1 Tesalonaika 5 - BAṈARA KO VAIRU AMA LEVELEVEO

Meta ka inainaomo vo Lekasa Jisu ko vaito

¹ A visi poso ni kaka poso, aṉata pui aba rikiekou mekasi koa taku kale avo ko ereilou keru komi quli poso.

² Ako meta meqai uria nianiia sole koa taku vo Lekasa Jisu okai vaito ama ta kota barolou puliala maba opa kai nianiiovo avo, omadeuvo vo kuilokuilo ala maba vo o kuevani ipu kale jari.

³ So keru eri kikevou keru se maba poso, “Kiadama quli ta kota ibua ni animeta uria elo meda eva,” kikevou keru, inio vo Baṉara ta ota podoloa koqotaemo o elou se. Ni seta pui kepa taka soqoilou, omadeuvo ko reko pui kota ka soqoiva jari ko meqora ko kovo ko tola.

⁴ Melai me, visi ni kaka poso mela, meta pui kutumana kamela, so sole koa taku ta pui kopa vuzemelou vo kuilokuilo ala maba okai kuevako jari.

⁵ Mea kiada mela ta zakaremu ko maba poso mela, ni ko ṉaniu ko maba poso mela. Ako animeta pui ipu ni kutumana ko maba poso mela.

⁶ Animeta me darekou vo Jisu ko vaito ni inobe me elou tu pui kake maba poso seke maroṉani jari me qalou.

⁷ Ako seke maroṉani ta ipu kale inio keta maroṉa, ni seke nozuekani ko piza kama ju ta ipu kale inio doilili kekai eva sole.

⁸ Melai anime vo ṉaniu ko mela, ta inobe elo me elo. Animeta mevai oqu ni me roquevo vo Baṉara, ni kota ko qaramu-melou anime omadeuvo parani ala ko bako ko qaramuva vo jari, ni animeta piza kavole meqai keru vo Baṉara ko pakiemelo anime, omadeuvo pazokinio ko maba okai kerua jari voko zokele ama tarapae.

⁹ Ako vo Baṉara ta pui opa pitoemele anime tu ko melai barolo voko korakorailo, melai vota o pitoemele tu animeta me qovo ko pakio vo Lekasa Jisu Karisito kale,

¹⁰ vo o mela vovini anime tu animeta omadeu saevo me elo vo sate, anime saevo mela ma lula vou mela vo o vaitou keru, ta puliako ta koko azavo.

¹¹ So sole meta zuvarikiniomo ni tauvekiniomo, so mebeta kavani komia taku kale.

Tovatovama bazubazu ni roquano

¹² Eṉeko visi ni kaka poso mela, eṉeta ṉe basemela me tu meta tama paṉaomo seke iruruputani mekasi, seke aveavemelani me meko lotu saevo kale ni seke nianiiekimelani me.

¹³ Meta rauraemomo se ni roquemomo se seko iruruputo seke erekako ko kio kale. Ni meta bule ikiniomo me ṉavio kude.

¹⁴ Eṉeko visi ni kaka poso mela, eṉeta ṉe basemela me tu meta balauvimomo se utu elo ke evani, ni zuvarimomo seke ṉavani, ni tauvemomo se lekuleku amu seko oqu kale, ni inobe emo kiadama maba poso kasi.

¹⁵ Balauvomo tu meta pui me besiekou ko ruqe ruqe kale, melai meta madoekomo tu erekomo ko uri kiada keru me ṉavio kude ni so jari kiadama maba poso kasi.

¹⁶ Meta zoleimo kiada keru,

¹⁷ vararaitomo kiadama taku poso kale,

¹⁸ ni meta kasekomo meko uriavo vo Baṉara kasi kiada keru me mebeta saeva keru, olu ama saevo ko taku keru melai, tapata kama saevo ko taku keru melai. Ako so inio vo Baṉara ota melai zariani me tu meta me elou meko saevo kale omadeu saevo meqai evako vo Jisu Karisito sase.

¹⁹ Meta pui tizaeko vo Tabu ala Auvana ko iruruputo,

²⁰ ni meta pui kai kedu vo Baṉara o vati soroekako bazu poso.

²¹ Melai meta taka kemo kiadama quli ko uri ni ruqe, ni taka noqoekomo koko uri ama.

²² Ni taka lapasomo ereko kiadama ruqe ama quli.

²³ Erisaṉa o ṉavi Baṉara, vo anime o katimelani ko bule, ta tabu o imelou me kiadama keve kale, ni vota o melati vailou me meko pado ama saevo kale, auvana ni tupu kale, ni kuiripato pidea mela o melati vailou vo Lekasa Jisu Karisito o vaitou keru ama taku keru.

²⁴ Vo Baṉara vo o nokaemelani me ta o melati vailou me, ako vota kerula kala sole.

²⁵ Eṉeko visi poso ni kaka poso mela, meta ṉelati vararaitomo eṉe.

²⁶ Meta toraekiniomo muli tabu ama roquano kale mea kiada mela me Karisito ko maba poso mela.

²⁷ Aṉata a joruemela me vo Lekasa Jisu ko ṉikale tu meta tiromikomo komia riki kiadama saizama lotu maba poso kasi.

²⁸ Aṉata a melati vararaita me, tu vo animevo Lekasa Jisu Karisito ko roquano ta ko elou me tona. A baika.