1 Timoti 2 - BAṈARA KO VAIRU AMA LEVELEVEO

Lotu kale me qalo avo

¹ Komi ta aṉako matu kuleto ama bazu mekasi, ko eri, meta erekomo ko tauvezato ko vararaito, paseto, ni uriavo ko vararaito Baṉara kasi tu me mati vararaitou sea kiadama maba poso;

² tu me mati vararaitou se lekasa poso ni sea kiadama maba poso se qavuna ko pizato samu, tu animeta uria elo me elou vo Baṉara ko tava paṉao ni maba madu ko tama paṉao kale.

³ Soama vararaito ta uri ama quli koko zolevako vo Baṉara animevo Pakio,

⁴ vo oma zariani kiadama maba poso tu o pakiemo ni seta kekai nianiio voko tuveano.

⁵ Ako vo Baṉara ta omadeu pado sole, ni vo tabu ala Baṉara ni boutare sama maba poso ko tiania o evani ta mata omadeu pado, vo Jisu Karisito o ṉi sala maba,

⁶ vo pui opa katiziovini tu o vou kiadama maba kaqe tu vota oma tabariko seko rupasio seko ruqe kale azo. Koa voko vou ikio lula ko mamola pueke vo Baṉara ko tutututuki ama taku kale vo Baṉara ma zario kiadama maba poso tu ke pakio.

⁷ Sokale avo inio aṉata a joroiva kala apositolo lala tu a nianiiekimo se pui Jiu amu, tu aqai bazubazuto ko oqu ni tuveano ko bazu. Aṉata ada tuveana, pui a lipata!

⁸ So sole lotu iruruputo kale kiadama zaekale aṉata ama zaria se lasive amu tu seta ke vararaito, ni tabu ama kerukeru sate seta ke roveo zolaeko seko ṉase poso vararaito kale puliama korakorailo ni zolizoliekinio sate.

⁹ Aṉata mata ama zaria se rekoreko tu uria saboilo ke elo seko zarazarailo ni paṉao kale; pui seko viriviri toukale ni pui kama qolo, ni kama bavi ko toruru ni kama matuma tatabara sama suma poso.

¹⁰ Seta uri ama kalo ni kerukeru ke kovou, ko koko male ama se reko poso kasi seke tava paṉaovani vo Baṉara kikelani.

¹¹ Se rekoreko ta ke ibu ni ke zarazarailo seko vakakuko kale Baṉara ko nianiiekato.

¹² Aṉata pui a zariema se rekoreko tu seta ke nianiiekimo ma keta mai paloaso lasive amu ko pizato, melai seta moiza kebeta elo lotu kale.

¹³ Ako Adami nio kuleto o erei saita inio Ivi sole.

¹⁴ Ako pui Adami nio opa lipalipatou sole, melai koa reko ikio ko lipalipaima ni ko ikio ko bikoirikema vo Baṉara ko bazu.

¹⁵ Melai se rekoreko ta ke pataitou seko oqu kale ama elo ni roquano ni tabu elo, ni seko inobe ama kalo kale, nio seta ke pakiovou seko kovo kale ko meqora.