Epesasi 6 - BAṈARA KO VAIRU AMA LEVELEVEO

Meqora poso ni mama ni niania ke kalo avo

¹ Me meqora poso mela, meko lotu saevo kale ama koidi ta meta me zorimou meko mama ni niania poso ako so inio sidopu sole.

² Ako eri nio kikolani koa Tabu ama Riki sole: “Ṉota ṉoda ka paṉaovou ṉoko mama ni niania.” Ni kota kuleto ama koa toni bazubazu kale ama bazu ko leveleveo saṉa o ikema vo Baṉara, eri kio sama:

³ “Ni so inio kiadama quli ta koṉai avoziovou, ni ṉota rosia saevo ṉo elou miduku kale,” kikovema.

⁴ Ni me mama poso mela, meta pui me qorakoraemou meko meqora poso, melai meta odiemomo se vo Lekasa Jisu okai nianiiekatema ni okai bazubazutema jari ama kalo kale.

Mabaku poso ni lekasa poso ke kalo avo

⁵ Me mabaku poso mela meta zorimomo meko miduku kale ama lekasa poso meko ṉalo ni paṉao kale. Ni meta erekomo ko quli meko tuvevo ama bulo kale omadeuvo meta me zoriva jari vo Baṉara.

⁶ Ni meta pui me vilua nabuluputou so keru seke mela lea keru me pala. Melai meta tuvevo avole me zorimou se omadeuvo meta me zoriva jari vo Karisito. Ni meko pado ama bulo kale meta erekomo ko quli vo Baṉara oka zariako quli.

⁷ Ni meta erekomo meko iruruputo zoleilo kale omadeuvo meta meva nabuluputa jari vo Baṉara ni pui maba pala.

⁸ Ni kerukeruekomo ta so me qalou nio tuvevo avole vo Baṉara ta o katimelou ko reketekete mea kiada mela, mabaku poso mela ni me pui mabaku poso mela, meko uri ama iruruputo ko ereko kale avo.

⁹ Ni me lekasa poso mela melai uri erekomo meko mabaku poso kasi. Ni pui me qasekou ṉavaṉavala kama quli sekasi tu me ṉavaemo se. Ako se ni mevo Lekasa ta inevoana aukale sole ni voa Lekasa ta omadeu titizimelo o elou animea kiada mela sole.

Kiakomo koa kiadama vo Baṉara ko vakovako

¹⁰ So sole meta pizatomo meko omadeu vati elo kale animevo Lekasa voko pizato kale.

¹¹ Ni kiakomo koa kiadama vo Baṉara ko vakovako so inio meta me roveovou kati pazokinio kiadama vo Setani ko vimazioputo ni ubeubezato.

¹² Ako anime me qati pazokiniako ta pui tupu kale ama sole, melai anime me qati pazokiniako ta vo Setani ko ruqe ama lekasa puo kale ama ziolo aukale ko evako, komia kutumana kama peuru ma peuru kale ko lekasa puako ruqe ama pizato poso.

¹³ Sokale avo inio meta kiakomo kiadama vo Baṉara ko vakovako, nio so keru tapata kama pazokinio ko taku ko barolou keru meta me bataitou. Ni so keru me baloasikou keru koa pazokinio meta mebeta lojolou.

¹⁴ So sole meta pizaka lojolo emo tuveano kale, ni kota tonaviso jari ko meqai bibuliako meko sipo topi. Ni meta sakekomo ko sidopu ama saevo meko dumidumi topi.

¹⁵ Ni meta kiakomo meko kiti topi meko kai bazuto koa Uri ama Bazu Baṉara ko bule ko tu ko tauvemelo me pizato lojolo.

¹⁶ Ni so jari kai iruruputomo meko vai oqu vo Karisito tu meko bako kaqe, ako kokale inio me jililikou kiadama vo Setani ko uza sama teqe sole.

¹⁷ Ni ṉeamukomo vo Baṉara ko pakio tu kota meko solodia madu ko zokele ama tarapae jari ko pakiemelou me. Ni kamakomo Tabu ala Auvana ko sopere, ni koa sopere ta vo Baṉara ko bazubazu.

¹⁸ Ni meta matu vararaitomo Tabu ala Auvana kale kiada keru, tu pasekomo vo Baṉara ko tauvezato. Ni kokale inio meta inaina kamela me elou kiada keru. Ni pui me epezou vararaito melai meta me mati vararaitou kiadama vo Baṉara ko maba madu.

¹⁹ Ni so jari meta me lati vararaitou aṉa, tu vo Baṉara ta o katilou aṉa ko quli aṉa a qaseko ama quli so keru a besiovou keru, tu aṉata parani putole kasa a ikou koa Uri ama Bazu ko tuveano kuleto mutamutale ko evema.

²⁰ Ako aṉata iruruputo salala tu aqai pesiovou ko Uri ama Bazu sole. Ni komia pirito pade kale melai ko ikio abe ereka erisaṉa. So sole meta me lati vararaitou aṉa so keru aṉa aqai bazubazutou keru ko Uri ama Bazu tu aṉata parani putole a qasekou, koko male avo.

Paula ko tovatovama zuvarato ko pesio

²¹ Aṉata a joroeva vo Tikikasi mekasi, vo anime me roquevani lotu visi. Ni vota kala kerula kala nabulu vo Baṉara ko iruruputo kale. Ni vo inio o melai bazuekou kiadama quli koko ereivako aṉa kasi. So inio meta melai nianiiovou aṉa ni loma ikio aṉa a erekako.

²² Sokale avo inio aṉata a joroeva vo, tu meta me ṉelai nianiiovou eṉe ṉe qavani, tu vota o zaubarimelou me.

²³ Ni aṉata a vararaita tu vo Baṉara animevo Mama ni vo Jisu Karisito ta o katimelou kiadama lotu maba mela voko bule ni oqu sama roquekinio.

²⁴ Ni aṉata a vararaita tu vo Baṉara ko pakiezato sama roquano ni paito pide ama saevo ta ko elou seke roquevani vo Lekasa Jisu Karisito tona. A baika.