1 Tesalonaika 2 - BAṈARA KO VAIRU AMA LEVELEVEO

Paula ko iruruputo Tesalonaika peuru kale

¹ Eṉeko visi poso ni kaka poso mela, meta meqai nianiia eṉeko soipo mekasi ama ta pui utube ama kopa eve.

² Meta meqai nianiia ko eṉeko niumaniumaeṉelo ni naqueṉelo Pilipai peuru kale puliako eṉe kilo sai mekasi Tesalonaika peuru kale. Ni sai meko peuru kale melai kubo maba poso ta ke kanaekiṉele eṉe, melai vo animevo Baṉara ta o parani pueṉelake eṉe ni eṉeta ṉe melai bazuekake me koa Uri ama Bazu koko kuevako vokasi azo.

³ So keru eṉe ṉe bazubazute keru mekasi eṉeko bazubazuto ta pui kama sarusaru ama quli topi ama, ni pui kama eṉeko pazopazoilo sama kerukeru sate, ni pui eṉeko kama ubeubemelo kale ama.

⁴ Soama quli taka lapaso kale eṉeta ṉeqai pesia kiada keru vo Baṉara eṉe o ṉelai zariani jari, ako vota lula o uria madoeṉela ti o ṉelai kerua tu eṉeta ṉeqai bazubazuto koa Uri ama Bazu. Ni kokale eṉeta pui ṉeqa zaria zolemo se maba poso, melai vo Baṉara inio ṉeva zaria zolevo, vo o madoekani eṉeko kerukeru.

⁵ Meta meqai nianiia ta puliaka taku inio eṉeta ṉeba oluoluemele me, ni vo Baṉara inio okai nianiiani ta eṉeta puliama viluloqu sama kerukeru kale inio eṉeta ṉe irurupute mekasi.

⁶ Eṉeta pui ṉeba kai zariovi tu ṉe ilusio mekasi, ni mata pui ṉeba kai zariovi ilusio edolomu kasi.

⁷ Ako eṉeta vo Karisito ko apositolo ṉela sole ṉeda roveo nio riteraite imelo me. Melai eṉeta ṉe vanonoriemele me so keru eṉe ṉe eva keru mekasi, omadeuvo ko niania koko vanonoriemako koko meqora poso jari.

⁸ Ako eṉeta ṉe matu roquemele me, so sole eṉeta ṉeqai zariake melati bazueko me ko Uri ama Bazu, ni eṉeta mata ṉeqai zariake melati koidipo me eṉeko pado ama saevo kale. Ako eṉeta soa matu roquemelo inio ṉe evake me sole.

⁹ Eṉeko visi poso mela, meta me qerukeruekou inio eṉeko matuma iruruputo mekasi ama. Ako eṉeta ṉe irurupute ipu ni ṉaniu tu eṉeta pui matu riteraite ṉe imelo me eṉeko kai bazubazuto kale mekasi ko Uri ama Bazu vo Baṉara kasi azo ama.

¹⁰ Me ṉavi inio meqai nianiiani mela, ni so jari vo Baṉara ta okai nianiia ta so keru eṉe ṉe eve keru mekasi ta eṉeko kalo mekasi me lula me duvevo puekani mela ko Uri ama Bazu ta bulebule ama, ni sidopu ama, ni kuiripato pide ama ko eve.

¹¹ Meta meqai nianiia ta eṉeta ṉe roquemele mea kiada mela omadeuvo kala mama ta o roquema jari voko meqora poso.

¹² Eṉeta ṉe zuvarimele me, ni ṉe batukimele me, ni ṉebeta eve nokaemelo me tu meta meqai saevo koa saevo koko zolevako vo Baṉara, vo o nokaemelani me voko lekasa puo kale tu meta me zomanou voko ṉaṉaidara kale.

¹³ Ni mata eri kale avo inio eṉeta pui ṉe lalamata ilusivo vo Baṉara. Ako so keru eṉe ṉe qati kuevi keru mekasi vo Baṉara ko bazu, ta meta me viqe ko ni me ṉeamukake ko, ako meko kerukeru kale ta kota pui kama maba ko bazu jari ama ikio sole, kimeve, melai kota o ṉavi Baṉara ko bazu kimeve. Ni meta meda tuveane, ako kota o ṉavi Baṉara ko bazu tisoiko. Ako vo Baṉara inio o iruruputani meme duvevo putani mela ko saevo ni bulo kale sole.

¹⁴ Ṉe visi poso mela, koa omadeuma niumaniumato mekasi ko ereima jari ama ikio ko ereima vo Baṉara ko lotu qoqono poso kasi Jiudia, saizamu vo Jisu Karisito ko maba madu kasi. Koa omadeuma niumaniumato ko me duki ke melai ikema me ṉaviko ṉisa peuru kale ama maba poso ikio duki kemai ikema saizama lotu maba poso se Jiu amu ko lotu tanatanamu,

¹⁵ seke vouvaeveni vo Lekasa Jisu ni se poropita madu, ni eṉe ke niuma-niumaeṉeleni. Seta maba pui ke zoleva vo Baṉara. Ni seta ke kanaekimani kiadama maba poso.

¹⁶ Se inio mata sea maba poso seke dokoliṉelo eṉe kikeveni kai bazuto kale me pui Jiu mu mela kasi vo Baṉara ko pakio ko borikako bazu. Koa keve kale inio seta ke ereka matuma boutare ko kobe kai paloasako kiadama seko sarueko poso seke erekako kiada keru. Ni kokale inio vo Baṉara ko matuma korakorailo ta vairutu pado kobe mai baroa.

Paula ko zario tu vota mata o soipimo se

¹⁷ Ṉe visi poso mela, eṉeta ṉeda pitasia saita mekasi azo, melai pui eṉeko kerukeru kale. Ako eṉeko pitasio kale mekasi azo eṉeta ṉe matu roquemele me ni ṉe matu madoekake tu mata ṉe mela lelo me.

¹⁸ Eṉeta ṉeqa matu zariani ṉela inio tu ṉe vaito mekasi. Aṉa a ṉavi nio lula kubo taku a madoekani lala tu a vaito, melai vo Setani ta o tizaeṉele eṉe.

¹⁹ Eṉeta ṉeqa matu zariake soipimelo, ako meko sidopu ama saevo kale avo inio eṉeta ṉe qovou reketekete Baṉara kasi azo, ni me inio eṉeko zoleilo ko raki mela, ni me inio eṉe ṉe melai zoleiloa mela vo animevo Lekasa Jisu ko tanama kale so keru vo o vaitou keru.

²⁰ Ako me tisoiko eṉe me aikaeṉelani mela ni me zoleṉelani mela.