1 Timoti 4 - BAṈARA KO VAIRU AMA LEVELEVEO

Lipalipa kama titisa poso

¹ Tabu ala Auvana ta zakaremu o ika ko eri. Kake maba poso ta ke vaekou ko oqu koko kilo ama taku keru kio, ni seta ke zorikou koko lipalipatako auvana poso ni seta ke luluekou ko ziolo poso ko nianiiekato.

² Koa nianiiekato lipalipa kama ta se lipalipa kamu ke erekako, seko bulo kale ama kerukeru ta vouma omadeuvo kota ko siqai jari bavi ama aeani kale, nio pui komai kuirika seko sarueko.

³ Soama maba poso ta ke ereka ko nianiiekato koko kaitikako ko roroto ni ko pui me quovou kama sailao poso kio sama. Melai vo Baṉara ta o ereke koa sailao poso tu kuo kaqe, so sole anime me duvevo putani ni meqai nianiiani mela ko tuveano ta me rovea kuo uriavo sama vararaito ko tova.

⁴ Kiadama quli vo Baṉara o erekema ta uri ama; pulia quli ta meqai kaikuapou, melai kiadama quli ta me quovou uriavo ko vararaito kale,

⁵ ako vo Baṉara ta lula tabu ka kiola ni animeko vararaito melai tabu ko ika sole.

Uri ala nabulu Jisu Karisito vo

⁶ Ṉota katima komia bazu poso sea lotu tamatamania, nio ṉota kala uri ala Jisu Karisito vo nabulu ṉa, ṉo ṉavi ṉo bizatiani ṉa ṉoko auvana kale koa oqu ko pesio kale ni tuvevo ama bazu kale ko ṉoṉo luluekako.

⁷ Melai taka papariovi ko lipalipa kama ni utube ama bazu, ko pui ko kasevako vo Baṉara. Ṉota matu madoe tu tava paṉaovi vo Baṉara kiada keru.

⁸ Tupu kale ama madolo kale pizatiko ko tupu ta silo pala tauvezato sama, melai tava paṉao vo Baṉara ta kobe kai paloasa kiadama keve kale, ako kota ko tauveka vairutu ama ni ko kilo ama saevo sole.

⁹ Komi ta tuvevo ama pesio, koko male ama tu kiadamu ta ke tuvevo pueko.

¹⁰ Animeta matu pazokinio me eva ni meda matu iruruputa, ako animeta meqai kerua animeko kovo vo saevola Baṉara leveleveo o mela kasekema quli, vo kiadamu vo Pakio, melai o maba pakiemani seke tuvevo puevani vo.

¹¹ Katima se maba poso komia bazu poso ni komia nianiiekato poso.

¹² Ṉota pui zarievo kala tu vota o zaraeṉo ṉo ṉoko vairu beta elo kale avo, melai ṉota kala kevepito eve seke tuvevo putani kasi, ṉoko pesio kale, ni ṉoko kalo kale, ni ṉoko roquano kale, ni oqu, ni ṉoko bulebule ama saevo kale.

¹³ Ako aṉata ada baroloa lala inio, so sole ṉota pui lalamato tiromiko ko Tabu ama Riki ubutiania ni pui lalamato kai bazubazuto ni kai nianiiekato.

¹⁴ Ṉota kai irurupute koa bokao vo Tabu ala Auvana o katiṉema ṉo, so keru se lotu tanatanamu ṉase keṉai ivike keru ama.

¹⁵ Ṉota dikidauputole ereka komi quli, tu kiadamu ta ke ṉelou ta ṉota ṉobeta ola pizato ṉoko odikato ko iruruputo kale.

¹⁶ Ṉota balauve ṉoko saevo ni nianiiekato kale. Ṉota vinai komi quli poso ko ereko kale, ako ṉota so ṉo qalou, inio ṉo ṉavi ni seke viqani ta meda pakiovou.