1 Timoti 1 - BAṈARA KO VAIRU AMA LEVELEVEO

¹ Aṉa Paula lala ta kala pado apositolo Jisu Karisito vo a eveni lala vo Baṉara animevo Pakiezato ko soropato kale ni Jisu Karisito vo anime mevai keruani ko soropato kale.

² Aṉata a rikieka komia leta ṉo Timoti ṉa kasi aṉavo maba meqora jaria laṉa vo Jisu Karisito vai oqu kale. Ni aṉata a vararaita tu vo Baṉara animevo Mama ni Jisu Karisito animevo Lekasa ta o katiṉou ṉo voko tauvezato sama roquano, ni baiseo, ni bule.

Bazu poso ko kokai kaikuapako lipalipa kama nianiiekato

³ Aṉata aṉa zaria ṉo tu beta eve Epesasi peuru kale, lula ṉati kiavevo jari so keru aṉa Masedonia peuru poso kale a qeve keru. Ako kama maba poso ta kebe kai nianiiekata sai ko lipalipa kama lotu ko bazu poso; tu ṉota maba dokolimo eve se.

⁴ Bazuema se tu seta ke epezo ṉamuko seko taku ereko kale ko vikuvikula bazu ni rosi ama koilokoilo ko bazubazu, koko puratikako ko aivekinio pala, ko pui kasa ko ikako vo Baṉara ko nakanakati. Melai vo Baṉara ko nakanakati ta ko paqumua maba poso ko oqu kale.

⁵ Aṉata a bazueṉa ṉo tu dokolima se, ako aṉata aqa zaria tu sea lotu qoqono ta ke roquekinio rurubiatana kama bulo kale, ni uri ama vatolo kale, ni tuvevo ama oqu kale.

⁶ Kake maba poso se pui kepa zuatikeni koa uri ama quli ta lula ko saruema ni lula keta mumaiva koa utube ama pesipesito kale.

⁷ Seta keka zaria tu seta vo Mosese ko Bazu ko nianiiekato ko maba ke elo, melai seta pui ke paqumuka Mosese ko Bazu kikolani, ni ko quli poso se kekai nianiia ka kikelako kai nianiiekato.

⁸ Animea kiada mela ta meqai nianiia Mosese ko Bazu ta uri ama, meqai uria nianiiekatou tea, ni pui meqai aivekiniou.

⁹ Melai ko male tu kerukerueko ko eri, Mosese ko Bazu ta ko kasei, tu pui se sidopu amu kaqe, melai kota se bazu ke bikoirikani ni se ruqe amu, ni se pui tuvevo ama auvana kale ama saevo samu, ni seke vouvaemani seko mama ni niania poso, ni seke vouvaemani maba poso kaqe inio,

¹⁰ ni kota seke pauvezatani, ni lasive amu seke erekatani ke ṉavio kude, ni seke mabaku puemani maba poso, ni seke lipalipatani, ni sea kiadamu kaqe, seke erekani ko quli ko pui ko sidopu ama nianiiekato ko kati korotako quli.

¹¹ Koa nianiiekato ta ikoana ko Uri ama Bazu kale Baṉara o katilema aṉa tu aqai bazubazuto, koa Uri ama Bazu vo ṉaṉaidara ni mauruto sala Baṉara ko.

Baṉara ko akoekato sama roquano

¹² Aṉata a ilusiva vo Jisu Karisito animevo Lekasa vo o pizatilani aṉa aṉako iruruputo kale. Aṉata a ilusiva vo, ako vota o malezilake ni o pitoelake sole tu ava nabuluputo vo,

¹³ rouka ruqe kasevo abe eve vo lulavo ni abe niumaniumaeve vo aṉako ruqe imo kale voko maba madu. Melai animevo Lekasa Jisu ta o matu roquele aṉa ni ota la akoeke ko, ako so keru ta aṉata pui nio avai oquke vo sole ni pui nio aqai nianiiake ko aṉa a erekema quli ta ruqe ama kio sole.

¹⁴ Ni vo Baṉara ta olai avozikake voko palopaloasi ama roquano ni vota o katilake aṉa koa oqu ni roquano ko anime me qoako so keru me duvevo pueva keru vo Jisu Karisito.

¹⁵ Vo Jisu Karisito ta o kuevi komia miduku kale tu vota o pakiemo se boutare samu. Kota kama pado tuvevo ama pesio, koko male ama tu kiadamu ta ke tuvevo pueko. Ako aṉata matu ruqea lala sea kiadamu sea boutare samu azo,

¹⁶ melai vo Baṉara inio akoezato saṉa o ile ti vo Jisu Karisito ta kasa o ike voko inobea taruano aṉa palopaloasia ruqea lala ko saevo kale, tu kota kama pado mamola kaqe se mainio kepa tuvevo puto amu kasi, seke kovo amu ko noqola kama saevo.

¹⁷ Me ilusivou ni ṉaṉaidara puevou vo noqola kala ni paito pide ala ni mutamuta kale ala Aikovakova, vo omadeu pado Baṉara latau ṉaniu ni ka ṉaniu! Emeni.

Vo Timoti ko koidi

¹⁸ A meqora Timoti, ṉota kerukerueka sea lotu tanatanamu ṉati kikevevo ṉo va nabuluputo kale avo vo Jisu Karisito. Ṉota vakovako ika koa zuvarato sama pesio poso seke katiṉema ṉo inio ṉota uria pazokinio ṉo elou,

¹⁹ ni ṉota ṉo bataitou ṉoko oqu kale nio ṉoko kerukeru ta pui kopa ṉai kuiriziovou ko ruqe. Ako kama maba poso ta pui keka zariani nio viqo seko bulo kale ama kerukeru ko komai kasekako quli, nio seta ruqe ke ika seko oqu.

²⁰ Kainioqa sea maba poso kalea nioqa ta Hemeniasi ni Alekezada inio. Nioqata lula aṉa a qoqotaekeni nioqa nioqako pakeko kale vo Setani ko pizato kale, tu komia keve kale kude nioqata qo paqumukou tu pui ruqe kasevo qo elou vo Baṉara.