1 Timoti 3 - BAṈARA KO VAIRU AMA LEVELEVEO

Lotu qoqono kale ama vilua pikopiko madu

¹ Komi ta tuvevo ama pesio: Voa maba vo oka zariani ko vilua pikopiko elo lotu qoqono kasi ta o pitoekani nio matu uri ama iruruputo.

² Lotu qoqono kale ala vilua pikopiko ta kuiripato pide o elou, vota o ṉeamukou omadeu pado reko, vota o balauvani, ni o kaitiziani, ni vota inobea elola; ni vota o baroekimou se edoloma maba madu voko pade kale; ni vota bokao saṉa o elou tu o ereko ko nianiiekato;

³ vota pui o nozuekou ko piza kama ju tu kota sarube ko ivo vo, ni pui o niumaniumaemo se edoloma maba madu, melai o baisemo ni bule o elo; vota pui o roqueko ko takula.

⁴ Vota o kati uria vailo voko saidi, ni uria zoripato ni paṉao saṉa o imo voko meqora poso, so inio vota o roveovou kati uria vailo vo Baṉara ko lotu qoqono uri ama odikato kale.

⁵ Ako kala maba vo pui o roveani korotiko o ṉaviko saidi ta nonia roveo inio vota o kati vailou vo Baṉara ko lotu qoqono? Vo soala maba ta pui opa roveovou.

⁶ Vota piza kala maba o elo oqu kale ni pui vairu ama oqu sala maba. So inio vota pui o raurailou ni pui o pialou vo Setani o koema kuiripato jari ama kale.

⁷ Vota kala maba se keta va paṉaovo ala se pui lotu maba poso tu vota pui o kovou ko kuiripato ni vo Setani ta pui soa sipativo o elo.

Tauvezato ko maba poso lotu qoqono kasi

⁸ Ni so jari nio mata se lotu qoqono ke pitoemani tauvezato ko maba madu ta uri ama kalo saṉa ke elo, ni seta pui matu nozueko ke elo ko vaini ko ju, ni pui keka zario ko takula pui sidopu ama keve kale ke koako.

⁹ Ni seta pizaka noqoeko ke elo ko Uri ama Bazu ko tuveano puliama niuniala sate.

¹⁰ Seta ke madoilo kuleto, ni puliama kuiripato saṉa ke elo amu inio ke kovou koa iruruputo.

¹¹ Seko reko poso melai uri ama kalo saṉa ke elou ni pui kekai pesiovou ko maba, ni seta pui ke matu nozuekou ko piza kama ju melai seta kiadavoa kerula kamu ke elo.

¹² Vo lotu qoqono kale ala tauvezato ko maba ta omadeu pado reko o ṉeamuko ni o mati uria vailo voko meqora poso ni kiadama voko saidi uri ama odikato kale.

¹³ Sea tauvezato ko maba madu seke uria erekani seko iruruputo ta uri ama ṉi ke koa, ni seta parani putole ke rovea kaseko seko vai oqu vo Jisu Karisito.

Animeko oqu ko matu omele ama tuveano

^14-15 Aṉata a bokaovou ta aṉata aba mela lelou inio me. Melai aṉata a ubaitou ta komia leta aṉa abe rikiekako ikio ko bazuemelou me ko anime me qalo avoa iruruputo vo Baṉara ko saidi kale amu kasi. Se inio vo saevola Baṉara ko lotu qoqono, ako seta voko tuveano ko lado vola ni barabara sole.

¹⁶ Puliala maba ta opa roveovou taka zolio ko animeko oqu ko omele ama tuveano ta matu saqoroma, ko eri: Vo Karisito ta kasa o eve maba ko tupu tona, Tabu ala Auvana ta ota vai bazute voko tuveano ta vo inio animevo Lekasa, ni mateana madu melai ke veake vo. Vota lula kevai bazubazute peuru ma peuru, ni vota tuvevo ke ive peuru ma peuru, vo Baṉara o koivieveni aukale ama peuru kale.