2 Timoti 2 - BAṈARA KO VAIRU AMA LEVELEVEO

Ṉota Jisu Karisito vo uri ala pazokinio ko maba eve

¹ So sole ṉo, ṉo a meqora ṉa, ṉota pizate koa pakiezato sama roquano kale ko animeko omadeu vati elo vo Jisu Karisito ko katimelako.

² Koa nianiiekato poso ko ṉoṉo viqema ko aṉa aqai bazutema kubo maba madu ko kuleto ṉota mai pakeka se kerula kamu, seke roveovo amu tu mati nianiiekiko mata kubo maba poso.

³ Ṉota kai zomane koa tapata Uri ama Bazu kekai kaikuapani ke katimelako anime, tu ṉota vo Jisu Karisito vo uri ala pazokinio ko maba eve.

⁴ Ako animeta meqai nianiia sole vo pazokinio ko maba vo o erekani dikidauputole voko koidi ta omadeu vatolo kale oka zaria tu zolevo vovo kuleto ala, ni vota pui opa kati valuvaluekou o ṉaviko riteraite.

⁵ Mata animeta meqai nianiia kala maba vo oka rereani ko voziekinio ta pui o rovea kovo ko mamola voko pui zoriko kale voziekinio ko bazu poso.

⁶ Ni mata meqai nianiia anime vo papato ko maba vo lula o erekani matuma iruruputo inio o male tu o kovou ko kuleto ama epa.

⁷ Ṉota kerukerueka so aṉa ṉa kialani, nio animevo Lekasa ta oṉa zakaremu puekou koa kiadama.

⁸ Ṉota kerukerueva vo Jisu Karisito, vo o saeveni voukale azo, vo Aikovakova Devita ko vikuvikula kale ala, vo o kaseivani Uri ama Bazu kale ko aṉa aqai bazubazutako.

⁹ Ni aṉako kai bazubazuto ko Uri ama Bazu kale avo inio aṉata tapata aqai eva ni aqai pirizia seini kale omadeuvo kala maba qavuna ko bazu o pazokani jari. Melai vo Baṉara ko bazu ta pui ko pirizia seini kale,

¹⁰ so sole aṉata a noqoiva pataito kiadama tapata kale tu a dauvemo vo Baṉara ko maba madu, tu seta ke kovo ko pakio ni noqola kama ṉaṉaidara Jisu Karisito kasi.

¹¹ Komi ta tuvevo ama rukuruku: “Anime lula me vouvani mela vo sate inio mata noqola saevo kale me jaevou vo sase.

¹² Animeta me bataitou tapata kale nio animeta me lekasa puovou vo sase. Animeta meda va zoliovou vo nio vo melai ota mela zoliovou anime.

¹³ Animeta pui kerula me elou melai vota kerula obeta eva, ako vota pui lipato o evani o ṉavi sole.”

Ṉota Baṉara oṉai zoleivani ṉa iruruputo ko maba eve

¹⁴ Mai kerukerue komi quli ṉoko lotu maba madu, ni ṉota balauvima se vo Baṉara ko ṉikale tu seta pui kekai zolizoliekinio ko pesio poso, ako kota pui ko tauveka ko maba melai kota koko niumaemako ikio seke viqani maba poso sole.

¹⁵ Ṉota madoeka tu ṉota matu korokoroti eve vo Baṉara ko kelokelozato kale. Ṉota ṉo qorotikou kai bazubazuto ko tuvevo ama Baṉara ko bazu tu ṉota kala iruruputo ko maba ṉa pui ṉo quratani ṉa ṉoko iruruputo kale ṉo elou.

¹⁶ So sole ṉota taka papariovi koa utube ama ni sarube ama pesipesi, ko vaṉa ko imako se maba poso vo Baṉara kasi azo.

¹⁷ Soama pesipesi ta omadeuvo ko dala potu tupu ko kuako jari ama ikio. Omuqa maba nioqa qokai bazutani ko soama pesipesi ta Hemeniasi ni Piletasi.

¹⁸ Nioqa inio qo ṉamukeni nioqa ko tuveano, ni lekuleku qo imani nioqa kake seke tuvevo putani seko oqu kale kai bazuto kale ko anime lotu maba mela ko mata saevo voukale azo ta lula kota ereiva kio ni pui kopa tova ereilou kio sama lipalipato kale.

¹⁹ Melai vo Baṉara ko maba poso ko vinavina kama vola vo Baṉara lula o erekema ta puliala o rovea vezokiko, ni ko topi ta ko rikiziake komia pesio: “Vo Baṉara ta omai nianiia o ṉaviko madu” ni “Se eṉe inio ko vo Baṉara ko maba madu ṉela kikelani ta ke lilizio ko ruqe ama iruruputo ko ereko kale azo.”

²⁰ Matuma pade poso kale ta ikoana azaazama lolulolu ni teamuteamu, kama ta siliva kale ko ereima ni kama ta qolo kale, kama ta ore kale ni kama ta miduku kale, nio kama koa lomaloma ta matumatuma ṉaniu poso kale kai iruruputo kaqe, kama ta kiadama taku kai iruruputo ko.

²¹ Voa lotu maba vo o saqaivani o ṉavi kiadama koa ruqe ama quli aṉa abe kasekako kale azo, ta kala maba qulepo ala vo Baṉara ovai iruruputo ala matuma quli kale, omadeuvo koa qolo ni siliva kama lomaloma jari, ako vota lula tabu ota eva vovo Lekasa ko iruruputo kaqe, ni lula o inainaiva tu vota o ereko kiadama uri ama iruruputo sole.

²² Ṉota taka soqoi se vaini amu ko ruqe ama kalo, se keka matu zariani ko pui ko korotako quli poso, ni vinaeka lulueko ko sidopu, ni oqu, ni roquano, ni bule, seke ilusivani vo Baṉara saqasaqa kama bulo samu sase.

²³ Melai taka papariovi koa utube ama ni sarube ama pesipesi, ako ṉota ṉoqai nianiia kota zolizoliekinio ni aivekinio sama ikio sole.

²⁴ Ako vo Lekasa vo nabulu ta pui o male tu vota o aivepato sole. Melai vota o baisemou kiadamu, uri ama ni paṉao sama nianiiekato kale,

²⁵ ni inobea sidopu puemo o elou seke pazokani voko nianiiekato. Sokale inio esa vo Baṉara ta o baisemou se tu seta ke lilizio ni kekai nianiio ko tuveano.

²⁶ Nio seta ke mamurou ni ke soqoilou vo Setani ko sipata kasi azo, vo erisaṉa o piriemani se ni o zuruzuruemani tu ke zoriko voko vatolo.