Epesasi 4 - BAṈARA KO VAIRU AMA LEVELEVEO

Omadeu tupu

¹ Aṉata vo Karisito vo lala, ni sokale avo inio aṉata a biriziovi. Ni vo animevo Lekasa ta o pitoemele me tu meta voko maba poso mela me elo. So inio aṉata a mela matu titia me tu meta saevomo vo Lekasa ko maba poso mela ko malezi-melako saevo kale.

² So sole meta zarazaraimo, ni baiseo ni inobe emo, ni pui taukavole me qorakoraekiniou, melai me roquekiniou muli.

³ Ni meta omadeu emo vo Tabu ala Auvana ko bule kale, ni meta matu madoekomo ni omadeu beta zio emo voko bule kale. So inio voko bule ta omadeu ko imelou me.

⁴ Ako animeta omadeu tupu mela ni omadeu pado Auvana inio o eva anime tona sole. Ni vo Baṉara ta o nokaemela anime tu animeta me qovou omadeu pado reketekete animeko tuvevo puto sama kerukeru kale.

⁵ Ni omadeu pado inio animevo Lekasa, ni animea kiada mela ta mevai oqua vo, ni animea kiada mela ta bapitaiso me eva voko ṉikale.

⁶ Ni omadeu pado inio vo Baṉara kiadakiadama quli vo Mama, vo o kati vailani kiadama quli, ni vota kiadakiadakoi ni kiadama quli kale o evani.

⁷ Ni vo Karisito ta o katimele anime omaomadeu kale azaazama puaro poso, animeko auvana kale ama. Ni animeta me ṉeamuka vo Karisito oka zariovima quli katimelo.

⁸ So inio ko Tabu ama Riki kikovevo ta eri, “So keru vo o koivi keru raura vasi, vota o odieme se piripiri amu. Ni vota o katime ko puaro poso se maba poso.”

⁹ Ni eri kio, “vo o koivi keru,” kio, ta noi nio koko kio ni kalo? Koko kio ni kalo ta vota ota saqore matu zara kakoi komia miduku kale saita inio o koivi.

¹⁰ So inio Jisu ta o saqore, ni vo inio voa omadeula vo obeta koivini lei ko okate vasi. Ni vo Jisu ta so o kae tu vota o korotiko o ṉavi kiadama quli.

¹¹ Ni vo inio o katimeni maba poso seko puaro. Kake ta apositolo, kake ta poropita, ni kake ta ke taliekani ko Uri ama Bazu, ni kake ta lotu qoqono ko odikato ni nianiiekato ko maba poso.

¹² Vota o katimelake komia puaro poso tu o inainaemelo animea kiada mela vo Baṉara ko maba madu mela tu me ereko o ṉaviko lotu ko iruruputo, tu animeta me bizatikinio vo Karisito ko tupu kalea mela.

¹³ Ni komia iruruputo ta kobeta ziovou ti kobeta barolou so keru animea kiada mela omadeu me elou keru animeko vai oqu kale vo Karisito, ni omadeu vai nianiio me elou keru vo Baṉara vo Meqora. Ni animeta muqaro ama maba mela me elou, ni animeta me rapukou tu Karisito jari me elou ni me ṉeamukou kiadama voko sidopu.

¹⁴ So inio animeta pui se meqora poso jari me qalou. Ni animeta pui mola jari me elou omadeuvo ko ururu ta ko puzeka ni ko solea kiadakoi vasi jari. Ako animeta pui ke melai saruekou kiadama vairu ama nianiiekato poso. Ako se kekai nianiiekatani ko ta ke ereka seko vatovatolo ni ke ereka kiadama lipalipa kama quli tu ke saruemo se maba poso tu ke lulueko sarusaru ama keve.

¹⁵ Melai animeta meqai pesiovou ko tuveano roquano kale ni animeta me rapukou kiadama keve kale tu Karisito jari me elo, ako animeta omadeuvo voko tupu jaria mela ni vo inio animeko lezu sole.

