2 Pita 3 - BAṈARA KO VAIRU AMA LEVELEVEO

Jisu ta ota tova vaitou

¹ A roquemelani baerebaere poso mela, komi kio aṉako omuqama riki a rikiekako mekasi. Aṉata a rikieka komia omuqa riki tu a zaubarimelo me tu meta sidopu me elou meko kerukeru kale.

² Ni aṉata a mela zaria me tu meta me qerukeruekou koa rukuruku poso se tabu ama poropita madu kekai bazutema lulavo ni koa bazu animevo Pakio Lekasa Jisu o vaekema, ni eṉe apositolo madu ṉela ṉe qatimelema.

³ Ni matu qulepo ama quli tu meta meqai nianiiovou ko quli ko ereilo ama quli tovama taku kale. Se maba poso ta ke melai niureovou me ni seta kebeta erekatou ko ruqeruqe ama kalo seko tupu ko zario ko lulueko kale.

⁴ Ni seta ke melai balebaleitou ni eri mela kikevou, “Jisu ta leveleveo o vaeke tu vota mata o vaitou, kio? Ta lai nio vo? Ako animeko mama poso ta lula keta vovi melai koa omadeuvo ti kobeta kava sole komia peuru ma peuru ko erei keru azo!” kikevou.

⁵ Melai seta pui kekai zaria kerukerueko ko quli ko ereima quli ko tanitanila kale. Vo Baṉara ta o pesio kale inio o erekake ko au ni miduku. Vota o puratikake ko tabarioma miduku jukale azo koa vimama ni topi ama ju ko tiania.

⁶ Sai kazo inio ko ju ko nioqololo ikio ko duluekake ko so keru ama peuru ma peuru.

⁷ Ni koa omadeuma vo Baṉara ko pesio kio ko kati vaila ko erisaṉama au ni peuru ma peuru, anime mebe kai evako. Ni komia omuqa quli ta kobeta taruana tu ko siqailou uza kale. Ni kota kobeta taruanou ti kobeta barolou se Baṉara kevai keduani maba poso ke titiziovou keru ti ke ṉamuilou keru heli kale.

⁸ Melai a roquemelani mela lolo poso, meta pui ukaka me ikou komi quli, ko omadeu ṉaniu ta omadeu vuro sabere jari, ni omadeu vuro sabere ta omadeu ṉaniu jari vo Baṉara kasi.

⁹ Sole pui kerukerueko ko vo Baṉara ta o ubaitani ereko voko leveleveo, kake kikelani jari. Ako pui so inio o kavani melai vota o vanonoriemela me, ako vota pui okai zaria tu kala ta o mumailou sole, melai vota okai zaria kiada mela ta me liliziovou meko ruqe kale azo sole.

¹⁰ Melai vo Baṉara ko ṉaniu vo Lekasa Jisu oka vaito ama ta kala maba o kuilani ko kilo jari nio ko elou. Ni koa ṉaniu kale inio ko au ta kota parakou matuma tibaraputo kale, ni kiadama quli aukale ama ta ko niaqariovou uza kale. Ni miduku ni kiadama quli saizama ta kota siqailou.

¹¹ So inio kiadama quli ta kota ruvurou, so sole meta noni ama maba poso mela inio me elou? Meta me jaevou tabutabuo ko saevo kale ni meva iruruputou vo Baṉara.

¹² Koa keve kale inio meta me darekou vo Baṉara ko matuma ṉaniu meko tauveko kale koko barolo. So keru koa ṉaniu ko barolou keru ko au ta kota ruvurou uza kale ni kiadama quli aukale ama ta kota jojoṉou uza ko vualavuala kale.

¹³ Melai animeta me dareka vo Baṉara leveleveo o ikema, koa vairu ama au ni vairu ama miduku se sidopu ama maba poso ke eloa koi.

¹⁴ So sole lolo poso, me darekou keru koa ṉaniu ta matu madoekomo tu bulebule ni sarueko pide emo vo Baṉara ko vilu kasa ni vati odouvikiniomo vo Baṉara.

¹⁵ Ni kerukeruekomo komi ta animeta me bakiovou ako animevo Baṉara ta o vanonoriemela sole anime. Animevo baerebaere Paula melai o melai bazueke me koa omadeuma quli so keru vo o mela rikite keru voko nianiio sama riki kale.

¹⁶ Ni so inio kiovevo kiadama voko riki poso kale. Kama voko riki ta matu tapata kama ni kake maba poso udo amu ni lekuleku amu seko oqu kale ta sarusarua mati nianiiekiko ke eva, kebe mati ikani kiadama Tabu ama Riki poso. Melai so ke kavani ta ke kati kueva inio ke ṉaviko noqola tolailo.

¹⁷ Melai me, a lolo poso mela, ta lula meqai nianiiani mela komi quli sole meta balauvomo. Ni pui zariemo se ruqe ama maba madu tu ke odiemelo me tu meqai zomano seke erekako ruqe ama kalo. Ni vailomo nio meta pui lekuleku me elou meko piza kama oqu kale azo.

¹⁸ Melai pizatomo animevo Pakio Lekasa Jisu Karisito ko pakiezato sama roquano ni voko vai nianiio kale. Ako voko ikio koa ṉaṉaidara sole komia ṉaniu ni ka ṉaniu! Emeni.