2 Koriniti 3 - BAṈARA KO VAIRU AMA LEVELEVEO

Vairu ama leveleveo ko nabulu poso

¹ Soama pesio poso kale ta eṉeta lula ṉe danie rauraraurailo mata ṉe ṉavi eṉe kio? Pui! Kake maba poso ta ke paseka ko leta poso mekasi azo tu ke kati zio edoloma lotu qoqono kasi. Koa leta poso ta ko kaseka meko mai zoleilo sea maba poso. Melai eṉeta pui ṉeba pasekou soama leta mekasi azo, ni mata pui ṉeba pasekou soama leta edolomu kasi azo tu ṉe qatimelou me.

^2-3 Ko leta poso ta ko rikizia pepa topi iqi kale, ni Mosese ko Bazu ta ko rikiziovi lado topi tu maba poso ta ke tiromikou ko. Melai vo saevola Baṉara ko Auvana ikio ko besiekema meko saevo eṉe ṉe melai bazueve keru vo Karisito nio maba poso ta keta mela kea meko saevo ko besizio ni so inio seta ke ṉelai zoleiva eṉe. Sokale avo inio eṉeta pui ṉeqa zaria kama leta poso.

⁴ Eṉeta ṉe rovea kaseko vo Karisito ko ṉikale ko meko saevo ko besizio ta kasa ko ika vo Baṉara ko soroeṉelo eṉe tu ṉevai bazubazuto.

⁵ Eṉeta pui ṉe qaseka ko eṉeta ṉe rovea ereko komia iruruputo ṉe ṉaviko pizato kale. Melai eṉeko bokao ta ko kueva vo Baṉara kasi azo.

⁶ Vo inio bokao saṉa o iṉela tu ṉeva nabuluputo vo eṉeko kai bazuto kale voko vaini ama leveleveo. Komia vairu ama leveleveo kale animeta pui me zorika kama bazu koko rikiziako, melai kota Baṉara ko Auvana kio me zorika. Koa lula ko rikiziovima Bazu ta ko kati kueva ko vou, melai vo Baṉara ko Auvana ta ko puarika ko noqola kama saevo.

⁷ Vo Baṉara ta o rikieke koa Bazu ko pesio poso lesa lado topi ni o kativake vo Mosese. Ni vo Baṉara ko ṉaṉaidara ta ko puratake so keru koa Bazu ko katiziovi keru, ti vo Mosese ko loilo topi melai kota kapikapitake. Kota matu simanamana kama sole se Izireli amu ta pui keta va toiritoirikake voko loilo. Melai koa simanamana ta pui tu ko keuvake. Nio koa vou sama Bazu ta ko kuevi koa ṉaṉaidara sase,

⁸ melai kobe qulepako ṉaṉaidara ta Baṉara ko Auvana ko leveleveo kale ama!

⁹ Koa lulama leveleveo ta ko kati kuevi ko kuiripato melai kota ṉaṉaidara sama, so sole ko vairu ama leveleveo Baṉara ko sidopu puto sama ko ṉaṉaidara ta kota ikiria!

¹⁰ Ni ko erisaṉama ṉaṉaidara ta kokai matu paloasa koa lulama ṉaṉaidara, ti koa lulama ta maba pulia quli jaria kelo kota eva.

¹¹ Ako koa puju ama taku kale ama leveleveo ta ṉaṉaidara kale kota kuevi. Melai ko vairu ama leveleveo ta palopaloasi ama koko ṉaṉaidara ako kota noqola kota elou sole!

¹² Ko ikio eṉe ṉeqai keruako leveleveo, ni Sokale avole inio eṉeta matu parani putole ṉeqai bazuta.

¹³ So inio eṉeta pui Mosese jari ṉe qavani ṉela. Ako vota o bouluke voko loilo suma kale nio se Izireli amu ta pui kepa taka keve koa simanamana puto ko parapara elo ni koko paitopaito voko loilo topi ama.

¹⁴ Melai seko kerukeru ta kota ma tibuliake. Ni kobe kai baroa komia taku kale melai kama quli ta kobe tama tizaeka seko kerukeru kiada keru seke tiromika keru lulama leveleveo ko Buka, omadeuvo koa suma ta ko bouluke vo Mosese ko loilo jari. Seta pui nio ke paqumuka ko vairu ama leveleveo, ako se pui nio omadeu ke vati evani vo Karisito ta pui ke rovea paqumuko ko sole.

¹⁵ Kiada keru ti kobeta baroa komia ṉaniu, so keru seke tiromika keru Mosese ko Bazu ko Buka inio koa suma jari ama ta kobeta eva tama bouluko ni tizaeko seko kerukeru poso.

¹⁶ Melai so keru seke lilitou keru vo Lekasa Jisu kasi seta ke paqumukou ko vairu ama leveleveo, omadeuvo Mosese kota va bazutani jari ko Tabu ama Riki: “So keru Mosese o vaite keru tu o vati pesio vo Lekasa Baṉara tepe pade kale vota o ivikake koa suma voko loilo topi ama,” kikolani.

¹⁷ Zio nio “Lekasa Baṉara” kio komia tiromo kobu kale ta vo Lekasa Jisu kio kio ko so, vo o soroevani vovo Tabu ala Auvana, ni kala maba vo animevo Lekasa vo Tabu ala Auvana sala ta lula ota rupasia koa lulama leveleveo ko lulueko kale azo.

¹⁸ Nio animea kiada mela ta me qasa puekani mela koa vo Lekasa ko ṉaṉaidara omadeuvo Mosese pui bouluboulu ama loilo sala keru jari, ni koa omadeuma ṉaṉaidara ta kobeta ola besiemelo anime. So inio animeta mebeta ola besizio ni koa ṉaṉaidara ta kobeta ola matu elo ni vo jari ko imela anime. Ako koa ṉaṉaidara ta koko kuevako vo Lekasa kasi azo, vo o soroevani vo Tabu ala Auvana sole.