2 Koriniti 10 - BAṈARA KO VAIRU AMA LEVELEVEO

Paula ko kati zanezaṉeto voko apositolo elo

^1-2 Kake mela ta so la kimelani aṉata a baisemelani lala so keru aṉa abeta eva keru mekasi, ni aṉata a melai karaṉa so keru aṉa abeta eva keru meko vaṉa. So kimelani nio aṉa Paula lala a ṉavi nio a basemela me koa omadeuma inobe ni baiseo vo Karisito kasa o ikema kale, tu pui zuruzuruelo aṉa tu a melai karaṉo me so keru a qilou keru mekasi! Ako aṉata a roveovoa lala tu amai karaṉo kake seke ṉelai kuirikani lipalipa kama quli. Se kikelani ta kiadama maba komia ruqe ama peuru ma peuru kale amu kebe erekako iruruputo jari ama ikio eṉe apositolo ṉela ṉebe erekako, kikela.

³ Tuvevo eṉeta ṉe eva komia ruqe ama peuru ma peuru kale, melai eṉeta pui ṉe qati pazokinia ko ruqe omadeuvo komia peuru ma peuru kale amu ke mati pazokinia jari seko kana madu.

⁴ Koa vakovako eṉe ṉeqai iruruputako ta pui komia peuru ma peuru ko vakovako melai kota vo Baṉara ko piza kama vakovako ikio tu ṉeqai koqotaeko kiadama quli koko kati pazokiniako ko Uri ama Bazu. Eṉeta koqo ṉe ika Uri ama Bazu ko kai pesipesiekinio;

⁵ eṉeta ṉe qoqotaeka kiadama lipalipa kama rauraraurailo koko tizaemake se maba poso tu pui kevai nianiio vo Baṉara; eṉeta ṉe lilika maba poso ko kerukeru tu seta kevai zoriko vo Karisito.

⁶ Ni so keru me kasa me ilou keru meko ṉelai nianiio eṉe ta eṉeta apositolo ṉela inio, eṉeta ṉe inainaovou tu ṉe qoqotaemo se pui nio kasa ke ikani ko.

⁷ Meta meda la kea aṉako saevo koko topi ama pala. Kala ta inovoana sai vo so kiolani, “Aṉata Karisito vo lala,” kiolani kio? Soala ta o male tu mata o uria paqumuko ko aṉa melai vo Karisito ko lala kio.

⁸ Ako aṉata pui a qurata tu aqai abaro sole koa pizato vo Lekasa o katilema aṉa, ako komia pizato ta meko oqu tauveko kaqe, pui meko oqu niumaeko kaqe sole.

⁹ Aṉata pui aqa zaria tu puratiko ko quli ko ṉavaemelo ama quli me aṉako riki poso kale.

¹⁰ Ako kake ta eri kikelani, “Paula ko riki poso ta vualavuala kama ni piza kama, melai so keru vo koi eṉe kasi o eva keru, ta lekuleku ala voko tupu kale, ni voko bazubazuto melai pulia quli jari!”

¹¹ Aṉata a balauvima se so kikelani maba poso ta puliama ikio koko azavo ko aṉako riki poso kale kialani so keru aṉa vaṉa a eva keru mekasi azo ni ko aṉa a ereko ama quli so keru aṉa a elou keru mekasi.

¹² Ako eṉeta pui ṉe male tu eṉeta ṉe mati podetio seke raurarauraivani. Ako seta sarube amu sole! Seta keka raurarauraiva ke ṉaviko iruruputo ni ke zarazaraeka edolomu ko iruruputo.

¹³ Melai eṉeta ṉeqai raurailou koa iruruputo vo Baṉara o katiṉelema tu ṉe ereko. Mata kama quli ta pui ṉeba kai raurailou. Ni mekasi inio vo Baṉara ta o soroeṉele eṉe tu ṉe iruruputo.

¹⁴ Ako eṉeta pui ṉeba irurupute mekasi tea, pui ko male tu ṉeqai rauraraurailo eṉe ṉe erekako iruruputo mekasi. Melai koko tuveano ta eṉe inio kuletoa ṉela ṉe quevini ṉela mekasi, eṉe ṉe qati kuevi keru vo Karisito ko Uri ama Bazu.

¹⁵ So sole eṉeta pui ṉeba kai rauraraurailou edolomu ko iruruputo vo Baṉara pui opa ṉelati soroekema eṉe. Melai eṉeko zario ta meta me rapukou meko oqu kale ni eṉeta ṉe roveovou ereko mata kubo iruruputo mekasi.

¹⁶ So inio eṉeta ṉe roveovou tu kai bazubazuto ko Uri ama Bazu edoloma peuru poso kale meko peuru ka rana. Eṉeta pui ṉeba kai rauraraurailou kala edolola maba o erekema iruruputo koa zaekale sai vo Baṉara o soroevekoi voa maba.

¹⁷ Omadeuvo ko Tabu ama Riki kikolani jari, “Vo oka zariani rauraraurailo ta maba o rauraraurailou vo Baṉara lula o erekema quli kale.”

¹⁸ Ako vo Baṉara o rauraevani maba inio o zolevani vo Baṉara sole, pui voa maba vo o raurarauraivani o ṉavi inio.