2 Koriniti 12 - BAṈARA KO VAIRU AMA LEVELEVEO

Paula ko uloito ni kelokelozato poso

¹ Pui uri kio tu aṉata a rauraraurailo. Melai pui ko rovea sole aṉata a qasekou erisaṉa aṉako uloito ni kelokelozato ko animevo Lekasa o katilema aṉa.

² Toni ariku sabere ko paloasema kale, aṉa lula vo Karisito vo maba a eve keru ama taku kale, inio o koiviele vo Baṉara aukale matu raura vasi. Aṉata pui a baqumuka ko so ta aṉako maba tupu kale inio ma vota o katile inio kama pado uloi kale jari ama kelokelozato; vo Baṉara o kiada inio o paqumuka ko.

^3-4 Aṉata mata a dova kaseka ko eri, aṉata aqai nianiia aṉata lula ada koivi o ṉavi Baṉara ko peuru kale. Ni mata so lula kialalavo, aṉata pui aqai nianiia ko komi quli ta aṉako maba tupu kale inio ma vo Baṉara ta o katile inio kama pado uloi kale jari ama kelokelozato. Vo Baṉara o kiada inio okai nianiiani. Nio sai nio aṉata a viqake aqasiele ama quli pui ko roveako pesio elo, ko quli ko pui ko zariziako rukuilo.

⁵ So sole aṉata aqai raurailou ko quli vo Baṉara kasa ola ikema quli, melai aṉata pui aba rauraraurailou a ṉavi. Melai aṉata aqa zaria rauraraurailo tea aṉata aqai raurailo inio ko quli kasa ko iko ama ta aṉata lekulekua lala, ni pui a roveani lala ereko kama quli a ṉaviko pizato kale.

⁶ Aṉata aqa zariovou rauraraurailo tea, aṉata pui aba sarube putou, ako tuveano ikio aṉa a qaseko ama quli sole. Melai aṉata pui aba rauraraurailou, ako aṉata pui aqa zaria tu maba poso ta ke raurarauraelou aṉa sole. Aṉata aqa zaria tu seta keta la paṉaovou aṉa ko se keta la keako ko aṉa a erekako quli kale ni ko se keta la viqani aṉa kialani kale sole.

⁷ Melai vo Baṉara ta o zarie ko aṉa ko tolaelako quli koko kuevako Setani kasi azo. Vota o zarieka tu ko tolaelo tu aṉata pui aqai rauraraurailo ko aṉata lula a qea koa kubo aqasiele ama quli.

⁸ Zouke taku inio lula a vararaita komi kale avo ni aṉata a baseva vo Baṉara tu vota ota la ṉamuko ko.

⁹ Nio vota eri ama tiorizato o lati erekake aṉa, “Aṉako tauvezato sama roquano ta ko male noqoeṉo ṉoko tapata kale, ako aṉako pizato ta matu piza kama, so keru ṉoko lekuleku keru,” la kiove.

¹⁰ So sole aṉata aqai matu zoleiva ni aqai rauraraurailou aṉako lekuleku, tu aṉako lekuleku kale vo Karisito ko pizato ta ko elou aṉa tona. Vo Karisito ko ṉikale avo aṉata aqa zoleiva koa lekuleku, ni zarazarato, ni olaquavo, ni niumaniumato, ni tapata poso, ako so keru aṉa lekuleku a eva keru, so keru inio aṉata mata a bizata vo Karisito ko pizato kale sole.

Paula ko mai tuqutuquo se Koriniti peuru kale amu

¹¹ Aṉata kala sarube ala maba jaria rauraraurailo abe eva, melai me inio so me ilani mela ko aṉa. Ako me inio me male tu rauraelo aṉa sole, melai meta pui meba lai zolei ko aṉa. Ako aṉata pulia quli lala abe elou melai, aṉata maba pui zara kalala sea meko matuma “apositolo” madu ma kimelani kasi azo sole.

¹² Koa kubo aqasiele ama urikato ni aqasiele ama iruruputo ko aṉa kiada keru a erekema mekasi ta kasa ko ika ta aṉata apositolo lala, sole ko male tu meta me duvevo pueko aṉako apositolo elo.

¹³ Meta eri kimela, ta aṉata a zaraemela me edoloma lotu qoqono poso kasi azo, ako aṉata pui riteraite aba melai ike me seleni ko ranama tauvezato sole, kio? Meta akoekato saṉa ilomo koa aṉako sarueko kale avo!

¹⁴ Erisaṉa aṉata ada inainaova tu a qilo zouke ama taku kale tu aba soipimelo me. Ni komia taku melai aṉata pui tapata aba imelou me. Ako meko roquano ikio aṉa ada mela zariako sole, pui meko takula ni lomaloma. Ako pui se silo ama meqora poso inio kepa ma tukitukitou seko mama ni niania poso, melai mama ni niania poso inio kema tukitukitou se meqora poso.

¹⁵ Ni aṉata aqai zoleilou tu ṉamuko kiadama aṉako lomaloma ni aṉako pado ama saevo meko tauvemelo kale. Noi nio? Ko meko roquelo aṉa ta saratata ko elou ako aṉata a matu roquemela me sole kio?

¹⁶ Esa meta tuvevo me ikou, ko aṉata pui riteraite aba imele me. Melai esa kake mela inio eri kimevou aṉata lipalipa mela lovo a eve kimevou.

¹⁷ Noi nio? Aṉata lula a ubeubemela me se bazu ke borikani aṉa a joroemeni kale, kio? Maba pui!

¹⁸ Aṉata a baseveni lala vo Taitasi tu o zio ni mata aṉata a joroeve animevo lotu baerebaere tu o luluevo vo. Nio noi nio kimevou ko me, vo Taitasi inio lula o ubeubemela me, kio? Meta me qelai nianiia ta aṉa ni vota ijavoa iruruputo qe eva koa omadeuma uri ama vatolo ni keve kale inio.

¹⁹ Esa meko kerukeru kale ta aṉata a ṉavi ada kerukeruiva komia pesipesi kale esa kimela. Pui! Aṉata a besia uri ama vatolo kale o ṉavi Baṉara ko tanama kale, aṉako va nabuluputo kale vo Karisito, ni kiadama quli aṉa abe kasekako quli, ta meko tauvemelo kaqe, a lolo poso mela.

²⁰ Aṉata ada ṉava aṉako barolo keru sai tu kelo kama edolovo elo meko, aṉa pui a mela zariani jari me, ni meta me qelou aṉako edolovo elo, pui meko aṉa la zario tu so jari a elo. Aṉata ada ṉava tu aṉata a qelou kama aivekinio ni konoekinio, korakorailo ni kiadailo, kama tirazo ni maba kai pesio, aikailo ni birebire elo.

²¹ Aṉata ada ṉava so keru aṉa a qilou keru sai mekasi, pui uri tu o quratilou aṉavo Baṉara meko tanama kale, ni aṉata duki amai elou kubo madu se lula ke saruivani se pui ke liliziani seko kuna kama kalo kale azo, seko ereko kale ko pauvezato.