2 Pita 2 - BAṈARA KO VAIRU AMA LEVELEVEO

Se lipalipa kama nianiiekato ko maba madu

¹ Lulavo se lipalipa kama poropita madu ta ke purate vo Baṉara ko maba madu ko tiania. Ni so jari nio se lipalipa kama nianiiekato ko maba poso ta ke puratou meko tiania, ni seta ke kati kilou moizavole kubo lipalipa kama bazubazu koko niumaemelo ama me. Ni seta keta vai zoliovou melai vo Jisu vo o tabarikeni seko rupasio seko sarueko ko piri kale azo, ni so inio seta ke oruṉikou seko tapata ni vo Baṉara ta kapiavole o niumaemou se.

² Ni matu kubo madu ta ke luluekou seko ruqe ama kalo ni Sokale avo inio maba poso ta ke ruqe kasekou tuveano ko keve.

³ Ako nia lipalipa kama nianiiekato ko maba madu ta keta mela zaria pala inio sole meko takula. Nio seta ke lipalipaemela pui tuvevo ama bazu kale. Melai Baṉara ta lula omai kuirika se. Ni seta pui kepa tava lapasou vo o niumaemo ala se.

⁴ Ako Baṉara ta pui opa utu zarieme se mateana madu boutare ke erekeni, melai vota o soroeme se heli kale ni sai nio seta piripiri amu kutumana kale ke tarekani titizato ko ṉaniu.

⁵ Ako vo Baṉara ta koqo o imake sole se ruqe ama maba madu lulavo vo o soroeke keru ko nioqololo peuru ma peuru ama maba madu kasi se pui kepa zoriveni. Melai Noa, vo okai bazubazuteni ko sidopu, ni sikeura madu vokale amu inio Baṉara ta o pakiemake.

⁶ Ni so jari Baṉara ta mata o koqotaekake omuqa ruqe ama matu peuru Sodomo ni Qomora. Vota o siqaekake koa omuqa peuru ni pari kota evake, pulia quli ko loivake. Vota o erekake komi quli tu mamola kaqe ko elo, tu so inio ke elou se maba poso seke vati pikipikinio puto amu vo Baṉara.

⁷ Melai Baṉara ta o pakievake vo Lote koa omuqa matu peuru kale azo. Ako voa sidopu ala maba Lote ta duki oka evake sea ruqe ama maba poso ko olavo puto sama saevo sole.

⁸ Ako Lote ta kala uri ala maba, melai vota o saevake sea ruqe ama maba madu sate kiadama taku Sodomo ni Qomora peuru kale. Ni vota duki ota eve voko sidopu ama bulo kale, so keru o kea keru ni o viqa keru seko ruqe ama kalo.

⁹ So sole kiadama ko quli poso kale animeta me rovea paqumuko vo Baṉara ta o bokaovani pakiemo se vo keva nabuluputani. Ni vota o pakiemou tapata keru. Melai vota o noqoemou se ruqe ama maba poso ni koqo o imou se kebe tarekou keru voko titizato ko ṉaniu.

¹⁰ Ni koa koqotato ta matuvole komai barolou se ruqe ama kalo kebeta erekatani, se ke ṉaviko ruqe ama tupu ko zario ke luluekani maba poso, ni se kekai kaikuapani vo Baṉara ko bazu. Nia lipalipa kama nianiiekato ko maba poso ta ke ereka ke ṉavi keka zariako quli ereko ni kekai aikaiva koa kalo. Ni seta pui ke ṉava ruqe kasemo se aukale ama mateana madu.

¹¹ Nio sea mateana madu ta raura kamu ni matu piza kamu sea lipalipa kama nianiiekato ko maba poso azo. Melai seta pui kemai kuirika kama quli ni pui ke ruqe kasema Baṉara kasi.

¹² Ako nia maba poso ta ke ruqe pesia seko pui nianiio kale, ni seko kalo ta ko vaerako biaṉa kerukeru pide ama ko kalo jari, koa biaṉa koko alila tu ko sipatio ni ko vou kaqe pala. Ni koa piru ama biaṉa jaria vouvaemo inio ke elo avo se lipalipa kama nianiiekato ko maba poso.

¹³ Ako se inio ke tolaemeni matu kubo maba madu, sole ke ṉavi melai ke tolailou ni ko ikio koko reketekete seke erekako kalo ko. Ako seta kekai zoleiva ereko ruqe ama quli ubutiania, ni seta kaqa ke imela me ṉavi Baṉara ko vilu kasa so keru padoilo vuato me eva keru se sase.

¹⁴ Ni kiadama taku seke kea keru ko reko seta viluloqu kekai eva. Seko ka zario ereko ko boutare ta pui ko korotima, ni seta ke aveavema lekuleku ama maba poso boutare ko sipata kale. Ni seta kekai matu nianiiani tu seta ke muino. Melai Baṉara ta o koqotaemou sea maba poso.

¹⁵ Nia lipalipa kama nianiiekato ko maba madu ta ke vaeke sidopu ama keve ni keta mumai. Seta ke luluekake koa keve Beilami vo Beo vo meqora o luluekema keve jari ama, vo o roquekeni kovo ko takula tu o ereko ko ruqe.

¹⁶ Ni vo doqi ta biaṉa inio pui o pesiani melai vo inio maba jaria pesio ota evake ni ovai bazuekake Beilami ko sarueko ni ota va dokolikake voko sarube ama vatolo.

¹⁷ Nia lipalipa kama nianiiekato ko maba poso ta omadeuvo tabarioma sukuru jari amu ni ko lei jari amu, koko puzekako ururu kale ni ko alokata pala, ako puliala ta ota ma koa uri ama quli. Sole vo Baṉara ta lula oma inainaeke seko zae pata kutumana kama.

¹⁸ Seta kekai aikaivani seko kalo pide ama rauraraurailo ni ruqe ama tupu ko zario kale inio seta ke aveavema maba poso sarueko ko sipata kale. Ni koa kalo kale inio seta ke ubeubema maba poso se kebe liliziani ruqe ama maba poso ke kavani kasi azo.

¹⁹ Ni seta leveleveo ke mati ika ko rupasio melai ke ṉavi ta pui ke rupasia ko quli koko niumaemo ama quli kasi azo, ako vo maba ta mabaku oka eva sole ko quli vo o lekasa puekako quli voko saevo kale.

²⁰ Ako seta ke rupasiovi komia peuru ma peuru ko ruqe kale azo seko vai nianiio kale vo animevo Pakio Lekasa Jisu Karisito. Melai seta mata ke vaitake seko ruqe kale ni koa ruqe ta ko aveavema se, sole seta matu ruqe keta eva kobe kai paloasa seko kuleto ama ruqe.

²¹ Pui kepa kai nianiiovi ko sidopu ko keve tea uri. Melai kekai nianiiovi saita inio ke vaeke ko tabu ama bazu koko katiziovima sekasi ta maba pui uri sole.

²² Ako seke erekako kalo ta voa nianiiekato sala bazu kiolani jari, ko eri, “Vo siele ta o kua o ṉaviko sakosako,” ni “Vo bolo o uria siuvani ta mata ota niabea koa niabeniabe kale,” kiolani. So jari nio seko tovama tapata ta kobe kai paloasa koa lulama.