1 Koriniti 4 - BAṈARA KO VAIRU AMA LEVELEVEO

Karisito ko apositolo madu ta voko nabulu madu

¹ So sole meta kerukerueṉelomo eṉe apositolo madu ṉela ta vo Karisito nabulu ṉela pala, voko tauvezato ṉela vo o ṉelai keruani ṉela tu ṉeqai bazubazuto ko omele ama tuveano Baṉara ko.

² Ko quli koka zariako quli nabulu poso kasi ta seta kerula kamu ke elo seko lekasa madu kasi.

³ Ni aṉata pui a qerukerueka ko me ma edoloma maba poso ko titizilo aṉa. Ako a ṉavi melai pui a rovea kelo ni titiziko a ṉavi tonama quli sole.

⁴ Aṉata pui a lainika kama aṉa tonama sarueko, melai kota pui ko tuvevo pueka ko aṉako maba sidopu elo. Vo Baṉara o kiada inio o roveani ereko ko titizato aṉa tona.

⁵ So sole meta pui me ditizatou puliako koko tutututuki ama taku baro. Ko tuvevo ama titizato ta ko ereilou so keru animevo Lekasa o kilou keru. Vo inio zakaremu o iko ala se maba poso ko mutamuta kale ama kerukeru ni vatolo. Ni animea kiada mela ta meqai okotou kovo animeko male ama ilusato Baṉara kasi azo.

⁶ A qaka ni visi poso, aṉata a rikieka komi quli a ṉavi ni Apolosi ko kaseqelako quli tu a dauvemelo me tu eqeta meko mamola jari qe elo, tu eqe kale meta me vakakatou ko bazu ko kasekako quli, eri kikolako, “Meta luluekomo ko korokoroti ama bazu poso.” Puliala ṉa ta ṉovai rauraraurailou kala maba mata kala kasi azo.

⁷ Ako lala inio raura o iṉe ṉo edolomu kasi azo? Ni pui vo Baṉara inio o katiṉeni ṉo kiadama quli ko ṉoṉo ṉeamukako quli, kio? Zio, vokasi azo inio ṉo qoe koa kiadama, nio noi sole inio ṉota ṉoda aikaiva, ni ko quli ṉoṉo ṉeamukako ta pui katizato jaria kerukerueko ṉo eva?

⁸ Meta pui aikailo! Meta lula me qoa koa kiadama azaazama iruruputo ko pizato Tabu ala Auvana o puarikake kimelani mela. Meta vo Karisito lula o vaita jari me qavani mela ni meta lula me lekasa puani mela vo sate kimelani mela, ni eṉeta pui soa lekasa puilo ṉe evani ṉela. Uriavo, aṉata a mela zaria me tu meta tuvevo avole lekasa inio meda eve, ako so tea eṉe melai ṉeda zomano nio lekasa elo me sase!

⁹ Ako aṉako kerukeru kale ta koko tuveano ta omadeuvo vo Baṉara ta zara o iṉela jari eṉe apositolo ṉela, omadeuvo piripiri ama kana madu seke vouvaemo amu jari se solodia madu ke rajaemani seko tova peuru kale; ni kiadama peuru ma peuru kale ama mateana ni maba ta ke toiritoiriṉela ni ke ṉelai balebaleita jari eṉe.

¹⁰ Ako meko kerukeru kale eṉeta sarube amu ṉela vo Karisito vai nabuluputo kale, melai inio meta nianiio mela vo Karisito vai nabuluputo kale kimela; eṉeta lekuleku melai meta piza kimela; eṉeta zara kamu ṉela, melai meta raura kamu mela kimela!

¹¹ Ti kobeta baroa komia taku kale melai eṉeta ṉeda luapa ni ṉeda rokauva ni ruaja suma kale ṉe qiazaita ni maba madu ta ke pazoṉela, ni eṉeta puliama ṉisa pade saṉela,

¹² ni eṉeta ṉe ereka ko ṉase kale ama iruruputo. So keru mauluto ko ṉela loa keru, eṉeta ṉe besieka ko mauruto, ni so keru niumaniumato kale ṉe eva keru, eṉeta ṉe ibua,

¹³ ni so keru ruqe kaseṉelo ke eva keru eṉe, eṉeta ṉeda opata roquano sama pesio kale. Melai eṉeko ṉelai kaikuapo ta kokai paloasa komia miduku kale kekai kideipako quli, eṉeta omadeuvo votivoti jari miduku topi ama ti kobeta baroa komia taku kale.

¹⁴ Aṉata a rikieka komi mekasi, pui aṉako quratimelo me ko kio kale, melai a qatimelo kama tauvezato sama bazu a ṉisa meqora poso jaria mela a roquemelani mela.

¹⁵ Ako meta mebe ṉeamumou toni vuro meko vilua pikopiko madu meko lotu saevo kale, melai omadeu maba inio mevo mama jari ala. Ako meko omadeu vati elo vo Jisu Karisito kale ta aṉa inio mevo mama jaria lala a borikeni lala ko Uri ama Bazu mekasi.

¹⁶ So sole aṉata a basemela me, tu meta luluekomo aṉako kalo.

¹⁷ Sokale avo inio aṉata a joroeva vo Timoti mekasi, vo aṉa a roquevani ni kerula kala meqora jari ala animeko omadeu vati elo vo Lekasa Jisu kale. Vo inio o mela kerukerueko ala koa kalo aṉa a luluekako ko vairu ama saevo kale omadeu vati elo kale vo Jisu Karisito, ni ko aṉa aqai nianiiekatako quli kiadama lotu qoqono poso kasi kiadama zae poso kale.

¹⁸ Kake mela me ta lula meda raurarauraiva, ako meta so kimela, aṉata pui a qilou Koriniti soipimelole me kimela.

¹⁹ Melai vo Baṉara o zarielou nio aṉata pui vaṉa a mela barolou me, nio aṉata aqai zariovou kelo nia maba poso ta Baṉara ko pizato samu inio, ma pesio pala ko kiada.

²⁰ Ako animeta me qea ta vo Baṉara inio o lekasa puani maba ko saevo kale, pui voa maba ko pesio kale, melai vo Baṉara ko pizato voko saevo kale ko puratako kale inio.

²¹ Loma ikio meqa zariako ko me? Aṉata a qilou tu aba pazomelo poru kale, ma roquano ni vanonorito sase kio?