1 Koriniti 6 - BAṈARA KO VAIRU AMA LEVELEVEO

Se lotu kale amu ko titizikinio

¹ Esa kalaṉa ta kama aivekinio salaṉa kala ṉovo lotu kale ala lolo kasi. Noi sole inio ṉota pui ṉo qurata ti ṉo vati ola vo kutumana kala titizato ko maba kasi, ni pui ṉo vati ola vo Baṉara ko maba poso kasi tu ke korotiko komia tapata?

² Ṉota pui ṉo baqumuka ko vo Baṉara ko maba madu mela inio me ditizimo amu komia peuru ma peuru kale amu kio? Noi nio, meta me ditizimou peuru ma peuru kale amu, melai meta pui me male korotiko kama silo ama tapata kio?

³ Meta pui meqai nianiia ko anime inio me ditizimoa mela se mateana madu kio? So sole animeta maba me male tu me qorotiko komia saevo kale ko ereivako quli!

⁴ Nio soama quli ko puratou keru, ta noi nio ko meta me qati ziovou inio korotikole se lotu maba madu pui kemai keruani kasi kio?

⁵ Aṉata so mela kiala a quratimela! Noi nio? Puliala me azo nianiiola vo o roveani korotiko ko quli ko ereivako me ṉavio kude mea lotu maba poso mela, kio?

⁶ So inio lotu maba ta o boriva vovo lotu tamania kale ala titizikinio kale tu se pui ke tuvevo putani inio ke ereko ko titizato!

⁷ Koa meko borikinio titizikinio kale ta pui ko male meko lotu saevo kale. Noi sole inio meta pui me akoema se ruqe ke erekani mekasi? Noi sole inio meta pui me zariema tu ke ubeubemelo? Ko ikio meme malezikako kalo sole!

⁸ Melai meta me jaruekiniani mela me ṉavio kude ni me ubeubezatani mela me ṉavio kude me lotu tamania mela!

⁹ Meta pui nio meqai nianiia se ruqe amu ta pui kepa amaqeovou vo Baṉara ko lekasa puo kale? Meta me uria paqumukou komi; pui se olavo amu, ni pui seke ilusikani ko beku ni pui seke zavematani ni pui se lasive amu ke ṉavio kude ke pauvekani ruqe ama iruruputo,

¹⁰ ni pui seke kuilani, ni pui se viluloqu ke evani ni pui se piza kama ju doilili kekai evani, ni pui se kemai tirazani edolomu, ni pui se kuilokuilo amu ta kepa roveovou amaqeo vo Baṉara ko lekasa puo kale.

¹¹ Kake mela me ta soa mela lulali. Melai erisaṉa meta lula saqasaqa me evani mela sarueko kale azo, ni meta lula Baṉara ko tabu ama maba poso me evani mela, ni meta lula sidopu me evani mela Baṉara ko kelokelozato kale animevo Lekasa Jisu Karisito mela voukale ni vo animevo Baṉara ko Tabu ama Auvana melai elo kale me. Taka papariomo ruqe ama iruruputo ko pauveko

¹² Kala ta eri kiovou, “Kiadama quli ta kola zarizia aṉa tu a ereko.” Tuvevo, melai pui kiadama quli kio kopa tauveṉou ṉo. Aṉa melai ada roveo nio so kio, “Kiadama quli ta kola zarizia,” kiavo, melai aṉata aqai nianiiovou ta pui aba roveovou vaeko ereko kama quli, inio aṉata pui aba erekou ko quli.

¹³ Kala ta mata eri kiovou, “Baṉara ta o ereke ko sailao tu siapa kaqe, ni vota o ereke ko siapa tu sailao kaqe.” Kota tuvevo melai vo Baṉara inio o epeziko ala koa omuqa quli. Baṉara ta pui opa katimele ko tupu tu kai pauvezato kaqe, melai va nabuluputo kaqe vo, ni animeta voko mela.

¹⁴ Vo Baṉara ta o saevive vo Lekasa Jisu voukale azo, ni so jaria saevimelo inio o elo avo ko anime voko pizato kale.

¹⁵ Meta pui meqai nianiia ko me inio kama kobu vo Karisito tupu melai kjo? Meta vo Karisito ka kobu tupu mela, so sole pui ko male tu meta meqai zomano ko takuto. Maba pui ko male ko so!

¹⁶ Ma esa meta pui mevai nianiia kala maba vo okai zomanani ko takuto ta omadeu o kati eva koa sasave, kio? Ako Tabu ama Riki ta ko uria kaseka ko eri sole, “Omuqa kidi ta omadeu qo elou.”

¹⁷ Melai vo omadeu o evani o ṉavi vo Lekasa Jisu sase ta omadeu auvana o eva vo sase.

¹⁸ Taka papariomo ko zave ni ruqe ama iruruputo ko pauveko. Kama sarueko poso vo maba o erekako ta pui matu ruqe kopa tava ikou voko omadeu vati elo vo Karisito, melai voa maba vo o erekani ko zave ni ruqe ama iruruputo o pauvekani ta maba o niumaeka voko omadeu vati elo vo Karisito.

¹⁹ Meta pui meqai nianiia ta meta vo Tabu ala Auvana ko Jelepade mela inio, vo o evani meko bulo kale ni vo Baṉara o katimeleni me kio? Pui meko mela inio ko me, melai vo Baṉara ko mela.

²⁰ Ako meta lula o tatabaraemeleni mela vovo Meqora ko voukale. So sole meta vai ilusikomo vo Baṉara meko saevo.