2 Koriniti 5 - BAṈARA KO VAIRU AMA LEVELEVEO

¹ Ako eṉeko tupu komia miduku kale ama ta omadeuvo kama tepe pade ko eṉe puju ama taku kale ṉeqai evako jari. Ni eṉeta ṉeqai nianiia komia tepe pade eṉe ṉeqai evako ko rotiziovou keru ta vo Baṉara ta o katiṉelou eṉe ko paito pide ama saevo ko tupu o ṉavi o ereko ama, ni kota eṉeko noqola kama pade jari aukale ama peuru kale.

² Ni komia miduku kale eṉeta matu viluloqu ṉeqai eva tu kovo eṉeko aukale ama tupu.

³ Eṉeta ṉeqa zaria kovo ko aukale ama tupu tu pui tupu pidea ṉela ṉeba elou.

⁴ So keru eṉe ṉe eva keru komia miduku kale ama tepe pade kale, ta voniu kozato ko iṉela ko eṉeko duki; eṉeta pui ṉeqa zariako ikio ṉamuko eṉeko miduku kale ama tupu, melai ko eṉe ṉeqa zariako ta ṉe qovo ko aukale ama tupu, tu ko paito pidea saevoma tupu ta ko besiekou eṉeko tupu koko sapeovo ama.

⁵ Vo Baṉara nio vo lula o inainaeṉelani eṉe koa besizio eṉe ṉe elo avo kale, ni vo inio lula o katiṉelani eṉe voko Auvana omadeuvo koko mamola jari koko tuvevo pueko ama voko ṉela besieko eṉeko tupu.

⁶ So sole eṉeta ṉebeta parani puta kiada keru. Eṉeta ṉeqai nianiia so keru eṉe ṉeqai saeva keru eṉeko miduku kale ama tupu, eṉeta vaṉa ṉebeta eva animevo Lekasa ko ṉisa peuru kasi azo.

⁷ Melai komia miduku kale eṉeta ṉeda saeva oqu kale ni pui eṉe ṉe qeako quli kale.

⁸ Eṉeta ṉeda matu parani puta, ni kota matu uri eṉe kasi tu ṉe vaeko eṉeko miduku kale ama tupu tu eṉeta ṉe elo vo Lekasa sase voko pade kale.

⁹ So inio kiadama quli kale azo, eṉeta ṉeqa zaria tu zolevo vo so keru ṉeqai saeva keru eṉeko koi zama tupu ma sai zama tupu melai.

¹⁰ Ako animea kiada mela ta kasa me elou vo Karisito ko tanama kale, vo o titizatou keru, tu kalakala me ṉavi ta meda ka kovou animeko miduku kale ama iruruputo ko tabara. Animeta meda ka kovou ko uri ama iruruputo ko malezikako reketekete ni meda ka kovou ko ruqe ama iruruputo ko malezikako vaitotola.

Baerebaereo Baṉara kasi Karisito ko mela voukale

¹¹ So inio koa titizato ko ṉaniu ko kerukerueko kale ta eṉe melai ṉe baqumuka animevo Lekasa tava paṉao ko kalo, Sokale inio eṉeta ṉe madoeka tu mai tuvevo pueko eṉeko sidopu ama vatolo se maba poso. Vo Baṉara ta okai uria nianiia eṉeko uri ama vatolo, nio aṉako zario ta me melai so padoa nianiio me ṉelai elou eṉe meko kerukeru kale.

¹² Eṉeko so kio ta pui ṉe madoeka tu rauraraurailo ṉe ṉavi mekasi melai eṉeta ṉe qatimela me koko raki tu ṉela zoleimo eṉe, so inio meta me roveovou opatimo se maba poso se keka zoleivani ko maba ko topia uri pala, se pui ke kerukeruekani ko maba ko saevo ni kalo.

¹³ Eṉeta ṉe jarube putani ṉela kimela, melai koko tuveano ta eṉeta ṉeva nabuluputani ṉela vo Baṉara. Eṉeta piza kama kerukeru saṉela, ni kota meko tauvemelo kaqe.

¹⁴ Eṉeta ṉe matu iruruputa ako vo Karisito ta o matu roqueṉela eṉe sole, ako eṉeta ṉeqai nianiia ta voa omadeu pado maba inio oma vovi kiadama maba madu ni animea kiada mela ta omadeuvo meqai zomane jari voko voukale, ni omadeuvo vo voula maba jari vo pui opa ereko ala ko sarueko, animeta me male tu pui mata ereko ko sarueko.

¹⁵ Vota o vovi kiadamu kaqe tu kiadamu seke koani ko saevo vo o puarikako ta ke epezou saevo ke ṉaviko zario kaqe, melai vo kaqe inio seta ke saevou, vo lula oma vovini ni mata oma tova saevani voukale azo.

¹⁶ Sokale avo inio eṉeta pui mata ṉeba tova podetimou se maba poso komia peuru ma peuru ko podepodeti kale. Omadeuvo vo Karisito ṉe ivevo jaria podetivo komia peuru ma peuru ko podepodeti kale lulavo, melai erisaṉa ta pui soa kerukeruevo ṉe eva.

¹⁷ So keru kala maba omadeu o vati eva keru vo Karisito inio vota kala pado vairu ala maba o eva; ko tana kama saevo ta kota paloasa, ni vairu ama saevo ta ko besieka.

¹⁸ Koa kiadama ta vo Baṉara ko iruruputo, vo o ṉelati odouveni eṉe voko kana madu ṉela ni voko baerebaere poso o iṉeleni eṉe, ni o katiṉeleni ko koidi tu mata kake ta voko baerebaere poso ṉe imo.

¹⁹ Koa eṉeko koidi ta kai bazubazuto ta vo Baṉara ta pui omai vaitoeka se maba poso ko sarueko poso ko vaitotola, ni vota lula o katiṉela eṉea apositolo ṉela koa bazu voko ka zario mati odouvikinio sea kiadama maba poso seko omadeu vati elo vo Karisito kale ko sama.

²⁰ So inio eṉeta vo Karisito o soroeṉeleni ṉela, eṉe ṉevai bazutani ṉela vo, omadeuvo eṉeko bauta kale inio obe pasepasemela vo Baṉara eṉe kale kude. So sole eṉeta ṉe mela titia me vo Karisito ko ṉikale, tu meta vo Baṉara ko baerebaere poso emo voko kanaekivo kale azo!

²¹ Ako vo Karisito ta sarueko pide ala melai animeko pakiemelo kaqe inio vo Baṉara ta animevo sarueko ko besibesi o ivake vo tu animeta omadeu me elo vo tona ni me qovou vo Baṉara o puarikako sidopu.