1 Pita 2 - BAṈARA KO VAIRU AMA LEVELEVEO

Jisu inio vo saevola lado jari ala

¹ So sole meta vaekomo kiadama meko ruqeruqe ama kalo ni lipalipato. Ni meta pui se kekai lipalipaitani ko sidopu jari kalo. Ni pui me qonoilou ni pui me ruqe kasemou se edolomu. Meta me vaekou koa kiadama quli meko saevo kale azo.

² Melai meta kai zariomo ko bulebule ama ni tuvevo ama nianiiekato, omadeuvo se molele poso jari se kekai zariani ko susu, ako so inio meta me rapukou meko auvana kale ni me bakiovou.

³ Ako meta lula me doraeveni mela vo Lekasa Jisu ni me qeveni mela ta vota matu uri ala inio sole.

⁴ Vo Lekasa Jisu inio kala saevola lado jari ala, ni vo inio se maba poso komia peuru ma peuru kale amu pui kepa vai zarini. Melai vo inio voa lado vo Baṉara o pitoeveni ako vota matu qulepo ala vokasi sole. So sole meta kuemo vokasi.

⁵ Ni me melai saevoma lado jaria mela, sole meta katiziomo me ṉavi tu vo Baṉara ta o orumumelou me tu auvana kale ama Jelepade jari me elou. Ni meta mata koa Jelepade kale ama tabu ama siama madu jari me elou, tu me qativou vo Baṉara meko auvana kale ama siqasiqa. Ni vo Baṉara ta okai zoleiva koa meko siqasiqa jaria ilusivo vo, ko me Jisu Karisito ko vou ko kio kale me erekako.

⁶ Ako ko Tabu ama Riki kale ta eri nio kiola vo Baṉara sole, “Aṉata a bitoeva nea qulepo ala lado tu vo inio lado viluabara a ivou Jerusalema ma Jelepade kale, ni vo tuvevo o ivo ala vo ta pui opa quratou,” kiola.

⁷ Nea lado ta o matu tauvemela me tuvevo me ivani mela, melai se pui tuvevo ke ivani kasi ta eri nio: “Voa lado se orumato ko maba madu pui kepa vai zarini, vo inio erisaṉa voa qulepo ala lado o evani.”

⁸ Ni ko Tabu ama Riki ta eri nio mata kikolani, “Nei nio voa lado se maba poso tupara o imo ala ni voa ripi vo o pimo ala,” kikolako. Ni seta keta tuparia, ako seta pui tuvevo ke ika sole vo Baṉara kiolani; so inio vo Baṉara ko vatolo kikovevo sekasi.

⁹ Melai me inio voko pitopito ama qoqono mela, ni voko siama madu mela meva nabuluputani mela vo Aikovakova Baṉara, voko tabu ama maba poso mela, ni o ṉaviko jiku mela. Ni me inio vo Baṉara o pitoemeleni mela tu meqai bazutou koa aqasiele ama quli vo o mela erekema. Ako vota o nokaemele sole me kutumana kale azo o ṉaviko aqasiele ama zakaremu kale sole.

¹⁰ Ako lulavo meta pui vo Baṉara ko maba poso mela, ni meta pui meba kai nianiiovi vo Baṉara ko tauvezato sama roquano, melai erisaṉa meta voko mela, ni meta me qoa voko tauvezato sama roquano sole.

Baṉara ko nabulu madu

¹¹ A baerebaere poso, erisaṉa meta pui komia ruqe ama peuru ma peuru ko kunialea mela. So inio aṉata a mela zaivota me tu meda ka balauvou meko tupu kokai zariako ereko, ako komi quli ta ko kati kanaekimou sole meko auvana poso.

¹² Ako se maba poso pui ke tuvevo putani ta iniseana sole meko levoano kale. Ni se inio ke mela kuirikani meta ruqea mela kikelani. So sole meta kai saevomo ko uri ama saevo meko elo kale sekasi, tu seta ke kelou meko uri ama iruruputo. So inio koa ṉaniu vo Karisito o vaitou keru seta kevai ilusikou vo Baṉara koa meko uri ama iruruputo se erisaṉa ruqe ama quli ka kikelako.

¹³ Vo Lekasa Jisu ta o mela zaria me tu meta me zorimou kiadama komia peuru ma peuru ama raura kama maba poso. So sole meta me zorivou vo matu raura kala aikovakova,

¹⁴ ni so jari meta me zorimou sea vilua pikopiko madu vo aikovakova o soroemani. Ako seta ke soroiva tu ke koqotaemo se ruqe ke erekani ni reketekete saṉa ke imou se uri ke erekani sole.

¹⁵ So sole meta uri me erekou, ni so inio se sarube ama maba poso ta pui ke melai kuirikou ruqe ama quli seko kalo pide ama pesio kale. Ako so inio vo Baṉara oka zariani sole.

¹⁶ Ni meta saevomo ruparupasi ama maba poso jari; melai meta pui eri kimevou, “Eṉeta ruparupasia ṉela, so sole ṉe rovea ereko ko ruqe.” Melai meta vo Baṉara ko mabaku emo.

¹⁷ Meta meda ma paṉaovou kiadama maba madu, ni me roquemou seke luluevani vo Jisu, ni meda va matu paṉaovou vo Baṉara kiadamu kasi azo, ni meda va paṉaovou vo aikovakova.

Vo Karisito ko tola ko nianiiekimelako quli

¹⁸ Me mabaku poso mela ta me zorimou meko lekasa poso meko matuma panao kale. Ni meta omadeu zorimo me elou se uri ama lekasa poso, seke baisemelani me, ni se ruqe ama lekasa poso, se tapata ke imelani me.

¹⁹ Ako so keru maba poso ke naquemelou keru me, melai meta pulia quli lula meba sarueke, ni meta meqai pataitou seko naquemelo meko uria kai nianiio kale vo Baṉara ko vatolo, inio vo Baṉara ta mauru o imelou me.

²⁰ Ako meta ruqe me erekou, ti ke ruterutemelou, ni meta inobe meqa elou meko tolailo, ta pulia quli ko kio kale kepa melai rauraekou me. Melai meta uri ama quli ko ereko kale ke rutemelou ni inobe meqa elou meko tolailo, ta ko ikio ko zolevako vo Baṉara.

²¹ Ni ko ikio vo Baṉara o melati nokaekema tu me erekou, ako vo Karisito ta o mela tolai me sole Ni vota o katimele kama podepodeti tu meta me luluekou vo o kaevo.

²² Ako vota puliama sarueko sala ni pui o lipalipatani sole.

²³ Ni se maba poso ta ke ruqe kasevake vo melai vota pui oma besiekake tu mata o ruqe kasemou se; ni so keru maba poso ke tolaeve keru vota pui opa ma korakorai, melai vota ovai kerui vo Baṉara, vo inio vo sidopu ala titizato ko maba.

²⁴ Ako o ṉavi Karisito inio o mela borike animeko sarueko poso voko tolailo ni voukale korosi topi. Vota o ereke ko quli tu animeta me vaekou sarueko sama saevo ni me daniekou kai saevo ko sidopu. Ako voko tabi kale inio meta me urike sole tupu ni auvana kale.

²⁵ Ni lula meta omadeuvo ko mumamuma kama sipi jaria mela, melai meta lula me vaita tu me luluevou vo Jisu, vo o melati vailani me omadeuvo vo vailo ko maba ta o kati vaila jari voko sipi poso.