2 Koriniti 13 - BAṈARA KO VAIRU AMA LEVELEVEO

Tovatovama balauvato sama bazu ni roquano sama pesio

¹ Komi ta zouke ama taku aṉako kilo soipimelole me. Omadeuvo ko Tabu ama Riki kikolani jari, “Meta pui tava viqo kala maba vo ovai kuirikani kala ko ruqe ko pui omuqa ma zouke maba sase ko roveako tuvevo puilo,” kikola.

² Aṉata aqa zaria tu kaseko mekasi me lula me jaruini mela kasi, ni mata kiada mela kasi lula a qasekema quli aṉako omuqama soipimelo keru me. Melai aṉata mata aqa zaria tu kaseko vairutu puliako aṉa mata kilo mekasi, ko eri: aṉako mata vaito keru ta puliala ta opa taka soqoilou ko koqotato.

³ Aṉata so a qalou, ako meta meqa zaria tu ko tuvevo puilou ko vo Karisito ta o pesia aṉa kale kude kio. So keru vo o sidopu puemelou keru me vota pui lekuleku ama keve kale inio opa erekou. Vota kasa o ikou voko matuma pizato mekasi.

⁴ Ako vota o vouvai korosi topi lekuleku ala, melai erisaṉa vota o saeva vo Baṉara ko pizato kale. Ni eṉe voko apositolo ṉela ta lekulekua ṉela, melai eṉeko mekasi ama iruruputo kale eṉeta ṉeqai zomanou kovo vo Baṉara ko pizato vo Karisito ko saevo kale, nio piza kavole ṉe jidopu puemelou me.

⁵ Meta keazaimo me ṉavi ni titiziomo me ṉavi, tu kai nianiiomo ko meta tuvevo avole oqu samela inio kio. Ako aṉata aqai nianiia ta pui me vaekou meko oqu ta, meta me roveovou kaseko ta vo Jisu Karisito ta me tona inio.

⁶ Ni aṉata aqai kerua ko meta melai nianiiovou aṉata lula ada madoiva ni lula a duvevo puiva ta aṉata tuvevo ala Karisito vo apositolo lala inio kio.

⁷ Aṉata a vararaita vo Baṉara kasi tu meta pui me erekou ko sarueko. Aṉako zario ta meta me erekou ko sidopu, pui aṉako apositolo puilo tala kelo kaqe. So inio maba poso ta pui tuvevo ke ilou aṉa melai pui aba kerukeruekou.

⁸ Ako eṉea apositolo ṉela ta pui ṉe rovea ereko ko Uri ama Bazu ko tuveano ko dokolikako quli, melai koko tauvekake quli ikio ṉe ereka kiada keru sole.

⁹ Aṉata ada zoleilou tu zara elo, meta me bizatou meko oqu kale ta. Nio aṉako vararaito ta meta maba bea maba sidopu me elou.

¹⁰ Sokale avo inio aṉata a rikieka komia riki so keru aṉa vaṉa abeta eva keru mekasi azo. Aṉata so a qava tu so keru aṉako vaito keru mekasi aṉata pui aba zuluemelou me aṉako pesio kale koa pizato vo Lekasa Jisu o katilema kale. Ako koa pizato ta meko oqu ko tauveko kaqe inio, pui meko oqu ko niumaeko kaqe sole.

¹¹ Sole koi kazo aṉata a baikou, a qaka ni visi poso mela. Meta matu madoekomo tu sidopu emo; meta tala zorikomo aṉako mela titio me; ni meta omadeu vatolo emo kiada mela ni emo bule kale. Ni vo roquano ni bule ko Baṉara ta o elou me tona.

¹² Meta toraekiniomo tabu ama roquano kale.

¹³ Sea kiadama animeko lotu baerebaere poso se koi ke evani ta ke soroeka seko roquano mekasi.

¹⁴ Vo Lekasa Jisu Karisito ko pakiezato sama roquano, ni Baṉara ko roquano, ni vo Tabu ala Auvana ko bairumuo ta ko elou me tona.