1 Koriniti 8 - BAṈARA KO VAIRU AMA LEVELEVEO

Beku poso kasi ko puariziako sailao ko kuimanao

¹ Erisaṉa, ko me meqa kuimanaovako meko riki kale koa sailao poso koko katiziako beku poso kasi ko kalo. Ta tuvevo ko animea kiada mela lotu maba mela ta nianiio samela. Melai animeko nianiio ikio ko puratikako ko aikailo, melai roquano ikio ko tauvemelako anime.

² Ni kala maba ta vo inio vo matu nianiiola kiovo ala voko kerukeru kale, vota pui nio okai baroa koa nianiio koko male tu kai nianiio.

³ Melai voa maba vo o roquevani vo Baṉara, vo inio vo Baṉara ovai matu uria nianiiani.

⁴ So sole koa sailao beku poso kasi ko katiziako ko kuo kale avo: animeta meqai nianiia ta koko tuveano ta vo beku ta puliala quli; ni me baqumuka ta omadeu Baṉara o kiada inio inovoana.

⁵ Ni ikoana tea aukale ni miduku kale koa kubo quli baṉara ni lekasa ka kikelako quli,

⁶ so melai animevo Baṉara ta omadeu pado inio, animevo Mama. Vo inio o erekeni kiadama quli ni animeta me jaeva vo kaqe. Ni animevo Lekasa ta omadeu pado inio, Jisu Karisito. Vokale inio ko erei kiadama quli ni animeta me jaeva vokale.

⁷ Melai pui kiadama maba poso inio ke paqumuka komia tuveano. Ako kake maba poso lula rosi ama taku malaṉaja kekai evani ko beku poso ta seko kuo kale ko soama sailao seta kebe kerukerueka ko soama sailao ta beku ko ikio kio. Seta pui ke rovea uria pitasiko sidopu ni sarueko nio ke lainika ta koa sailao ta kaqa ko ima Baṉara ko vilu kasa.

⁸ Melai ko sailao ta pui ko rovea sipole imelo anime vo Baṉara kasi. Animeta pui meba kai toraekou kama quli pui me quovou ta, ni mata pulia quli meba kai kovou me quovou keru koa sailao.

⁹ Sole meko utu vuato ta pui kaitikaiti ama. Melai meta kerukeruemomo sea maba poso se lekuleku ama kerukeru samu, se sarueko ka kikelani beku kasi ko puariziako sailao ko kuo tu pui memai pikou se sarueko ka kikelako quli kale.

¹⁰ Ako kala maba vo lekuleku ama kerukeru sala ta o kelou ṉoko vuato beku ko jelepade kale ama, kota ko zarizarivou vo tu vota o kuovou ko beku poso kasi ko katiziako sailao.

¹¹ Nio koa ṉoko “nianiio” ta ko maba niumaevou nea lekuleku ala maba, vo Karisito ova vovini!

¹² Komia keve kale kude meta me jaruekou vo Karisito kasi meko saruemo kale se meko lolo poso ni tama niumaeko kale seko lekuleku ama kerukeru.

¹³ So sole aṉako kuo ko beku kasi ko katiziako sailao ta sarueko saṉa ko ivou aṉavo lotu kale ala lolo ta, aṉata maba pui mata aba tova kuovou koa sailao, tu aṉata pui a jouraevou aṉavo lolo sarueko kale.