Hiburu 10 - BAṈARA KO VAIRU AMA LEVELEVEO

¹ Mosese ko Bazu ta omadeuvo kama pado mamola koko kasekako koa uri ama quli Karisito o kati kuevako, kota pui ko ṉavi koa tuvevo ama quli Karisito o kati kuevako. So sole se siama madu ta upo ke kati ijaeka ereko koa omadeu keve siqato kiadama sabere ma sabere poso. Koa siqato ko ereko ta maba pui ko korotima se maba poso tu seta ke zio Baṉara ko sipole sidopu amu voko tanama kale.

² Ako seke ilusivani vo Baṉara ta tuvevo avole lula bulebule ke eva seko sarueko poso kale azo tea, seta pui nio kepa lainikou seko sarueko, ni kiadama siqato poso melai kota epezo inio.

³ Melai koa siqato poso ta ko ereiva sabere ma sabere kobeta kavani tu ke kerukerueko ko sarueko poso se lula ke erekako.

⁴ Ako bulumakau ni qouti ko dara ta maba pui ko rovea ṉamuko maba poso ko sarueko poso sole.

⁵ Sokale avo inio, Karisito okai kuevivo komia peuru ma peuru, vota eri kiolake Baṉara kasi, “Ṉota pui ṉoqa zaria kama katizato ni siqasiqa poso, melai ṉota lula ṉo inainaeka aṉako tupu.

⁶ Ṉota pui ko zoleṉa ko pado ama biaṉa ko siqaivako sara topi ma kama edoloma siqasiqa tu ṉota ṉoda ma ṉamuko seko sarueko poso.

⁷ Nio aṉata eri kialake, ‘Aṉata koi, a Baṉara, tu aṉata a ereko ṉoko vatolo omadeuvo aṉa aqai rikiziovivo jari sai Mosese ko Bazu ko buka kale,’” kiolake.

⁸ Koa pesio poso kale avo, vota eri kiolake kuleto, “Ṉota maba pui ṉoqa zaria ni ko zoleṉa ko siqasiqa poso ni katizato poso ni biaṉa poso koko siqaivako sara topi ni sarueko ko akoekato ko siqasiqa poso.” Vo Mosese ko Bazu ta ko soroemake se maba poso tu ke ereko kiadama koa siqasiqa poso melai vota so kiolake koa siqasiqa poso ta pui ko zoleva vo Baṉara.

⁹ Ni vota mata eri kiolake, “Aṉata koi, a Baṉara, tu aṉata a ereko ṉoko vatolo,” kiolake. So sole Baṉara ta o epezikake lulama siqasiqa poso ni vota o besievake vairu ala siqasiqa Karisito kale koa siqasiqa poso.

¹⁰ Ako Karisito ta o ereke Baṉara oka zariovima quli tu vota o ereko, ni voko tupu ta siqasiqa ko evake omadeu taku ko malezikako kiadama taku tu animeta bulebule me elo.

¹¹ Vo Jiu ala siama ta o ereka voko koidi poso kiadama ṉaniu poso, ni vota o ereka koa omadeuma siqasiqa poso kubo taku, melai koa siqasiqa poso ta maba pui ko roveako ṉamuko se maba poso ke erekako sarueko poso ko kuiripato.

¹² Melai Karisito inio o erekeni omadeu pado siqasiqa pizato sama ko noqola ṉamuko ko evako se maba poso ko sarueko poso. Sai kazo inio vota o papuake Baṉara ko palo rana vasia rana ni lekasa o evake.

¹³ Sai nio vo o evakoi, ni o tarekakoi ko taku so keru Baṉara voko kiti iviivi o imou keru kiadama voko kana madu.

¹⁴ Omadeu pado siqasiqa ko kiada kale vota noqola sidopu o imake se lula bulebule ke evani seko sarueko kale azo.

¹⁵ Vo Tabu ala Auvana melai uria kasa o mela ika anime ko quli ta tuvevo ama quli ikio. Kuleto vo Baṉara ta eri kiolake,

¹⁶ “Komi kio koa leveleveo ko aṉa a ereko ama se tona ko kilo ama taku kale, kiola vo Baṉara: Aṉata a vaekou aṉako bazu poso seko bulo poso kale ni a rikiekou seko kerukeru kale.”

¹⁷ Ni vota mata eri kiolake, “Aṉata pui mata aba tama kerukeruekou seko sarueko poso ni koa ruqe poso se kekai niumaekake aṉako bazu poso,” kiolake.

¹⁸ So sole Baṉara lula o akoeka keru maba poso ko sarueko, puliama siqasiqa ta mata kepa ka zariovou tu vota ota ma ṉamuko seko sarueko poso.

Animeta me qilou Baṉara ko sipole

¹⁹ A visi poso, vo Karisito ko dara ko rerema voko voukale animeta lula maba rupasio meda eve tu animeta parani putole me amaqeo koa Matu Tabu ama Zaekale animeko vararaito kale.

