1 Tesalonaika 3 - BAṈARA KO VAIRU AMA LEVELEVEO

¹ Eṉeko matuma zario tu kai nianiio meko bazu kale avo inio eṉeta pui ṉe roveake taruano mata kama taku melai eṉeta ṉe bitoekake tu eqeta qe elo sai Atenisi peuru kale qe kiada.

² Nio eqeta qe soroevake vo Timoti, eqevo visi vo eqe sase ova iruruputani vo Baṉara voko kai bazubazuto kale vo Jisu Karisito ko Uri ama Bazu. Eqeta qe soroeve vo tu o pizatimelo me ni o tauvemelo me meko oqu kale,

³ tu puliala me azo ta o vaekou voko oqu komia niumaniumato poso kale avo. Meta me uria paqumuka me ṉavi koa niumaniumato soama ta vo Baṉara ko vatolo ikio tu anime kaqe.

⁴ Ako so keru eṉe ṉebeta eva keru mekasi, eṉeta ṉe bazuemele me, puliako ko ereilo, ko animeta meda ziovou nio niumaniumato kale kio; ni meta me uria paqumuka ta kota tuvevo avole kota ereivake.

⁵ Sokale avo inio aṉata a joroeve vo Timoti. Aṉata maba pui a rovea ibu aṉako pui kai nianiio kale meko ziozio, so inio aṉata a joroeve vo tu vota okai nianiio meko oqu ko kavani. Ako aṉako matuma ṉalo ta esa tuvevo avole lula inio o zolizoliemela me vo Setani tu meta me vaeko meko oqu ni kiadama eṉeko iruruputo ta kota utu ṉamuiva kiala inio!

⁶ Erisaṉa ta lula o ṉelai vaita eṉe vo Timoti mekasi azo, ni o kati kueva eṉe kasi ko zoleilo sama bazu meko oqu ni roquano ko kio sama. Vota o ṉelai bazueka eṉe ko meta me matu roqueṉela eṉe meko kerukeru kale kiada keru kio ni meta me ṉela matu zaria tu ṉela lelo eṉe, omadeuvo eṉe ṉe mela zariani mela lelo me jari.

⁷ So sole kiadama eṉeko tapata ni olaquavo kale, mea visi poso ni kaka poso mela ta me batukiṉela eṉe meko oqu ko bazu kale;

⁸ ni eṉeta ṉeda matu zoleiva ako meta pizaka lojo me eva sole meko omadeu vati elo kale vo Lekasa Jisu.

⁹ So sole erisaṉa eṉeta ṉe rovea ilusivo vo Baṉara mekale avo. Eṉeta ṉevai ilusika vo eṉeko mela zoleilo kale me voko tanama kale.

¹⁰ Ni ipu ni ṉaniu eṉeta ṉevai zaivota vo tu eṉeta ṉe mela lelo me tu ṉe jidopu puemelo me ni ṉe bizatimelo me meko oqu kale.

¹¹ Aṉako matuma paseto ta o ṉavi Baṉara animevo Mama, ni animevo Lekasa Jisu Karisito ta qo ṉela korotikou eṉeko keve tu ṉe qilo mekasi.

¹² Animevo Lekasa inio o rapukikou meko roquekinio me ṉavio kude ni meko roquemo kiadama maba poso, tu kota ko kati ijatinia puekiniou eṉe ṉe imelania roquemelo me.

¹³ So inio vota o pizatimelou me meko bulo ni saevo kale ni meta ruqe pidea mela me elou meko tabutabuo kale vo Baṉara animevo Mama ko tanama kale, so keru animevo Lekasa Jisu o vaitou keru kiadama voko maba poso sase.