Epesasi 5 - BAṈARA KO VAIRU AMA LEVELEVEO

Saevomo zakaremu kale

¹ Ako meta vo Baṉara ko meqora poso mela vo o roquemelani mela, so sole meta madoekomo tu Baṉara jari emo.

² Ni saevomo roquano kale, ni roquemomo edolomu, omadeuvo vo Karisito ta o roquemele anime jari ni vota pui opa kaitiziovi tu o vou anime kaqe. So inio vota matu uria tui ala katizato ni siqasiqa o eveni Baṉara kasi.

³ Ni meta lula vo Baṉara ko maba poso mela meda eva so sole meta vaekomo ko pauvezato ni rusurusuavo puto, ni pui viluloqu me elou. Ako komi quli ta pui kopa melati mabuvou sole vo Baṉara ko tabu ama maba poso mela.

⁴ Ni so jari meta pui me qovasa putou me ṉavio kude, ni pui me rukuekou sarube ama pesio ni pui meqai bazutou kuna kama balebaleito pesio ako komi quli ta pui kopa melati mabuvou sole. Melai meta me qativou meko uriavo vo Baṉara.

⁵ Ni meta meqai nianiiovou ko eri: puliala maba ta opa kovou voko reketekete vo Karisito ni Baṉara ko lekasa puo kale vo o erekani ko pauvezato ni rusurusuavo puto ni vo viluloqu o evani. Ako vo viluloqu o evani ta vota voko beku o ika inio sole ko quli vo viluloqu okai evako quli.

⁶ Ni meta pui zariemo kake tu ke saruemelo me lipalipa kama bazu kale. Ako koa boutare poso aṉa abe kasekako kale avo inio vo Baṉara ko korakorailo ta komai barolou sole se pui ke zoripatani.

⁷ So sole meta pui memai zomanou se soama maba madu.

^8-9 Ako koko paloasako taku kale meta kutumana kamela, melai erisaṉa meta animevo Lekasa ko zakaremu kalea mela. Ako ko zakaremu ikio ko kati kuevi sole kiadama uri ama ni sidopu ama ni tuveano sama kalo. So sole meta saevomo se zakaremu ko maba poso ko malezikako saevo kale.

¹⁰ Ni meta madoekomo tu kai nianiimo loma quli kio ko zolevo ama vo Baṉara.

¹¹ Melai meta pui me erekou ko quli se kutumana kamu ke erekako quli, ako ko quli ta pui ko tauvezatako quli sole. Melai erekomo uri ama quli tu kasa ko iko se kutumana kamu ke erekako quli ta sarusaru ama.

¹² Ako ko quli seke erekako mutamuta kale kai pesio melai qurato sama quli kio.

¹³ Melai ko zakaremu ikio kasa ko ika kiadama quli tu animeta me qelou koko tuveano.

¹⁴ Ni koa kiadama quli ko uria kasa ko evako quli ta zakaremu kota eva. So inio komi kikolani ta eri: “Toirate ṉo maroṉani ṉa! Ni saeve voukale azo, nio Karisito ta zakaremu o elou ṉokasi.”

¹⁵ So sole meta kati matu vailomo meko saevo, ni pui saevo se sarube ama maba poso jari, melai meta saevomo nianiioma maba jari.

¹⁶ Ni meta kai uria iruruputomo kiadama taku ko meme teamukako uri ama iruruputo kale, ako komia taku ta tapata kama, ako maba poso ta ruqe amu sole.

¹⁷ So sole meta pui me jarube puekou meko saevo. Melai kai nianiimo loma quli kio vo Baṉara okai zariako tu meta me erekou.

¹⁸ Ni meta pui doilili kai elo ko piza kama ju. Ako ko doilili elo ta ko niumaemelou me sole. Melai meta sukatomo Tabu ala Auvana kale.

¹⁹ Ni me ṉavio kude meta kai pesimo ko Tabu ama Riki kale ama kera, ni kai keraomo ko lotu kera tu ilusivomo animevo Lekasa meko bulo kale.

²⁰ Ni vo Lekasa Jisu Karisito ko ṉikale meta kativomo meko uriavo kiadama quli kale avo vo Baṉara animevo Mama.

Roroto saevo ko kalo

²¹ Ni meta zorikiniomo muli ako kokale inio meta meda va paṉaovou sole vo Karisito.

²² Ni me tanama rekoreko mela ta zorimomo meko tanama lasive poso, omadeuvo meta me zoriva jari vo Lekasa Jisu.

²³ Ako vo tanala lasive inio koko lezu sole voko reko, omadeuvo vo Karisito ta voko lotu qoqono ko lezu jari, ni o ṉavi Karisito nio o pakiemeni se lotu qoqono kale ama maba madu, ako ko lotu qoqono ta voko tupu jari sole.

²⁴ Ni voko lotu qoqono ta ko zoriva vo Karisito. So jari pado inio me tanama reko poso mela ta zorimomo meko tanama lasive poso kiadama quli kale.

²⁵ Ni me tanama lasive poso mela, meta roquemomo meko tanama reko poso omadeuvo vo Karisito ta o roqueka jari ko lotu qoqono, ako vota maba oka vovi voko lotu qoqono

²⁶ tu kota vo Baṉara ko ko elou. Ni vo Karisito ta okai iruruputa voko Uri ama Bazu tu vota bulebule o ikou ko lotu qoqono voko pusaeko kale bapitaiso ko jukale.

²⁷ Ako vo Karisito ta o vovi tu vota o kovo koa lotu qoqono omadeuvo vo maba o koani voko roroto kale koa sinaqu rusu ko bulebule ama ni ileile ama jari. Ni vota o vovi tu ko lotu qoqono ta bulebule ama ni kuiripato pide ama ni puliama ruqe sama ni puliama boutare sama ni puliama mata kama sarueko sama ko elou.

²⁸ Omadeuvo jari nio me tanama lasive poso mela ta roquemomo meko tanama reko poso omadeuvo meta me roqueka jari me ṉaviko tupu. Ako vo o roquekani voko reko inio o roquivani sole o ṉavi.

²⁹ Ni puliala maba inio okai kaikuapani o ṉaviko tupu, melai vota o niaeka ni o kati vaila inio. Ni so jari pado inio o ikani vo Karisito ko lotu qoqono,

³⁰ ako animeta voko tupu ko kata poso mela sole.

³¹ Ako ko Tabu ama Riki kikovevo ta eri nio sole, “Vo maba ta o vaekou voko mama ni niania ni omadeu o kati elou voko reko, ni nioqata omadeu qo elou.”

³² Ni ikoana matu saqoroma ni mutamuta kama tuveano, komia Tabu ama Riki ko kasekako. Koa tuveano ta eri nio: nioqa ko suirikani nioqa ta Karisito ni lotu qoqono.

³³ Melai kota mata ko kaseiva mekasi: so sole kiadama tanama lasive poso mela ta me roquemou meko tanama reko poso me ṉavi me roquiva jari, ni kiadama tanama rekoreko poso mela ta meda ma paṉaovou meko tanama lasive poso.