Hiburu 5 - BAṈARA KO VAIRU AMA LEVELEVEO

¹ Kiada keru vo ṉisa siama ta o pitoiva voko mabamu kale azo tu vota ova nabuluputo vo Baṉara sekale avo, tu vota o kativo ko siqasiqa seko sarueko poso ko akoeko kaqe.

² Vota lekuleku o eva kubo quli kale, so sole vota o rovea tu baisemo se pui kai nianiio kale ke erekani ko sarueko ni seke saruivani maba poso.

³ Ako o ṉavi vo melai o rovea ereko ko sarueko, sole vota pui o ereka ko siqasiqa sea maba madu ko sarueko poso kaqe ko kiada, melai vota o ereka o ṉaviko sarueko poso ko siqasiqa kuleto, saita inio seko.

⁴ Puliala ta o ṉavi o pitoiva tu vota o raurailo tu ṉisa siama o elo. Melai o ṉavi Baṉara o kiada ko nokao kale inio vo maba ta ṉisa siama o eva, omadeuvo Eroni o ivevoa nokaevo jari.

⁵ So jari nio vo Karisito ta pui opa pitoi o ṉavi tu vota raura o elo ni ṉisa siama o elo. Melai vo Baṉara va kiovevo ta eri, “Ṉota aṉavo Meqora ṉa, vairutu aṉata a bazueṉa ṉo, ta aṉata ṉovo Mama lala.”

⁶ Ni vota mata eri kiolake kama Tabu ama Riki kale, “Ṉota kala noqola kala siama ṉo elou, omadeuvo Melekizedeki siama jari.”

⁷ So keru Jisu obeta saeve keru miduku kale vota o ereke voko paseto sama vararaito matuma kora kale ni deumu sase Baṉara kasi, tu vota o pakievo vo voukale azo. Baṉara ta ota va viqake voko vararaito ako vota o zarazaraivani ni ota va panaovani vo Baṉara sole.

⁸ Vota Baṉara vo Meqora inio melai vota okai nianiiovi ko zoripato voko tola kale.

⁹ Baṉara ta lula o uria korotikake voko vatolo vokale kude saita inio vota sea kiadamu seke zoriveni vo ko noqola kama pakio ko raki o evake,

¹⁰ nio Baṉara ta o pitoevake vo tu vota ṉisa siama o elo, omadeuvo vo Melekizedeki voa siama jari.

Balauvato tu maba madu ta pui ke vaeko ko oqu

¹¹ Kubo quli ta mata ikoana ko anime meqa zariako kaseko vo Karisito ta omadeuvo Melekizedeki jari ala inio kio, melai kota tapata tu kaseko mekasi, ako meko paqumato ta matu oluoluavo sole.

¹² Erisaṉa meta lula ko male tu nianiiekato ko maba elo, melai meta pui nio me ereka. Edolomu inio kebe melai nianiiekika ko kuleto ama bazu poso vo Baṉara ko bazubazu Jisu kale avo. Meta me male kuo ko zokele ama sailao se muqaroma maba poso jari, melai meta mebeta nozuta ko susu.

¹³ Vo o nozuekani ko susu ta molele obeta eva, puliama kai nianiio sate ko sidopu ni sarueko.

¹⁴ Seke kuani ko zokele ama sailao ta se muqaroma maba madu nianiio kale inio, seke roveani pitasiko ko uri ni ruqe seko iruruputo kale.