¹⁶ Ni komia pado ama tupu ta Karisito ko ikio. Ni kiadama komia tupu ko kata poso ta omadeu tauvekinio ni pizatikinio ko eva vokale. Kiadama koa tupu ko kata poso ta ko ereka ko ṉaviṉavi ko iruruputo poso. So inio komia pado ama tupu ta ko rapuka ni ko pizata roquano kale.

Vairu ama saevo vo Karisito kale

¹⁷ Vo Lekasa Jisu ko ṉikale aṉata a melai bazueka komi quli, ni a balauvimela, tu meta pui mata me dova luluekou se pui ke tuvevo putani ko saevo jari ama saevo. Ako seko kerukeru ta utube ama sole,

¹⁸ ni seta pui ke paqumuka ni pui ke mamura ako seta pui kekai zaria didiano sole. So inio seta pui kepa kovou koa saevo vo Baṉara okai zariako katimo.

¹⁹ Ni seta puliama qurato, ni seko saevo kale seta ke katizia ke ṉavi tu pui ke lalamato ereko kiadama ruqeruqe ama kalo.

²⁰ Melai koa nianiiekato meme qoema vo Karisito kale avo ta pui soama quli kio.

²¹ Ako aṉata aqai nianiia ta me ṉavi nio me viqe sole voko bazu, ni meta vo tona me eve, sole aqai nianiia ta meta me viqe ko tuveano. Ni matu tuvevo ako voa tuveano ta vo Jisu inio sole.

²² So inio meta me bazui tu vaekomo meko lulama saevo ni mata pui meqai saevou koa ruqe ama saevo ko me meqai saevema koko paloasema taku kale. Ni koa lulama saevo ta ko matu niumaniumaeka ko maba, ako se maba poso ta sarube ko ima sole koa ruqeruqe ama quli se kekai zariako ereko.

²³ Melai meta me bazui tu vairu ikomo meko bulo ni kerukeru,

²⁴ ni vairu ama maba poso emo vo Baṉara okai zariani jari. Ako vota o mela zaria anime tu sidopu ni tabu me elou animeko lulueko kale ko Uri ama Bazu ko tuveano sole.

²⁵ So sole meta pui me lipalipatou, melai me qasekou ko tuveano mevo lolo vo o tuvevo putani kasi ako animea kiada mela ta omadeu tupu kalea mela sole vo Karisito kale.

²⁶ Ni so keru meme qorakorailou keru ta pui zarieko koa korakorailo tu boutare saṉa ko imelou, ni meta vaekomo meko korakorailo puliako vo ṉaniu sulupo.

²⁷ Meta pui me qativou vo Setani ko rora tu o saruemelo anime.

²⁸ So inio vo o kuileni voko lulama saevo kale ta o epezou kuilo ni o iruruputou voko ṉase kale tu o kovou saevo ko korotikako quli, ni omai tauvekou koa uri ama quli se ozaoza kamu.

²⁹ Ni so keru me besiovou keru ta pui me rukuekou ko maba ko niumaeko ama pesio. Melai me qasekou ko quli ko uri ko imo ama ni ko pizatimo ama edolomu. So inio ko quli meme qaseko ama quli ta ko tauvemou seke didiemelani me.

³⁰ Ni meta pui duki me ivou vo Tabu ala Auvana, ako vo inio vo Baṉara vo mamola me o melai ṉeamukani sole. Ni vo Baṉara ta o katimele me voa Auvana tu kasa o ikou ta vo Baṉara ta o rupasimelou me komi ko kuevako taku kale.

³¹ So sole meta vaekomo kiadama pasopasoilo ni korakorailo ni bomuilo ni karaṉo ni ruqe kasemo edolomu. Ni meta pui mata me erekou kama kideipo sama quli.

³² Melai meta bairumuomo ni roquekiniomo, ni odouvikiniomo me ṉavio kude, omadeuvo vo Baṉara ta o melati odouvikinie me vo Jisu Karisito kale jari.