu imo ko nianiiekato; ni voukale azo ama tova saevo ko, ni noqola kama titizato ko, koko kilo ama ṉaniu kale ama ko.

³ Aria tu me zuato koa muqaroma nianiiekato kasi! Ko ikio anime me ereko ama vo Baṉara ko tauvezato kale.

⁴ Ako nonia roveo inio seke vaekani seko oqu ta tova lilizio ke elou? Puliama keve kale! Ako soama maba poso ta lula ke lojoani vo Baṉara ko zakaremu kale sole, ni seta lula ke lainikani koa katizato ko kuevako Baṉara kasi azo, ni seta lula kekai zomaneni ṉeamuvo vo Tabu ala Auvana sole.

⁵ Seta lula kekai nianiiani seko saevo kale ko Baṉara ko pesio ta uri ama, ni seta lula ke lainika Baṉara ko lekasa puo ko pizato poso.

⁶ Seta lula kebe kai nianiiake kiadama ko quli poso, melai keta epezake vai oqu vo Baṉara! So sole seta pui ke rovea tova lilizio, ako seta ke tova vouvaeva jari vo Baṉara vo Meqora ni kevai kedua vo ubutiana sole.

⁷ Omadeuvo vo Baṉara ta mauru o ika ko miduku koko koako mati ko nioro ju ni ko qotupikako ko papapapa poso koko tauvemo ama seke erekani ko kiaro.

⁸ Melai rikosasana ni rabu kokai qotupako jari ama sea maba poso ko saevo ko elou, kota puliama kalo sama ikio, ko male tu vo Baṉara ta o mati levezou se ni vota o siqaemou se uza kale.

⁹ A roquemelani mela lolo poso, aṉata soa kaseko abe eva melai aṉata a melai uria nianiia me, ta meta me luluekou ko uri ama kalo pakio ko.

¹⁰ Ako vo Baṉara ta matu sidopu ala kiadamu kasi. Vota pui ukaka opa ikou meko iruruputo ni ko meme buratikema roquano meko tauvemo kale lula ni erisaṉa vo Baṉara ko qoqono voko ṉikale.

Baṉara ko tuvevo ama leveleveo

¹¹ Aṉata a mela matu zaria me tu mea kiada mela ta soa matu madoeko me elou ti kobeta barou koa taku ko paitopaito, so inio ko quli meme qovo ama ka kimelako ta tuvevo ko elou.

¹² Meta pui lupalupato melai meta seke kovo amu vo Baṉara oma inainaekako quli jaria noqola oqu emo.

^13-14 Lulavo vo Baṉara ta o ereke ko kejo sama leveleveo Ebarahami kasi, nio vota eri kiolake, “Tuvevo avole aṉata mauru a iṉou ṉo, ni aṉata a qatiṉou ṉo kubo vikuvikula.” So keru Baṉara o kative keru vo Ebarahami koa leveleveo vota o kejomukake ko o ṉaviko ṉikale, ako puliala ta vo azo raura kala sole.

¹⁵ Ebarahami ta inobea taruano o evake ni vota o koake vo Baṉara ova inainaekema quli tu o kativo vo.

¹⁶ So keru vo maba o ereka keru ko kejo, vota o ereka vo azo matula ko ṉikale, tu kota pesipesi pide ko elo ni pizato saṉa ko elo.

¹⁷ So sole so keru Baṉara oka zariovi keru uria kasa pueko ko vota maba pui opa besiekou voko vatolo seke kovo amu kasi vo oma inainaekema tu ke kovo, vota o vaekake ko kejo voko leveleveo topi.

¹⁸ So sole omuqa quli ta ikoana, voko leveleveo ni voko kejo sama pesio topi ama, ko pui kopa roveovo ama besizio, vo Baṉara pui opa kai roveovo ama lipalipato. So sole anime lula me qoani mela ko pakiezato vokasi ta me rovea matu zuvario tu pizaka noqoeko me elo koa keru ko meqai tarekake ko quli Baṉara o ereko ama quli tu anime kaqe.

¹⁹ Koa keru animeko ta animeko saevo poso ko titi. Kota vinavina ni tuvevo ama, kokale animeta me amaqea koa suma otu kale kude koa Matu Tabu ama Zae ko poro kale, sai Baṉara o evakoi.

²⁰ Jisu o kiada inio lula o amaqeovini sai anime kaqe, ni noqola kala ṉisa siama o eveni, Melekizedeki jari.