1 Koriniti 15 - BAṈARA KO VAIRU AMA LEVELEVEO

Vo Karisito ko mata saevo voukale azo

¹ Erisaṉa aṉata aqa zaria tu melai kerukerueko me a qaka ni visi poso mela vo Jisu ko Uri ama Bazu ko aṉa aqai bazubazutema mekasi, koa Bazu ko meme ṉeamukema, ni pataito lojolo meqai evema.

² Ko ikio koa Bazu koko pakiemelo ama me, pizaka noqoeko mebeta elou ta. Melai meta edolovo me ikou meko tuvevo puto inio meko tuvevo puto ta pui kopa tauvemelou me.

³ Aṉata a melai pakeke me ko quli ko lula aṉa a qoako a ṉavi koa matu qulepo ama bazu, eri kikolako: Vo Karisito ta o mela vovi animeko sarueko poso kale avo, Tabu ama Riki kikolani jari;

⁴ ni seta ke mutavake vo, ni vota o saevake voukale azo zoukema ṉaniu kale, omadeuvo Tabu ama Riki kale lula ko pidokiovi jari;

⁵ ni vota o puratake vo Pita kasi ni koko tova ta sea toni omuqa apositolo madu kasi;

⁶ ni vota mata o puratake sike paizana va maba madu kasi seke luluevani vo; kake ta lula keta vouva, melai kubo madu se azo ta kebeta saeva;

⁷ sai kazo inio vota o puratake vo Jemisi kasi, ni koko tova inio sea kiadamu o apositolo madu kasi.

⁸ Koko tovatova inio mata aṉa kasi vota o puratake, omadeuvo aṉata kuvaruvaru ama puliako alilo ko ṉamuivako meqora jaria lala.

⁹ Ako aṉata matu siloa lala sea apositolo madu kalea lala sea kiadamu kasi azo sole ni pui koko male aṉa tu apositolo ṉi lai nokaeko, ako aṉa inio a niumaekeni lala vo Baṉara ko lotu qoqono sole.

¹⁰ Melai vo Baṉara ko pakiezato sama roquano kale ta apositolo inio o ila aṉa, ni voko apositolo ilo aṉa ta kalo sama. Ako aṉata a matu iruruputa ni aṉata aqai paloasa mata sea kiadama apositolo madu ko iruruputo sole. Melai koko maba tuveano ta kota pui aṉako pizato kale inio aṉata a ereka koa iruruputo, melai vo Baṉara ko pakiezato sama roquano kale ko kuevako pizato ikio.

¹¹ So sole esa aṉa inio a melai bazuba-zuekeni lala koa Bazu, ma esa se inio ke melai bazuekeni ko, ta puliama koko azavo; ko tisoiko ikio koa Bazu eṉe ṉeqai bazubazutema ni ko me tuvevo me ikema.

Animeko mata saevo voukale azo

¹² Sole eṉe ṉeqai bazubazutako ta vo Karisito mata saevo voukale azo, nio noi sole inio kake mela ta so kimevou, puliama mata saevo voukale azo kopa elou, kimevou?

¹³ Ako kota puliama mata saevo ko elou, so tea vo Karisito ta pui mata opa saeve voukale azo;

¹⁴ ni vo Karisito ta pui opa tova saeve voukale azo tea pulia quli kio eṉeko Bazu ni meko tuvevo pueko koa Bazu melai puliama quli kio.

¹⁵ Ni Baṉara ta pui opa saevive vo tea, eṉeta lula ṉe baqumuiva ta eṉe inio ko ṉevai lipalipatani ṉela vo Baṉara ako eṉeta lula ṉe qaseka ta vota o saevive vo Karisito voukale azo; melai se voumu ta tuvevo avole pui ke saeva voukale azo tea, vota pui inio opa saevive vo Karisito voukale azo.

¹⁶ Ako se voumu ta pui kepa saevou voukale azo tea, vo Karisito ta pui inio opa saeve mata voukale azo.

¹⁷ Ni vo Karisito ta pui opa tova saeve voukale azo tea, meko tuvevo puto ta utu ama quli, ni meko sarueko ta kobeta eva me tona.

¹⁸ Ni so tea se lula ke vouvani vo Karisito kevai oquani melai noqola tolailo keta eva.

¹⁹ Animeko vai keru vo Karisito ta ko tauvemelou anime komia miduku kale ama saevo kale pala tea, animeta maba matu olaquavoa mela inio kiadama maba poso azo.

