2 Koriniti 2 - BAṈARA KO VAIRU AMA LEVELEVEO

¹ Sokale aṉata lula a bitoeka a ṉavi tu aṉata pui a dova vaitou tu mata duki imelole me.

² Ako aṉata duki a imelou me tea, meta pui meba roveovou zolelo aṉa, ako meta lula duki a imela sole.

³ Sokale avole inio aṉata soa rikieko a eve koa leta mekasi. Aṉata pui aba ka zariovini lala inio tu kilo tu duki a melai elo me, ako meta me male tu zolelo aṉa ni pui duki ilo sole. Ako aṉata aqai nianiia ta aṉa a zoleilou keru ta me melai me zoleilou.

⁴ Aṉako matuma tapata ni upotuqu ni kubo deumu sate aṉata a rikiekake koa leta mekasi, tu pui aṉako duki imelo kaqe me, melai meko paqumuko kaqe ko aṉako matuma roquemelo me kio kale avo.

Tava akoeko ko sarueko kala o saruekani

⁵ Zio, nio esa kala maba ta dukiavo o kae, pui a qiada kasi inio so o kae melai vota so o kae mea kiada mela kasi, ma kubo mela kasi. Aṉata a qaseka komi quli tu koa kuiripato ta pui ko ikiriovou vo tona.

⁶ Koko male ikio vo nea maba ko lula so mea kubo mela me ivania koqotaevo vo.

⁷ So sole erisaṉa ta koko male ikio ko me tu tava akoeko voko sarueko ni zuvarivo vo, tu pakievo vo koa voko matu duki elo kale azo.

⁸ Ni aṉata a basemela me tu kasa ikomo vokasi meko roquevo vo.

⁹ Aṉata a rikitake mekasi ako aṉata aqa zaria tu paqumumelo me zorilo aṉa kiadama aṉako bazu kale.

¹⁰ So keru me meda va akoeka keru kala maba ko vo o erekako sarueko, aṉa melai akoekato saṉa a iva vo. Ni so keru aṉa a ereka keru ko akoekato, ikoana kama quli aṉa a akoeko ama ta, aṉata a ereka ko akoekato vo Karisito ko tanama kale tu me melai me erekou so jari.

¹¹ So inio vo Setani ta pui o zaraemelou anime, ako animeta meqai nianiia voko vatolo oka zariako ereko sole.

Paula ko duki Toroasi peuru kale

¹² So keru aṉa a baroa keru sai Toroasi peuru kale tu aṉata aqai bazubazuto vo Karisito ko Uri ama Bazu, aṉata a qeake ta vo Lekasa ta ola erekake uri ama rora iruruputo ko sai.

¹³ Melai aṉata matu duki ada evake, ako aṉata pui a veake vo animevo lolo Taitasi sole. So sole aṉata a qasekake aṉako uluto sama pesio sea maba poso kasi ni aṉata ada olake Masedonia peuru poso kale.

Karisito ko koqo imo voko kana madu

¹⁴ Kala solodia madu vo kuleto ala ta o rajaema piripiri ama kana poso peuru kale tu kasa oma iko se maba poso voko koqo imo voko kana madu. So jari nio vo Baṉara ta kasa o ika voko koqo imo voko kana madu eṉeko omadeu vati elo kale vo Karisito. Ni se siama madu ta ke lulueva sea solodia madu vo kuleto ala siqaekole ko bube tu ke puratiko seko kai zoleilo voko koqotaemo. So jari nio eṉeta ṉe olani ṉela kiadakoi kai bazutole vo Karisito ko Uri ama Bazu tu ṉe buratiko eṉe kai zoleilo vo Karisito ko koqotaemo voko kana madu. Aṉata a ilusiva vo Baṉara,

¹⁵ ako Karisito ta o soroeṉela eṉe kiadakoi tu ṉe aeriko voko bazu omadeuvo sea siama madu ta ke aerika koa bube ko uri ama tui kiadakoi jari. So inio eṉeta ṉe aerika koa bazu seke pakiziani kasi ni se noqola tolailo ke elo amu kasi.

¹⁶ Koa animeko bazu ta uria tui ama bube ko tui jari seke pakiziani kasi. Melai koa bazu ta matu ruqea tui ama quli ko tui jari se noqola tolailo ke elo amu kasi. Ni kake ta esa eri kikevou, puliala ta o male ereko komia bazubazuto ko iruruputo.

¹⁷ Melai eṉeta pui kake jaria ṉela se keka zariani tu batiro kai elo seko kai bazubazuto vo Baṉara ko Bazu. Eṉeta ṉeqai bazubazutani ṉela koa Bazu vo Baṉara ko soru kale uri ama vatolo kale o ṉavi Baṉara ko tanama kale, eṉeko va nabuluputo kale vo Karisito.