2 Tesalonaika 1 - BAṈARA KO VAIRU AMA LEVELEVEO

¹ Aṉa Paula lala ta a rikieka komia leta, Sailasi ni Timoti sase, mea Tesalonaika peuru kale ama lotu qoqono mela kasi, vo Baṉara animevo Mama ko maba madu mela ni Lekasa Jisu Karisito ko maba madu mela kasi.

² Ni aṉata a mela vararaita me, tu vo Baṉara animevo Mama ni Lekasa Jisu Karisito ko roquano ni bule ta ko elou me tona.

Vo Baṉara ko titizato vo Karisito o vaitou keru ama

³ Ṉe visi poso ni ṉe qaka poso mela, eṉeta ṉe ilusiva vo Baṉara kiada keru mekale avo. Ni kota sidopu tu eṉeta ṉe ereko koa kalo ako meko vai oqu vo Baṉara ta kota rapuka sole ni meko roquekinio melai kobeta ola rapuko sole.

⁴ Sokale avo inio eṉeta ṉe rauraemela me Baṉara ko lotu qoqono poso kasi azaazama zaekale ke evani. Ko eṉe ṉe melai rouraekako me ta meko piza kama oqu ni meko pataito meko toraeko kale ko niumaniumato ni tapata poso.

⁵ Kiadama komi quli tamela kelo kale ta kasa ko ika vo Baṉara ko titizato ta sidopu ama, ni koko reketekete ta meta koko malea mela amaqeo voko aukale ama lekasa puo kale, ako erisaṉa meta tapata meqai toraeka sole meko elo voko lekasa puo kale.

⁶ Vo Baṉara ta o erekou ko sidopu ama quli, so sole vota o niumaemou seke niumaniumaemelani me,

⁷ ni vota o mela besitou meme niumaivani mela voko mamazo kale, ni so jari eṉe. Vota o erekou ko quli so keru vo Lekasa Jisu o puratou keru aukale azo voko piza kama mateana madu sase,

⁸ ni uza ko urusana kale. Nio vota o koqotaemou se keta va lupaovani vo Baṉara ni se pui ke zorikani ko Uri ama Bazu vo animevo Lekasa Jisu Karisito ko.

⁹ Seko koqotailo ta noqola kama tolailo ni pitasio animevo Lekasa ko tanama kale azo, ni voko pizato sama ṉaṉaidara kale azo.

¹⁰ Ni vo Baṉara ta o erekou koa sidopu ama titizato so keru vo Lekasa Jisu o vaitou keru ni vota ṉaṉaidara o elou kiadama voko maba poso ko sidopu ama saevo kale, ni o raurailou seke tuvevo putani ko saevo kale. Me melai me zomanou se sate, ako meta me duvevo pueka sole koa bazu ko eṉe ṉe qasekema mekasi.

¹¹ Sokale avo inio eṉeta ṉe melati vararaita me kiada keru. Eṉeta ṉe baseva vo animevo Baṉara tu meta me malezikou koa reketekete vo o melati nokaekema, ni vota o katimelou ko pizato tu uri ama kalo saṉa me elou ni uri ama iruruputo me erekou omadeuvo me meqa zariani jari. Meko tuvevo puevo animevo Lekasa Jisu kale avo inio meta meqa zariani mela koa uri ama kalo ni iruruputo.

¹² Eṉeta soa vararaito ṉe eva tu animevo Lekasa Jisu ko ṉi ta ko raurailou mekasi, ni me melai o rauraemelou. Ni vo animevo Baṉara ni vo Lekasa Jisu Karisito ko roquano kale avo inio kota so ko kalou.