Hiburu 3 - BAṈARA KO VAIRU AMA LEVELEVEO

Jisu ta raura kala Mosese azo

¹ Sokale avo, a lolo poso mela vo Karisito kalea mela, ni vo Baṉara lula o nokaemelani mela, meta kerukeruevomo vo Jisu, vo Baṉara o soroeveni tu Ṉisa Siama okai elo koa tuvevo puto anime tuvevo me ikako.

² Vota kerula kala Baṉara kasi, vo o pitoeveni tu o ereko koa koidi, omadeuvo vo Mosese kerula ereko o eve jari voko iruruputo Baṉara ko qoqono kasi.

³ Vo Baṉara ko qoqono ta omadeuvo kala pade jari. Vo maba o erevani kala pade ta matu raura kala vo o erekako pade kasi azo. Omadeuvo so jari inio Jisu ta o male matu raurailo Mosese azo.

⁴ Ako matu tuvevo, kiadama pade poso ta maba ikio ko ereka, melai Baṉara o kiada inio o erekeni kiadama quli.

⁵ Mosese ta kerula kala nabulu o eve Baṉara ko qoqono kasi voko mai bazueko kale se maba poso ko quli Baṉara o kaseko ama quli.

⁶ Melai Karisito ta kerula kala Meqora voko kati vailo kale vo Baṉara ko qoqono. Ni animeta mebeta parani putou ni me duvevo puekou ni me darekou ko uri ama quli anime me qovo ama, ta animeta kasa me elou ta anime inio voko qoqono mela.

Pui ke tuvevo putani ko balauvato

⁷ So sole animeta me viqou vo Baṉara vo Tabu ala Auvana ko pesio kikolani, “Meta me viqou vo Baṉara ko pesio vairutu,

⁸ ta meta pui zokele me ikou meko bulo, omadeuvo meko taite poso ke kaevo jari, so keru seke zaraeve keru vo Baṉara, so keru koa taku seke eve keru lealea kama zaekale, ni seke madoeve keru vo.

⁹ Sai nio seke madoelekoi, kiola vo Baṉara, kebe keve melai ko aṉa a erekema aqasiele ama quli koa ariku toni sabere kale.

¹⁰ So sole aṉata amai korakoraivake sea maba poso ni eri kialake, ‘Seta meomeo kamu kiada keru ni seta pui ke zorika aṉako bazu poso.’

¹¹ So sole aṉata amai korakoraivake se ni ada ma kejomatake: ‘Seta maba pui kekai amaqeovou koa zae ko aṉa a qatimo ama ka kialako tu kekai mamazo!’ ”

¹² A lolo poso, meta balauvomo tu puliala me azo ta o ṉeamukou ko ruqe ama bulo ni pui tuvevo puto, koko lilimelo ama me vo tuvevo ala Baṉara kasi azo.

¹³ Melai meta pizatomo kokale azo tu puliala me azo ta ko lipaevou ko boutare, ni zokele bulo ko ivo, melai meta zuvarikiniomo muli kiadama ṉaniu, anime mebeta eva keru erisaṉa ko Tabu ama Riki kokai nokaekako “Vairutu”.

¹⁴ Kerukeruekomo erisaṉa ta animea kiada mela ta vo Karisito kalea mela, pizaka noqoeko me elou ta koa kuleto ama tuvevo puto ti mebe kai barolou saevo ko paitopaito keru.

¹⁵ Ako Tabu ama Riki ta eri nio kikolani sole: “Meta me viqou vo Baṉara ko pesio vairutu, ta meta pui zokele me ikou meko bulo, omadeuvo meko taite poso ke kaevo jari, so keru seke zaraeve keru vo Baṉara.”

¹⁶ Lave inio sea maba poso se keta va viqeni vo Baṉara ko pesio ni ke zaraeveni vo? Se inio sea kiadamu se vo Mosese o saqorimeni Ijipi peuru kale azo.

¹⁷ Lave inio ko se vo Baṉara omai korakoraini ariku toni sabere? Se inio sea maba poso seke saruini, ni ke vovini lealea kama zaekale.

¹⁸ Vo Baṉara ta ota ma kejomate tu “Seta pui kekai amaqeovou koa zae ko aṉa a qatimo ama se ka kialako tu kekai mamazo.” Lave inio so ma kioveni? Se inio seke peripateni.

¹⁹ So sole animeta me vakakuma ta seta pui kepa roveovi amaqeo koa zaekale, ako seta pui kepa tuvevo pueke vo Baṉara kiovevo sole.