1 Koriniti 5 - BAṈARA KO VAIRU AMA LEVELEVEO

Vailikinio ruqe ama iruruputo ereko lotu qoqono ko poro kale ama

¹ Zio, koko taliako pesio ta so kikola me tona ta ikoana ko vailikinio ruqe ama iruruputo ko ni kota se kutumana kamu melai pui kepa ereko ama ikio. Koa pesio ta so kikola kala maba mekale ala ta o kati maroṉa voko sasa niania, o mama ko omuqama reko.

² Koa matuma boutare ta kobeta ereiva mekasi, melai inio meta meda raurarauraivani mela! Meta me male tu komia kalo ta duki ko imelo, ni voa maba vo o erekani ko quli ta saqorivomo meko lotu qoqono kale azo.

^3-4 Aṉata vaṉa abeta eva mekasi azo, melai aṉata abeta eva mekasi aṉako auvana kale; ni omadeuvo aṉata abeta eva jari mekasi, vo animevo Lekasa Jisu ko ṉikale aṉata lula a ditiziva voa maba vo o erekani koa matuma ruqe. So keru meme badoilou keru, ni aṉa a melati zomanou keru padoilo me aṉako auvana kale, animevo Lekasa Jisu Karisito ko pizato sate,

⁵ meta me luavivou nea maba Setani kasi tu voko tupu kale ama zario ta ko epezou voko tolailo kale, inio vota o pakiovou vo animevo Lekasa Jisu okai vaito ama Ṉaniu kale.

⁶ Meta pui me male aikailo! Meta meqai nianiia koa pesio so kikolako, “Matu silo pala isiti kio ko rovea rapukiko ko palava volevole.”

⁷ Meta saqorivomo voa sarueko sala maba meko lotu qoqono kale azo, inio voko boutare ta pui mekasi ko elou. So inio meta omadeuvo ko vairu ama palava volevole jari me elou ko isiti pide ama. Ako meta vairu ama saevo samela Karisito kale sole meta pui me male tu sarueko. Omadeuvo se Jiu amu ta kekai zoleiva seko Alokato ko ṉojola jari, animeta me male tu kai zoleilo. Ako animevo Alokato vo ṉojola ta lula o inainaiva, vo Karisito, vo inio animevo Alokato ko Sipi Meqora, ta lula siqasiqa o eveni sole.

⁸ So sole animeta me male kai zoleilo vo Karisito ko vou anime kaqe se kekai zoleiva jari seko Alokato ko ṉojola. Omadeuvo seta ke kie ko isiti pide ama bereti jari animeta me male tu sidopu me elo ni me qaseko ko tuveano, ni pui me ereko ko ruqe ni sarueko.

⁹ Aṉako riki kale ko lula a rikiekema mekasi ta a bazuemele me tu meta pui me zomanou seke pauvezatani ni seke ruqeruqetani kasi.

¹⁰ Melai aṉata pui aba kaseme se kutumana kamu seke pauvezatani ni seke ruqeruqetani ni se viluloqu ke evani ni se kuilokuilo amu ni se beku ke ilusikani. Tama soqoilo kale se inio meta maba me vaekou komia peuru ma peuru sole!

¹¹ Ko aṉa a qasekema quli aṉako leta kale mekasi ta meta pui me vati baerebaereovou kala vo eri kiovo ala, “Aṉa inio meko lotu tamania kalea lala,” kiovo ala maba melai vota pauvezato ma ruqeruqeto ko maba inio, ma viluloqu o evani, ma beku o ilusikani, ma maba okai ruqe pesiani, ma saposapoito ko maba, ma kuilokuilo ala. Meta maba pui me zomanou vuato soala maba sase.

^12-13 Ako aṉata puliama aṉako iruruputo tu aṉata a ditizimou se pui lotu maba poso. Baṉara inio o titizimou se. Melai meta maba me ditizimou nio se meko lotu qoqono kale amu! Ko Tabu ama Riki kikolani jari, “Saqorivomo vo ruqe ala maba meko poukale azo.”