2 Koriniti 9 - BAṈARA KO VAIRU AMA LEVELEVEO

Sea lotu maba poso Jiudia ke eveni ko tauvemo

¹ Pui koko maba male ikio tu aṉata a dova rikieko mata mekasi koa tauvezato ko kio ni kalo koko soroilo ama vo Baṉara ko maba madu kasi se Jiudia peuru poso kale ke evani ozaoza kamu kasi.

² Ako aṉata lula aqai nianiia ta meta meqa zaria tu tauvezato sole, ni aṉata lula a rauraemela me se Masedonia peuru poso kale amu kasi. Aṉata eri kiave, “Animeko lotu baerebaere poso se Akaia peuru poso kale ke evani ta lula ke inainaova tu ke tauvezato ko olalama sabere keru azo,” kiave. Meko dikidau ta ko zaubarima sea kubo madu tu ke luluemelo me.

³ Erisaṉa aṉata a joroema nia zouke animeko lotu baerebaere poso vima sase, tu eṉeko rauraemelo me ta pui pesio kale ama pala ko elou. Melai so lula aṉa kialani jari nio meta me inainaovou tu meta me dauvezatou.

⁴ Ako kake Masedonia azo aṉa ke luluelo amu ta ke mela lelou me ta pui inaina kamela ta, eṉeta ṉeda quratou inio, ni meko qurato ta palopaloasi ama ikio kota elo, ako lula ṉe matu tuvevo puemela ni ṉe rauraemela me sole!

⁵ So sole aṉako kerukeru kale ta matu uri kio tu sea zouke animeko lotu baerebaere poso ta kuleto kebeta baro mekasi aṉa puliako baro tu meta me uria padoekou meko katizato poso ko lula me qasekako ta me ereko ka kimelako. So inio kota lula inaina kama ko elou aṉako barolo keru sai, ni meko katizato ta kasa ko elou meko zario sate ama, pui kama zuruzuruto kale ama quli.

⁶ Kerukeruekomo ko eri, voa maba vo o papakani silo pala rui ta o ṉeamukou silo pala epa; melai vo o papakani kubo rui ta matuma ṉeamuzato sala epa kale.

⁷ So sole meta azaaza katizato me elou me ṉaviṉavi ko bulo poso kale ama pitoto kale, pui omuqa kerukeru kale ni kama zuruzuruto kale kude; ako vo Baṉara ta o roqueva voa maba vo zoleilo kale o katizatani sole.

⁸ Ako vo Baṉara ta o roveovou katimelo me voko matu kubo mauruto, so inio meta me qovou kiada keru ko meme male ama quli tu me ṉavi kaqe ni koko topi tiniavo tu kiadama meko uri ama iruruputo kaqe.

⁹ Omadeuvo ko Tabu ama Riki va kikolani soala maba, “Vota puaropuaro o katimake se olaquamu; so inio voko sidopu ama baiseo ta noqola kerukeruilo ko elou,” kikolako.

¹⁰ Ni vo Baṉara, vo o puarikani ko rui tu ko papailo ni sailao tu ko vuazailo, vo inio o mela puarikou meko batiro ko rui ni vota o qotupikou ko ni o variekou ni o velokikou meko matuma puaropuaro sama iruruputo kale.

¹¹ Vota masuru o imelou me kiada keru tu meta puaropuaro me elou kiadama taku, tu kubo madu ta ke kasekou seko uriavo meko katizato poso kale ko seke kovo ama eṉe ṉe qatimou keru se.

¹² Ako komia roquano sama iruruputo ko meme erekako ta pui vo Baṉara ko maba poso ko tapata ko kiada ikio meba korotiko ama, melai meta me buratikou mata sea kubo maba poso ko uriavo sama vararaito vo Baṉara kasi.

¹³ Ako komia iruruputo ko meme erekako ta koma puratika meko roquano ko tuveano, so inio sea kubo madu ta ke ṉaṉaidara puevou vo Baṉara meko uria lulueko kale vo Karisito ko Uri ama Bazu meko iruruputo kale ni pui meko pesio kale pala. Ni seta keva ilusikou vo meko puaropuaro elo sekasi ni so jari edolomu kasi.

¹⁴ Nio seko roquano sama bulo sate seta ke tauvemelou me seko vararaito kale, ako vo Baṉara ko naiza kama ni baiseo sama roquano ta kasa ko eva mekale sole.

¹⁵ Animeta mevai rauraeko vo Baṉara voko palopaloasi ama katizato!