²⁰ Melai koko tuveano ta vo Karisito ta lula ota saeve voukale azo ni ko ikio ko tuvevo pueka ko se lula ke vovini ta mata keta tova saevou.

²¹ Ako kala maba inio o baroekikake ko vou, so jari nio kala maba inio mata o baroekika ko mata saevo voukale azo.

²² Ako sea kiadamu ta lula ke vovi seko omadeu toutou vati elo kale vo Adami, ni so jari nio sea kiadamu ta mata ke saevou voukale azo seko omadeu vati elo kale vo Karisito.

²³ Melai kalakala o ṉaviko taku kale inio vota o roveovou mata saevo. Karisito ta sevo kulekuleto ala vo o tuvevo puekani seko mata saevo, ni so keru voko mata vaito keru inio se kevai oquani vo ta mata ke saevou.

²⁴ Ni koko paitopaito kale vo Karisito ta o koqotaemou kiadama koko lekasa puako ziolo poso, koa azaazama pizato sama, ni vota o kativou vo Baṉara Mama kiadama quli ko lekasa puo.

²⁵ Ako vo Karisito ta o lekasa puovou ti kobeta barolou so keru vo Baṉara o koqotaemou keru kiadama kana ti o vaemou keru vo Karisito ko pizato ko vima.

²⁶ Ni ko tovatovama kana koko koqotailo ama ta vou.

²⁷ Ako Tabu ama Riki ta so kikola sole, “Vo Baṉara ta o vaekou kiadama quli vo Karisito ko pizato ko vima.” Uria zakaremu ko ika komia pesipesi “kiadama quli” ta vo Baṉara ta pui okai zomana, vo lula o vaekeni kiadama quli vo Karisito ko pizato ko vima.

²⁸ Melai so keru kiadama quli ta lula vo Karisito ko pizato ko vima ko eva keru, o ṉavi voa Meqora ta o elou o ṉavi Baṉara ko vima, vo o vaekeni kiadama lomaloma Karisito ko pizato ko vima, ni o ṉavi Baṉara ta okai lekasa puilou koa kiadama.

²⁹ Zio, kerukeruemomo sea maba poso se kekai bapitaiso puivani se puliako bapitaiso elo ke vouvani ko bapitaiso. Noi sole inio seta so ke kavani? Ako tuvevo ko elou, kake kikelani, ko se voumu ta pui kepa saevou voukale azo kio tea, noni kale inio seta kekai bapitaiso puiva se puliako bapitaiso elo ke vouvani ko bapitaiso?

³⁰ Ni mata so tea, noi sole inio eṉeta ṉebeta eva tapata kale kiadama taku poso kale?

³¹ Koe, a qaka ni visi poso, aṉako elo vou ko ededeu kale kiadama ṉaniu kale ta tuvevo, omadeuvo aṉako mela zoleilo me ta tuvevo jari, ko animeko omadeu vati elo vo animevo Lekasa Jisu Karisito ko katilako aṉa.

³² Aṉata a mati kanaekinie se ruqe ama maba poso se piru ama biana poso jaria pazokinio ke lati eveni Epesasi peuru kale, melai puliama mata saevo ko elou nio loma ikio aṉata aqai kovou? Se voumu ta pui mata ke rovea saevo voukale azo tea, animeta mebeta zio kai saqao ko saevo, ako lea nio meda vouvou muli sole.

³³ Meta pui saruilo, ako “ruqe ama baerebaere poso ta ruqe keta ṉa ikou ṉoko sidopu ama kalo” sole.

³⁴ Kai vaitomo meko sidopu ama kerukeru ni epezomo lulueko ko sarueko sama keve poso. Aṉata a bazuemelou me tu kota ko quratimelou, ko kake mela ta pui nio mevai nianiia vo Baṉara sole.

Noni ama tupu ikio seke mata saevo amu ke kovo ama?

³⁵ Kake ta eri kikevou, nonia saevo inio mata ke elou seke vouvani? Noni ama tupu ikio ke kovo ama?

³⁶ Kota sarube ama kuimanao! So keru ṉoṉo bapava keru kala rui miduku ko omele, ta pui opa roveovou qotupo puliako vou.

³⁷ Ni ko ṉoṉo bapakako ta pui ko ikio koa pado ama qotuqotu koko qotupo ama, melai kota sisu pala ikio, esa vuiti ko rui esa ma kama edoloma rui esa.

³⁸ Baṉara ta o puarika koa rui koa qotuqotu vo oka pitoekako ni vota o okotika epamuko koa azaazama qotuqotu ko ṉaviṉavi ko tuvevo ama ereere kale.

