2 Koriniti 7 - BAṈARA KO VAIRU AMA LEVELEVEO

¹ A lolo poso mela, ta vo Baṉara ta lula leveleveo o mela ika anime ta vota animevo Mama ni vota anime sate o elou. So sole erisaṉa animeta me epezou ereko kiadama ruqe ko anime kaqa ko imelako vo Baṉara ko vilu kasa, ni animeta tuvevoa tabu me elou animeko tava paṉao kale vo Baṉara.

Paula ko zoleilo

² Roqueṉelomo eṉe. Ako puliala kala pado me azo inio eṉe ṉe jarueveni ni puliala kala inio ṉe niumaeveni eṉe ma ṉe ubeubeveni.

³ Pui me kama kuiripato saṉa imelo kaqe inio aṉata a qaseka komi quli ako lula melati kiavevo inio, eṉeko roquemelo me ta pui kopa paitou animeko saevo ni vou keru.

⁴ Aṉata tuvevo a imela me, ni a rauraivani lala mekale avo. Kiadama eṉeko tapata poso kale aṉata zuvazuvaria lala; ni aṉata a dalia zoleilo sase.

⁵ Lula ṉebeta baroa sai koa Masedonia peuru poso kale melai eṉeta puliama mamazo ṉeba koe, ako koa kiadakoi ta kubo tapata sole, kake ta ke ṉelati aivekinie eṉe, ni eṉeta ṉeda ṉake.

⁶ Melai vo Baṉara vo o zuvarimani se duki ama bulo samu, vo inio o zuvariṉelake eṉe vo Taitasi ko barolo kale.

⁷ Pui voko kilo ko kiada ikio ko zoleṉelema eṉe, melai voko kai bazuto meko zuvarivo vo ikio mata ko zoleṉele eṉe. Ako vota o ṉelai bazuekake eṉe meko lai zario lelo aṉa, ni meko duki eloa elo, ni meko lai keru, ni meko kerukeruelo aṉa, Sokale avo inio aṉako zoleilo ta kobeta rapuka.

⁸ Ako koa aṉako leta ta duki ko imele me, nio ada roveo nio duki kai elo ko so, melai aṉata pui duki ko ila aṉako rikieko ko. Ako kota duki ko imele puju ama taku kale,

⁹ melai meko duki kio ko besieke kama meko kalo poso, so sole aṉata aqai zoleiva aṉako rikieko koa leta. Koa duki ta o ṉavi Baṉara o erekema ikio, so inio eṉeta puliama tapata ṉeba melai ike me.

¹⁰ Ako koa duki vo Baṉara o erekako ikio ko besiekako meko bulo ni ko odiemelako pakio kale, ni meta pui upotuqu meba kai elou koa duki vo Baṉara o melai pakiekako me! Melai vo pui o tuvevo putani maba ko duki ta pui ko besieka voko bulo ni kota ko odieva vo noqola kama tolailo kale.

¹¹ Kemo vo Baṉara lula o erekako quli meko komia duki kale! Ako kota lula ko pizatimela me, ni dikidau ko imela tu me duvevo pueko meko sidopu, ni meko taka ṉalo ko sarueko! Koa meko duki ta kasa ko ika ta meta pui me jaruiva ni meta me roquela aṉa, ni meta meqa zaria pizatilo aṉa, ni koqo ivo vo o saruekeni aṉa kasi! Meta lula kasa meda eva meko bulo ko besizio kale ta meta kuiripato pidea mela koa tapata kale.

¹² So sole, aṉako mela rikieko koa lulama riki ta pui vo lula o saruekani kale avo ko kiada ni mata pui vo o sarueveni kale avo ko kiada inio! Melai aṉata a rikiekake ko tu vo Baṉara ta o mela kaseko me meko roqueṉelo eṉe.

¹³ Ko ikio eṉe ko zuvariṉelako. Ni eṉeko zuvario ko topi tiniavo ikio mata vo Taitasi ko zoleilo ta ko matu zoleṉelake eṉe. Ako vota o ṉelai bazuekake ko mea kiada mela ta me zuvarivake vo sole.

¹⁴ Aṉata lula a bazueve aṉako melai raurailo me, ni meko sidopu ama kalo ta kasa ko ike ko aṉa a qasekema mekale avo ta tuvevo kota eva! Eṉeta ṉe qaseka ko tuveano mekasi kiada keru, ni so jari inio koa aṉako melai raurailo me Taitasi kasi ta tuvevo kota eva.

¹⁵ So inio voko roquemelo me ta kobeta pizata, ako vota o kerukerueka mea kiada mela ko dikidauputole lulueko voko bazu, ni meko baroekivo vo meko paṉao ni zarazarailo kale.

¹⁶ So sole aṉata ada matu zoleiva, ako erisaṉa ta aṉata ada rovea melai keru me kiadama quli kale sole!