2 Koriniti 1 - BAṈARA KO VAIRU AMA LEVELEVEO

¹ Aṉa Paula lala, vo Baṉara lula o pitoeleni lala o ṉaviko vatolo kale tu aṉata vo Jisu Karisito vo apositolo a elo, ta ada rikita vo animeko tamania kale ala Timoti sase mea Baṉara ko lotu qoqono me Koriniti peuru kale me evani mela kasi, ni mata mea kiada mela vo Baṉara ko maba madu mela sai Akaia ranama peuru poso kale me evani mela kasi.

² Vo animevo Mama Baṉara ni animevo Lekasa Jisu Karisito ko pakiezato sama roquano ni bule ta ko elou me tona.

Vo Paula ta o kativake ko uriavo vo Baṉara

³ Animeta me qativo ko uriavo vo animevo Lekasa Jisu Karisito vo Baṉara ni Mama kasi, vo baiseo sala Mama, vo kiadama patukato sala!

⁴ Ako vota o patukiṉela eṉe kiadama eṉeko tapata kale, tu eṉeta mata ṉemai patukiko se edolomu se kubo azaazama tapata samu, ni kai patukato koa patukato ko eṉe lula ṉe qoako vo Baṉara kasi azo jari ama.

⁵ Eṉeko omadeu vati elo kale vo Karisito eṉeta ṉeqai zomana kovo kubo voko tola poso ni so jari eṉeta mata ṉeqai zomana kovo vo Baṉara ko matuma patukato eṉeko omadeu vati elo vo Karisito.

⁶ Eṉe olaquavo ṉe eva keru inio meta meda patuka ni meda pakia; ni eṉe patukato ṉe qoa keru inio me melai me qoa ko patukato ni pizato. Ni koa pizato ta ko katimela ko bokao me, tu meqai inobea pataitou koa omadeuma tapata ni tola, ko eṉe ṉeqai evako jari.

⁷ So sole eṉeta ṉeqai uria nianiia koa meko kai zomano koa tola eṉeko tola poso, ni eṉeta ṉeqai nianiia ko Sokale avo inio me melai me qovou koa tauvezato ko eṉe ṉe qoako jari ama.

⁸ Ako eṉeta ṉeqa zaria tu ṉe melai kerukerue me, eṉeko kaka ni visi poso mela, koa tapata eṉe lula ṉe doraekako Eisia peuru poso kale. Koa matuma tapata ta kokai paloase eṉeko pizato ko baroakoi, nio eṉeta pui ṉeba saevoa ṉela inio kiṉelake.

⁹ Eṉeta ṉe lainikake ta ko vou ta lula eṉe tona. Melai komi quli ta ko erei tu eṉeta ṉevai keruvou vo Baṉara o kiada, vo o saevimani seke vovini, ni pui ṉeba kai keruvou ṉe ṉaviko pizato.

¹⁰ Soa matuma vou ko tapata poso kale azo vota lula o pakieṉela eṉe, ni vota mata o pakieṉelou eṉe. Nio eṉeta ṉevai keruani ṉela vo ta vota mata o pakieṉelou eṉe.

¹¹ Me melai tauveṉelomo eṉe meko vararaito kale. So inio koa kubo vararaito koko kaseṉelako eṉe ta ko puratikou vo Baṉara ko mauru iṉelo eṉe, ni kubo maba madu ta ke kativou ko uriavo voko mauru iṉelo eṉe kale avo.

Vo Paula ko inainao ko besizio

¹² Aṉata ada zoleiva ako aṉako kerukeru kale aṉa a qaevo komia peuru ma peuru kale ni mekasi ta matu tuvevo ama ni sidopu ama vo Baṉara ko vailo kale. Pui peuru ma peuru ko lipalipa kama nianiio kio aba lulueke aṉako kalo kale, melai vo Baṉara ko pakiezato sama roquano ikio kasa ama ikake se maba poso aṉako kalo kale.

^13-14 Aṉata a rikieka mekasi ko quli meme roveovo ama tiromiko ni vakakuke. Melai meta mebe sasa tuvevo puela aṉa erisaṉa. A mela zaria tu mainio meba uria tuvevo puelou, inio vo animevo Lekasa Jisu Karisito okai vaito ama Ṉaniu kale ta mela zoleilou ko aṉa ni aṉa melai a melai zoleilou ko me.

¹⁵ Aṉata a uria paqumumelake meko lai zoleilo aṉa ni so inio aṉako kuleto ama kerukeru ta aṉa aqa zariovi kilo soipimelole me tu meta omuqa taku me qovou aṉako kilo ko mauruto.

¹⁶ Ako aṉata a joipimelou me kiave aṉako zio keru Masedonia peuru poso kale ni mata aṉako vaito keru sai kazo sole, tu meta me dauvelo aṉa aṉako Jiudiama ziokale.

¹⁷ Komia aṉako pui melai barolo me ta koko lelo ta aṉata pui tuvetuvea lala jari kio? So keru aṉa a ereka keru aṉako iruruputo ko inainao ta aṉata pui a ereka kama kiadailo ko keve jari. Aṉata pui a qaseka ko “Zio, aṉata ada kilou,” melai aṉako kerukeru kale ta pui aba kilou, kiala.

¹⁸ Vo Baṉara ta o tuveanani ni aṉa melai a duveanani lala. Aṉata pui aba pilapaqo putou!

¹⁹ Ako vo Jisu Karisito, Baṉara vo Meqora, ta puliaka taku o pilapaqo putani sole. Ni vo inio aṉa ni vo Sailasi ni vo Timoti ṉevai bazubazutani.

²⁰ Ako vo Jisu inio tuvevo o mela erekani anime vo Baṉara o vati soruekema tu o mela ereko. So inio vo Jisu Karisito ko ṉikale inio me qaseka animeko “Emeni” edolomu kevai ilusika keru vo Baṉara ko quli vo o mela erekako anime.

²¹ Vo inio voa Baṉara animeko omadeu vati elo kale vo Karisito vinavina o mela ikani. Ni vo inio voa Baṉara vo o pitoemeleni anime,

²² vo lula o mamola puemelani anime ta animeta voko mela, ni vo o katimelani anime voko Tabu ama Auvana animeko bulo kale tu kota omadeuvo koko mamola jari ko elo tu ko melai kerukerueko kiadama mauruto vo tova o katimelo ama anime.

²³ Vo Baṉara ta okai nianiia koko tuveano ta aṉata pui aba kuevi sai mekasi Koriniti peuru kale ako aṉata pui aba ka zariovi melai karaṉo me sole.

²⁴ Aṉata pui aqa zaria zuruzuruemelo me tu me zoriko aṉako vatolo kiadama quli kale meko oqu ko saevo kale ako eṉeta ṉe baqumumela ta meta piza kamela oqu kale. Melai eṉeta omadeu iruruputo ṉe melati eva me tu meko zoleilo ta matu ko elou.