1 Pita 5 - BAṈARA KO VAIRU AMA LEVELEVEO

Baṉara ko lotu qoqono

¹ Me lotu qoqono ko vilua pikopiko madu mela, aṉata aqa zaria melai bazueko me kama quli aṉako pado ama bulo sate. Ako aṉa melai kala vilua pikopiko lala ni aṉa inio a qeveni lala vo Karisito ko tola ni vou sole. Ni aṉa inio mata aqai zomanoa lala voko ṉaṉaidara vo Karisito o vaitou keru. Nio aṉa inio a bazuemela me

² tu meta mati vailomo vo Baṉara ko lotu qoqono vo Baṉara o katimeleni omadeuvo vo vailo ko maba ta o matu kati vaila ko sipi jari, ako se inio meko koidi madu sole. Ni zarizari emo ni pui me lupaovou mati vailo se, ako ko ikio vo Baṉara oka zariako sole. Ni meta erekomo koa koidi pui takula ko kai zario kale, melai meko tuvevo ama vailo ko zario kale.

³ Ni meta pui mema rauraraurailou sea lotu maba madu kasi se me mati vailani, omadeuvo ruqe ama lekasa poso jari, melai meta uri ama kalo erekomo sekasi, tu seta ke luluekou meko uri ama kalo.

⁴ So inio meta me qovou koa ṉaṉaidara kama mamola ko pui kopa niumailo ama, Jisu animevo Raura kala Vailo ko Maba o katimelo ama vo o vaitou keru.

⁵ Ni koa omadeuma keve kale mea vairu ama maba poso mela ta zorimomo meko qole ama maba poso. Ni mea kiada mela ta me dauvekiniou muli seke zarazaraivani nabulu poso jari. Ako ko Tabu ama Riki kikovevo ta eri nio sole, “Vo Baṉara ta omai kaikuapou seke aikaivani, melai o katimou ko pakiezato sama roquano seke zarazaraivani.”

⁶ Sole meta zarazaraimo me ṉavi vo Baṉara ko matuma pizato ko tanama kale, ni vota o tauvemelou me, ni vota o zolaemelou me o ṉavi o pitoeko ama taku kale.

⁷ Kativomo kiadama meko tiṉoliṉoli, ako vo inio o melati vailani me sole.

⁸ Meta balauvomo ni vailomo, ako mevo kana Setani ta obeta lipia vo o ṉaṉarani laione jari tu o niumaemo kake maba poso.

⁹ Meta vinaimo meko oqu kale ni vati pazokiniomo vo Setani, ako meta meqai nianiia ta meko lotu tamania komia peuru ma peuru kale amu ta ke koa koa omadeuma tolailo meme qoako jari ama sole.

¹⁰ Tuvevo meta me dolailou matu puju ama taku kale. Melai vo Baṉara ta o matu roquemelani me, ni vota lula o nokaemelani me tu meta meqai zomanou voko noqola kama ṉaṉaidara vo Karisito ko mela voukale. Ni meko tolailo ko tova vota o korotimelou me ni o zaubarimelou me, ni o pizatimelou ni o vinaemelou me.

¹¹ Ako vo Baṉara ko ikio koa pizato sole, latau ṉaniu ni ka ṉaniu! Emeni.

Pita ko tovatovama zuvarato sama pesio

¹² Aṉata a rikieka komia puju ama riki mekasi Sailasi ko tauvelo kale. Ni aṉata avai nianiia ta vota kala pado animevo tamania kale ala kerula kala vo Jisu Karisito kale. Aṉata a mela rikita me tu a zaubarimelo me ni a melai bazueko ko quli aṉa a uria kai nianiiako quli, ako komi ta tuvevo ama vo Baṉara ko tauvezato sama roquano sole. So sole meta pataitomo koa tauvezato sama roquano kale.

¹³ Se Babiloni peuru kale ama lotu qoqono ta ke soroeka seko roquano mekasi ako se melai vo Baṉara o pitoemeni sole. Ni Maka aṉavo vairu ala tauvezato ko maba melai o soroeka voko roquano.

¹⁴ Toraekiniomo muli tabu ama roquekinio kale. Ni bule ta ko elou vo Karisito ko maba poso mela tona.