2 Timoti 4 - BAṈARA KO VAIRU AMA LEVELEVEO

¹ Vo Baṉara ni Jisu Karisito tanama kale, vo o titizimo ala se saevomu ni se voumu, vo o vaito ala tu o lekasa puo, aṉata a qatiṉa ṉo komia piza kama bazu

² tu ṉota kai bazubazute ko Uri ama Bazu. Maba poso keka zariovou viqo ma pui keka zariovou viqo melai ṉota kai bazubazute. Ṉota ṉo jidopu puemou se maba poso, ni ṉomai riqaekou seko sarueko, ni ṉo zuvarimou se maba poso, ni ṉota ṉoqai bazubazutou oluoluavole ni inobe ama nianiiekato kale.

³ Ako koa taku ta kota baroa so keru se maba madu ke kaikuapou keru viqo ko tuvevo ama bazubazu sole, ni so keru seke luluekou keru ke ṉaviko vatolo poso, ni so keru seke vailimou keru kubo titisa madu tu sea titisa madu ta kemai bazueko se ko quli seko zolemako seko viqaviqazata kale.

⁴ Seta pui kepa viqou ko tuvevo ama bazu ni ke didiekou ko lipalipa kama bazubazu poso.

⁵ Melai ṉota vinai ṉo ṉavi ṉoko uri ama kerukeru kale kiada keru, pataite tapata kale, ereka ko iruruputo vo Uri ama Bazu okai bazutani ko, ni puratika ṉoko pado ama va nabuluputo vo Baṉara.

⁶ Aṉa kale avo, ta ko taku ta lula kota baroa tu aṉata kala siqasiqa a elo; komi kio koa taku tu aṉata a vaeko komia miduku kale ama saevo.

⁷ Aṉata abe paika pazokinio komia uri ama pazokinio kale, ko anime meqai pazokiniako. Aṉata aqai baroa lotu saevo ko voziekinio ko paitopaito kale. Aṉata pui aba vaeke ko oqu.

⁸ Ni erisaṉa ta kobe tarela aṉa koa voziekinio ko tabara, ko sidopu ama saevo ko puratikako, koa reketekete animevo Lekasa voa sidopu ala Titizato ko Maba o katilo ama aṉa koa Titizato ko Ṉaniu kale. Ni pui aṉa a qiada aba kovou ko, melai kiadamu seke tarevani vo ni keka matu zariani voko vaito ta ke kovou koa reketekete.

O ṉavi Paula ko bazu

⁹ Matu madoeka taukavole kilo aṉa kasi.

¹⁰ Ako Demasi ta lula o vaele aṉa sole voko roqueko kale komia erisaṉama peuru ma peuru ama quli kale, ni vota lula ota ola Tesalonaika peuru kale. Ni Keresikenisi ta lula ota ola Qelesia peuru kale ni Taitasi ta Dalamesia peuru kale sole.

¹¹ Luke o kiada inio inovoana obeta eva aṉa sase. Pa voa vo Maka ni ṉo vati kilou, ako vota o roveovou tauvelo aṉa iruruputo kale sole.

¹² Aṉata lula a joroeva vo Tikikasi Epesasi peuru kale.

¹³ So keru ṉoṉo qilou keru ṉota ṉo qati kilou aṉako topia sabosabo sai Toroasi peuru kale a vaekema Kapasi kasi; ni so jari ṉota ṉo qati kilou ko buka poso ni matuma quli ta ṉo qati kilou koa biaṉa ko tupu kale ko ereima buka poso.

¹⁴ Alekezada, vo kopa o erekani maba ta o matu niumaelake aṉa; melai animevo Lekasa inio o mamola puevou vo o erekako quli kale.

¹⁵ Ṉota tava balauve vo, ako vo inio o matu kanaekikani ko anime meqai bazutako Uri ama Bazu sole.

¹⁶ Aṉako kuleto ama taku kale titizato kale ta puliala ta opa lati loje aṉa; seta ke vaele muli a qiada pado. Aṉako vararaito kale aṉata a baseva vo Baṉara tu vota pui omai kuirikou ko.

¹⁷ Melai vo Lekasa Jisu ta o evake aṉa sate ni vota o pizatilake aṉa, so inio aṉata a roveake kai bazuto pado ama Uri ama Bazu sea kiadamu se pui Jiu ama tanatanamu kasi tu seta ke viqo, ni aṉata a bakiake vou ko taka topi azo.

¹⁸ Ni vo Lekasa ta o pakielou aṉa kiadama ruqe ama quli kale azo ni vota o uria baroekilou aṉa voko aukale ama lekasa puo kale. Vokasi inio ko ilusato koko elo ama latau ṉaniu ni ka ṉaniu. Emeni!

Tovatovama roquano poso

¹⁹ Aṉata a joroeka ko roquano Pirisila ni Akuila kasi ni Onesiporasi saidi kasi.

²⁰ Erasitasi ta ota loiva Koriniti peuru kale, ni Toropimasi ta a vaeve Miletasi peuru kale, ako ota verepe sole.

²¹ Matu madoeka tu ṉota kua puliako sarosaroro ko taku baro. Iubulasi, Pudenisi, Laenasi ni Kolodia ni so jari sea kiadamu se koizama lotu maba poso ta ke soroeka seko roquano ṉokasi.

²² Aṉata a vararaita tu animevo Lekasa ko mauruto ta ko elou ṉoko auvana kale. Ni aṉata a vararaita tu vo Baṉara ko roquano ta ko elou mea kiada mela tona. A baika.