³⁹ Kiadama saevoma quli ta edoedoloma marabau sama, ko maba ta edoloma marabau sama, ko ariku kiti ama biaṉa poso ta edoloma, biaṉabiaṉa ko akazako ta edoloma, niuniu ta edoloma.

⁴⁰ Ni ikoana ko aukale ama quli ni miduku kale ama. Ko aukale ama quli ko keṉoro ta edolovo miduku kale ama quli ko keṉoro kasi azo.

⁴¹ Vo ṉaniu ta o ṉaviko keṉoro sala ni kaboso ta kama pado keṉoro, ni ko suti poso ta edoloma keṉoro poso sama. Ni koa suti poso ko valuvalu melai edoedoloma keṉoro ni olaupo.

⁴² Mata so jari nio ko kalo avo so keru se voumu ke saevou keru voukale azo. So keru ko tupu ko mutaiva keru kota ko sapeovou, melai maba mata o saevou keru inio vota noqola kama tupu saṉa o elou.

⁴³ So keru ko tupu ko mutaiva keru kota ruqea kelo ama ni lekuleku, melai so keru maba mata o saevou keru vota olaupo ama ni piza kama tupu saṉa o elou.

⁴⁴ So keru ko tupu ko mutaiva keru kota komia miduku kale ama saevo ko malezikako tupu pala, melai so keru maba mata o saevou keru vota kama pado tupu vo Baṉara sase ama saevo ko malezikako saṉa o elou. Zio, ikoana komia miduku kale ama saevo ko malezikako tupu, so sole koa Baṉara sase ama saevo ko malezikako tupu ta mata ko elou.

⁴⁵ Ako eri nio ko Tabu ama Riki kikolani sole, “Vo kuleto ala maba Adami ta o ereivake ni saevola maba o evake.” Melai vo tovatovala Adami, vo inio vo Jisu, voa auvana vo o katimani ko vairu ama saevo.

⁴⁶ Keatini, ko miduku kale ama tupu ikio kuleto ama; saita inio ko Baṉara sase ama saevo ko tupu ta ko besieka.

⁴⁷ Ni vo kuleto ala Adami ta miduku kale o erei. Melai omuqala Adami ta o kuevi aukale azo.

⁴⁸ Ni se miduku kale ke evani ta omadeuvo vo o ereini miduku kale jari ama tupu samu. Ni se aukale ke evani ta omadeuvo vo o kuevini aukale azo jari ama tupu samu.

⁴⁹ Erisaṉa animeta voa miduku kale o ereini maba jaria mela, melai tova inio animeta me elou voa aukale azo ala maba jari.

⁵⁰ Ko aṉa so ka kialako, a qaka ni visi poso, ta animeko marabau ni dara kale ama tupu ta kota sapeovou ni kota pui kopa roveovou kai zomano vo Baṉara ko lekasa puo kale, ko paito pide ama.

⁵¹ Aṉata a melai bazuekou kama pado quli ko lula mutamuta kama ko evema; animeta pui meba paitou vou muli, melai so keru tovatovama kuvili ko kelaovou keru, animea kiada mela ta me besiziovou vairu ama saevo kale.

⁵² Kota matu taukavole inio ko ereilou, vilu ko simoto tiniama taku kale. Ako so keru ko kuvili ko kelaovou keru se voumu ta ke saevou voukale azo ni seta mata pui kepa tova vouvou, ni animea kiada mela ta me besiziovou.

⁵³ Ako animeko lekuleku ama tupu koko roveako sapeo ta ko besiziovou ni noqola kama ko elou.

⁵⁴ Nio so keru komia lekuleku ama tupu poso noqola kama ko elou keru nio tuvevo ko elou ko Tabu ama Riki kikolani, ko eri; “Ko vou ta koqo kota eva ti kota ruvura!”

⁵⁵ “Lai ta vou ko koqotato sama pizato? Lai ta koko pizato tu ko tolato?”

⁵⁶ Vou ko tolato ko pizato ta sarueko kale azo inio ko kueva, ni ko sarueko ta ko koa koko pizato Mosese ko Bazu kasi azo.

⁵⁷ Melai me ilusivo vo Baṉara vo o katimelani ko koqotato sama pizato vo animevo Lekasa Jisu Karisito kale!

⁵⁸ So sole a roquemelani kaka ni visi poso mela meta pizatomo, ni pataitomo. Meta riteraite emo meko va iruruputo kale animevo Lekasa, ako meta meqai nianiia ko meko va nabuluputo vo ta kiada keru ta epa sama ikio.