2 Tesalonaika 3 - BAṈARA KO VAIRU AMA LEVELEVEO

Ṉelati vararaitomo eṉe

¹ Ni eṉeko kaka ni visi poso mela, meta mata ṉelati vararaitomo eṉe, inio animevo Lekasa ko bazu ta ko aerou tu kota raura ko elou koko kovo kale, omadeuvo koko kavani me tona jari.

² Ni vararaitomo inio vo Baṉara ta o pakiemelou anime seke saruivani ni ruqe ama maba madu kasi azo, ako pui kiadamu inio ke tuvevo pueka koa bazu sole.

³ Melai animevo Lekasa Jisu ta me roveani vai keru sole vo inio o pizatimelou me ni o pakiemelou me vo Setani, voa Ruqe ala kasi azo.

⁴ Ni eṉeta ṉeqai zoleiva meko zukaido animevo Lekasa tona, ako eṉeta ṉe duvevo pueka ta meta mebeta ereka ko eṉe ṉe melai bazuekema quli tu me ereko sole, ni mata meta mebeta ziovou ereko ko.

⁵ Eṉeta ṉe vararaita tu vo Lekasa Jisu ta o melai nianiiekikou vo Baṉara o imelani roquemelo ni vo Karisito jaria pataito elo tapata me doraekou keru.

Mea kiada mela ta iruruputomo

⁶ Ṉe qaka ni visi poso mela, eṉeta ṉe bazuemela me vo Lekasa Jisu Karisito ṉikale tu meta tama papariomo se utu elo ke evani lotu maba poso se pui ke luluekani ko nianiiekato ko eṉe ṉe qatimelema me.

⁷ Me ṉavi ta meqai uria nianiia ta kota ko male tu me qalou eṉe ṉe qaevo jari. Ako eṉeta pui ṉeba kaikuape iruruputo sole so keru eṉe sai mekasi ṉe eve keru.

⁸ Ni eṉeta pui ṉeba utu koe kala kasi azo ko sailao, melai eṉeta ṉeda matu ti matu irurupute ipu ni ṉaniu, tu puliala me azo ta ṉamuzato saṉa ṉe ivo.

⁹ Eṉeta ṉeda roveo nio paseko ko tauvezato mekasi, melai meko lulupato ko tauveko kale avo eṉeta soa matu iruruputo ṉe eve tu meta me luluekou koa eṉeko kalo.

¹⁰ So keru eṉe ṉe eve keru mekasi, ta eri nio kiṉevevo mekasi, “Kala maba ta o lupaovou iruruputo ta vota pui o vuatou,” kiṉevevo.

¹¹ Eṉeta so kiṉela erisana, ako eṉeta ṉe viqa sole ta kake me azo ta lupalupa saevo elo kebeta eva ni edolomu ko iruruputo keta ma botebotea pueka.

¹² Sea maba poso soamu ta ṉe bazuema ni ṉemai titia vo Lekasa Jisu Karisito ko ṉikale tu ke saevo korokoroti ni inobe ama elo kale tu ke iruruputo ni ke kovo ko sailao ke ṉavi.

¹³ Melai me, a qaka ni visi poso mela, meta pui jairoko ereko ko uri ama quli.

¹⁴ Esa kala maba sai ta pui opa zorikou ko bazu ko eṉe ṉe joroekako mekasi komia riki kale. So tea, meta mevai nianiiovou pala inio voa maba, ni pui me vati lolopareovou, so inio vota o quratou.

¹⁵ Meta pui kala kana jari me ivou vo, melai meta kala visi jaria balauvivo emo.

¹⁶ Nio animevo Lekasa Jisu o ṉavi, vo bule ko raki, ta o katimelou me ko bule kiadama keve kale kiada keru. Ni aṉata a melati vararaita me tu vo Lekasa Jisu ta o elou mea kiada mela sase.

¹⁷ Komia supi ta a ṉaviko ṉase kale a rikieka ko eri: Roquano mekasi aṉa Paula lala kasi azo. Eria mamola pueko inio a ikani kiadama riki poso; ni eria rikieko inio a evani.

¹⁸ Aṉata a melati vararaita me, tu vo animevo Lekasa Jisu Karisito ko pakiezato sama roquano ta ko elou mea kiada mela tona.