1 Pita 4 - BAṈARA KO VAIRU AMA LEVELEVEO

Besiekomo meko saevo

¹ Vo Karisito ta o tolai voko tupu kale, so sole me melai pizatomo koa omadeuma kerukeru vo Karisito ko jari ama kale, ako vo lula o tolaivani tupu kale ta pui opa erekou ko sarueko sole.

² So sole vairutu azo, meko miduku kale ama saevo kale meta odiziomo vo Baṉara ko vatolo kale, melai pui me ṉaviko zario kale, koko odiemelako ruqe kasi.

³ Ako lula koko paloasako taku kale meta me niumaeke matu kubo taku kutumana kamu ke erekako kalo kale. Meta meqai ṉamuke ko taku ko pauvezato, ni tupu kale ama viluloqu, ni kiada keru me japosapoita ko piza kama ju. Ni meta me ereke ko olavo ama ni ruqeruqe ama kalo ni me ilusike ko beku meko kuvaruvaru ama kalo kale.

⁴ Melai erisaṉa se kutumana kamu ta ke melai vuzeiva me, ako meta pui memai zomana sole se koa ruqe ama kalo poso seke erekako kale, ni so inio seta ke ruqeruqe kasemela me.

⁵ Melai seta ke uria kasa puekou seke erekako ruqe Baṉara kasi voko titizato ko ṉaniu kale, vo lula o inainaovani tu o titizimou se saevomu ni se lula ke vovini.

⁶ Sokale avo inio ko Uri ama Bazu ta ko pikairiovi se voumu kasi melai, tu koa Uri ama Bazu koko pikairiovima sekasi ta ko bokerimo se tu ke saevo auvana kale ama saevo vo Baṉara ko saevo jari ama, rouka seko voukale seta kebeta titiziake kiadama maba poso jari melai.

Kai uria iruruputomo Baṉara ko puaro poso

⁷ Koa taku kiadama quli ko ruvuro ko ta sipole, so sole meta inobe emo ni vailomo tu meta me roveovou vararaito.

⁸ Melai ko matu qulepako quli ta roquekiniomo muli meko pado ama bulo kale. So inio meta me mati odouvikiniou kiada keru meko lolo poso seke sarueko amu mekasi.

⁹ Ni meta baroekiniomo me ṉavio kude meko pade kale puliama ṉuruṉuruo sate.

¹⁰ Ako meta me qoani mela sole vo Baṉara ko azaazama puaro. Ni vo Baṉara inio o mela kaseke me voko tauvezato sama roquano voko katimelo kale koa azaazama puaro. Ni meta nabulu poso jaria mela koko raki meda ka evani mela kai iruruputo Baṉara ko puaro. So sole mea kiada mela ta uri ama nabulu emo ni kai iruruputomo me ṉaviṉavi ko puaro tu kai tauvekiniomo me ṉavi.

¹¹ Ni vo o bazubazuto ala ta okai bazubazutou vo Baṉara ko bazubazu. Ni kala o tauvezato ala ta okai tauvezatou koa pizato vo Baṉara o kativo ama. So keru meme ereka keru komia kiadama quli meta mevai rauraeka inio vo Baṉara. Vo Jisu Karisito inio o bokerimelani me tu me ereko ko quli, ni voko ikio ko ṉaṉaidara ni pizato paito pide ama. Emeni.

Lotu maba o toraeko avo ko tapata

¹² A baerebaere poso mela, meta pui meqai ṉavailou ko matu tola ko imelako tapata poso meme doraekako, ako komi quli ta ko madoeka inio sole meko oqu. So sole meta pui eri kimevou, kama quli vairu ama quli kio kota ereiva, ta pui kimevou.

¹³ Melai meta zoleimo ako meta me qoa sole vo Karisito o koema tola jari ama tola. So inio meta me matu zoleilou so keru vo Karisito o vaitou keru voko pizato ni ṉaṉaidara sate.

¹⁴ Ni so keru se maba poso ke ruqe kasemelou keru me, meko luluevo vo Karisito ko kio kale avo, ta meta maurumaurua mela. Ako ko ikio tuvevo ko ika ko vo ṉaṉaidara kala Auvana Baṉara vo ta obeta eva me tona kio sole.

¹⁵ Ni meta pui ereko ko vouvato, ni kuilo, ni boutare poso, ni pui tamai utu ato edolomu ko iruruputo, tu kai titizio ni taka kovo koko besibesi.

¹⁶ Melai meta me ditiziovou ni me dolailou meko Karisito ko lotu maba elo ko kio kale ta, meta pui qurato melai meta vai ilusikomo vo Baṉara meko melai nokailo vo Karisito ko ṉi.

¹⁷ Ako vo Baṉara ko titizato ko taku ta sipole kota barolou, ni vo Baṉara ko maba madu mela inio kuleto me ditiziovou. Ni koa titizato ta ko taniziovou anime voko maba madu mela kasi, so sole se pui ke zorikani vo Baṉara ko Uri ama Bazu ta maba ṉaloṉaloa tapata ke elou koa titizato komai barolou keru se.

¹⁸ Ko Tabu ama Riki kikolani jari, “Kota matu tapata tu vo sidopu ala maba melai o pakiovou; so sole se kevai kideipani vo Baṉara ni boutare ke erekani ta tuvevo avole seta matu tapata ke elou.”

¹⁹ So sole me tapata me doraekani mela vo Baṉara ko vatolo kale ta beta olamo ereko uri ama iruruputo ni vai keru voko kati vailo meko pado ama saevo. Ako vo Baṉara inio o eremeleni me ni vota pui ukaka opa ikou voko melati vailo me sole.