Biblia Todo Logo
Bìoball air-loidhne

- Sanasan -

1 Pita 3 - BAṈARA KO VAIRU AMA LEVELEVEO


Roroto ko kalo

1 Ni koa omadeuma kalo kale inio me rekoreko poso mela ta me zorimou meko lasive poso. So inio meko lasive poso ta pui kebe tuvevo puekou vo Baṉara ko Bazu melai meko uri ama kalo kale inio meta me lilimou se tu seta ke zorikou vo Baṉara ko Bazu, pulia quli mebe kasekou melai.

2 Ako seta ke kelou sole meko uri ama kalo ni meko matu tava paṉao vo Baṉara.

3 Melai meta pui me ileileilou meko tupu kale ama ileileilo kale, meko tou ko uria ereko kale, ni meko telatelava ko kiako kale, ni meko ileile ama sabosabo kale.

4 Ako meko tuvevo ama ileile ta pui meko tupu ko kupekupe ama, melai kota meko inobe ama ni olomoiza kama auvana poso ko ileile ikio, ko pui kopa paloaso ama. Ni koa ileile kio qulepo ama vo Baṉara kasi.

5 Ako se lulavo ama rekoreko poso Baṉara ko madu, se kevai keruini vo, ta ileile ke eve seko zorimo kale seko lasive poso.

6 Sera ta so inio ko kaevo. Kota ko zorive vo Ebarahami ni kovai nokaekake vota kovo tanala. Sole meta uri ama quli me erekou ni pui meda ka ṉalou meko lasive poso ke roveako mela ereko me, nio Sera ko tuvevo ama meqora poso me elou.

7 Ni koa omadeuvo jari mea lasive poso mela ta me uria kerukeruemou ni omadeu elo me mati elou meko reko poso meko roroto ko saevo kale. Meta meda ma paṉaovou se, ako seta mekasi azo lekuleku amu sole. Melai Baṉara ta o katima se koa omadeuma leveleveo me o katimelako jari ama, tu se ni me ta me qovou koa tuvevo ama saevo paito pide ama voko roquano kale o puariko ama. Meta me erekou komi quli, so inio pulia quli ko tizaekou meko vararaito.


Tolailo sidopu ko ereko kale

8 Ni tovatovama aṉako pesio kale, aṉata eri kiala mekasi. Mea kiada mela ta omadeu elo emo bule kale. Madoekomo tu mati lainikomo edolomu ko duki ni zoleilo me ṉavio kude. Ni tamania jaria roquekinio emo. Ni tauvekiniomo ni pui aikailo me ṉavio kude.

9 Ni kala ta o saruekou mekasi, ta meta pui me besiekou ko sarueko vokasi, ni kala ta o ruqe kasemelou me, melai meta pui mevai besiekou tu me ruqe kasevou vo. Melai meta uri ama pesio kale me mati pesiovou soama maba poso, ako me inio me nokaivani mela sole tu koa kalo kale me qovou vo Baṉara ko mauruto.

10 Ako ko Tabu ama Riki kikovevo ta eri nio sole, “Kala ta oka zariovou zoleilo voko saevo kale, ni oka zariovou kovo uri ama taku, ta vota pui o ruqe pesiovou ni pui o lipalipatou.

11 Vota o vaekou kiadama ruqe ni uri o erekou, ni o matu madoekou tu bule kale o saevou kiada keru.

12 Ako vo Baṉara ta o mati vaila se sidopu amu ni ota ma viqa seko vararaito, melai omai kaikuapa se ruqe ke erekani.”

13 Ni meta me matu madoekou uri ereko, ta puliala inio tapata opa imelou me.

14 Melai seta tapata ke imelou meko sidopu ko ereko kale avo ta, meta matu maurumaurua mela inio. Vo poropita Aisea kiovevo jari, “Meta pui meda va ṉalou kala, ni pui tiṉoliṉoli me elou.”

15 Melai ilusivomo vo Karisito meko bulo kale ako vo inio mevo Lekasa sole. Ni inainaomo kiada keru tu ma rupasikomo seke mela kuiriko amu me tu mema zakaremu puekou meko tuvevo puto sama kerukeru tu kovo noqola kama saevo.

16 Sole meta mema rupasikou zarazarailo ni paṉao kale, ni uri ama upo sate. So inio keta mela ruqe kasekou keru meko uri ama iruruputo, meme erekako meko luluevo vo Karisito ko kio kale, ta ke quratou, seke kelou keru meko uri ama kalo.

17 Ako uri tu animeta me dolailou sidopu ko ereko kale, vo Baṉara ko vatolo ko elou ta, melai maba pui uri tu tolailo ruqe ko ereko kale.

18 Ako vo Karisito ta sidopu ala melai vota o mela vovi animea ruqea mela omadeu taku ko kiada ni vota o mela vovi anime tu o odiemelo anime Baṉara kasi. Ni vota ke vouvaeve tupu ko saevo kale melai ota saeve auvana kale.

19 Ni vo auvana o eva keru inio vota o olake ni o bazubazutake piripiri ama auvana poso kasi se lula ke vovini ko auvana poso kasi.

20 Ni se inio ko se pui kepa zoriveni vo Baṉara Noa ko taku keru. Vo Baṉara ta matu inobea taremo o evake Noa obeta orumata keru ko vaka melai seta pui ke zorivake. Ni pui kubo madu inio se melai siotolu madu ke kiada inio ke amaqeake koa vaka kale ni ke pakiovi koa jukale.

21 Koa ju ko kalo ta bapitaiso jari, ni meko bapitaiso puilo kale inio Baṉara ta o pakiemela me komia taku kale. Melai koa bapitaiso ta pui meko tupu kale ama kaqa tamela ṉamuko kaqe inio, melai kota meko uri ama upo kale ama lilizio vo Baṉara kasi ama. Ni koa kiadama ta so, ako vo Jisu Karisito ta o saeve sole voukale azo,

22 ni vota ota koivi aukale ni vota vovo Mama ko palo rana o eva. Ni sai nio vota oma lekasa pua aukale ama mateana madu ni kiadama pizato sama auvana poso.

The New Testament in the Bilua language, Solomon Islands © The Bible Society of the South Pacific, 1995.

Bible Society of the South Pacific
Lean sinn:



Sanasan