²⁰ Jisu ta lula o mela veuke kama pado vaini ama keve saevo ko voko tupu siqasiqa iko kale. Sokale avo inio pulia quli ta kopa tizaemelou tu amaqeo vo Baṉara ko kuleto omadeuvo ko suma otu ko tizaeme jari sea maba poso, ko omuqa teze ko evema.

²¹ Animeta mata me ṉeamuva kala pado matula Siama, vo inio vo Jisu, vo o mati vailani Baṉara ko qoqono madu.

²² So sole animeta me qilou vo Baṉara ko sipole ni mevai oquvou vo Jisu Karisito ni me qativou animeko pado ama bulo, ako vo Jisu ko dara ikio bulebule ko ikema animeko pado ama bulo poso, tu meqai nianiio ta vo Baṉara ta lula o akoeka animeko sarueko, ni lula bulebule o imela anime kio.

²³ So sole animeta pizaka lojo me elou ni animeta me noqoekou animeko keru ko meqai tarekako quli vo Baṉara o ereko ama quli tu anime kaqe. Ako Baṉara ta lula o mela inainaeka anime tu vota o erekou o kasekema quli, sole ko male tu animeta mevai oqu vo.

²⁴ Animeta me qerukeruekiniou, tu me dauvekiniou muli tu kasa me ikou ko roquano ni me erekou ko uri.

²⁵ Animeta pui niaba me elou animeko omadeu padoilo ilusato kale azo, animeta pui lekuleku meqai elou ko, omadeuvo kake ke kavani jari, melai animeta me zuvarikiniou muli matuvole, ako animeta meqai nianiia vo animevo Lekasa ko vaito ko Ṉaniu ta lula sipole kio sole.

²⁶ Animeta lula meqai nianiia ko Uri ama Bazu ko tuveano melai nianiio topi animeta mebeta ola ereko ko ruqe ama quli tea, puliama mata kama pado siqasiqa ta kopa ṉamukou animeko ruqe poso.

²⁷ Melai meda ka ṉalo ama ta mai kopa ereilo ama quli: ko ikio ko titizato ni ṉaloṉalo ama uza koko niumaemo ama vo Baṉara ko kana madu.

²⁸ Vo maba vo o bikoirikani ko Mosese ko Bazu ta pui ke baiseva melai tutumazi avole ke vouvaeva omuqa ma zouke maba tava kaseko kale voko sarueko lula o erekako.

²⁹ Melai matu palopaloasia tapata inio o elo avo voa maba vo o perivani vo Baṉara vo Meqora ni vo zara kerukerueko o evani vo Baṉara vo leveleveo ko dara ko vo bulebule ko ivako voko sarueko kale azo, ni vo o ruqe kasevani voa pakiezato sama roquano sala Tabu ala Auvana. Voa maba ta o tareka vo Baṉara ko koqotato ko vo o kovo ama.

³⁰ Ako animeta mevai uria nianiia ta Baṉara inio eri kiolake, “Aṉa inio vaitotola a erekou, ni aṉa inio a erekou sarueko ko reketekete,” ni vota mata eri kiolake, “Aṉata a bitasimou aṉako maba poso,” kiolake.

³¹ Ko ṉalonalo ama quli ta kai sobuilo vo saevola Baṉara ko piza kama ṉase.

³² Meta kerukeruekomo lulama taku so keru me kuleto meqai nianiiovi keru vo Jisu vai oqu. Koa taku meme doraeke keru ko matuma tapata melai meta me bataite ni me bizate tapata kale.

³³ Koa taku keru inio se maba madu ta ke perimele me ni seta ke niumaniumaemele me kasavole ni kama taku meta meqai zolei tu mai zomano se soama keve kale ke periziani.

³⁴ Meko tauvemo kale se, meta me lainike se piripiri amu ko tola ni so keru kiadama meko lomaloma keta mela rapeke melai meta me zolei, ako meta meqai nianiiake ta lula me qoa ko qulepo ama quli ko noqola ko elo ama aukale sole.

³⁵ So sole meta pui lekuleku elo, ako piza kamela meko tuvevo puto kale ta me qovou ko matuma reketekete sole.

³⁶ Meta inobe emo inio meta me erekou vo Baṉara ko vatolo ni meta me qovou ko vo lula o mela inainaekako quli tu o katimelou me ka kiolako.

³⁷ Meta soa saevo emo, ako Tabu ama Riki kale ta eri kikola vo Jisu kale avo sole, “Matu sipole inio vo o kilo ala ta o kilou; vota pui opa ubaitou.

³⁸ Se aṉako sidopu ama maba madu ta ke tuvevo putou nio seta ke saevou; melai kala se azo ta o vaitou kutumana kale aṉa kasi azo, ta aṉata pui aba vai zoleilou vo,” kikola.

³⁹ Melai animeta pui so ko maba mela tu animeta me vaitou kutumana kale tu animeta me noqola tolailou heli kale. Melai animeta animeko oqu kale me bakiziani mela.