1 Koriniti 14 - BAṈARA KO VAIRU AMA LEVELEVEO

Tabu ala Auvana o puarikako pizato poso ko bazu

¹ Meta luluekomo ko roquano ko keve, ni meta kai dikidauputomo Tabu ala Auvana o puarikako pizato poso. Melai vo Baṉara kasi azo ama bazu poso kai pesio ko pizato ikio qulepo ama tu meta kai dikidauputomo.

² Ako vo o kasekani ko pui okai nianiiako pesio kale ama bazu ta pui o pesia edolomu kasi melai vo Baṉara kasi inio o pesia, ako puliala ta o paqumuka vo kiolani sole. Vota o kaseka mutamuta kama quli vo Auvana ko pizato kale.

³ Melai vo o kasekani vo Baṉara kasi azo ama bazu maba madu kekai nianiiako pesio kale ta o pesia maba poso kasi ni o katima ko tauvezato, ni zuvarato, ni patukato.

⁴ Ako vo o pesiani maba poso pui kekai nianiiako pesio kale ta o tauveiva o ṉavi pala, melai vo okai bazutani kama vo Baṉara kasi azo ama bazu ta o rovea tauveko ko pado ama lotu qoqono sole.

⁵ Aṉata a mela zaria mea kiada mela tu meta me besiovou koa pui meqai nianiiako pesio kale, melai aṉako matuma zario ta meta me qovou koa pizato vo Baṉara kasi azo ama bazu kai bazuto ko. Voa maba vo okai pesiani ko pui ko paqumuako pesio pui o pepelikou koa pesio kikolani, tu koa pado ama lotu qoqono ta ko tauveilo, nio voa maba vo o kasekani vo Baṉara kasi azo ama bazu ta obe vai qulepa vo.

⁶ A qaka ni visi poso mela, so keru aṉako kilo keru mekasi ta aqai pesiovou ko pui meqai nianiiako pesio ta kota ko tauvemelou me? Pui! Maba puliama tauvezato meba tala kovou, aṉa pui a qasekou ta kama vo Baṉara kasa ola ikema quli ma kama nianiio ma kama vo Baṉara kasi azo ama bazu, ma kama nianiiekato sama quli.

⁷ Omadeuvo ko puliama saevo sama quli jari, komi ke puzekako ketaketa ni mike jari ama kerao ko lomaloma, ta pui korotoa kelato ko elou tea, puliala inio opa paqumukou koa kera ko kelaovako.

⁸ Ni esa kala pazokinio ko maba vo o kelaekani ko puzepuze ketaketa ta pui o uria kelaekou tea, puliala inio opa roveovou inainao tu vota o zio pazokinio kale.

⁹ So jari nio meta me besiovou pui meqai nianiiako pesio kale ta lala inio o roveovou paqumuko ko quli meme qasekako quli? Meko pesio ta kota utu rukuilou.

¹⁰ Peuru ma peuru ta kubo azaazama pesio sakoi, ni kiadama koa pesio poso ta koko kalo sama.

¹¹ Melai aṉata pui a baqumukou koa pesio ko kalo tea, voa maba vo okai pesiani koa pesio ta kala pakepakeo maba aṉa kasi ni aṉa melai kala pakepakeo maba lala vokasi.

¹² Meta meqai zariani mela kovo Tabu ala Auvana ko pizato, sole meta madoekomo tu kai iruruputomo koa pizato koa keve poso kale koko tauveko ama ko lotu qoqono.

¹³ Voa maba vo okai pesiani pui okai nianiiako pesio kale ta o vararaito tu o paseko ko bokao tu oma pepeliko se lotu qoqono ko quli vo okai pesiako ko kio ni kalo.

¹⁴ So keru aṉa a vararaita keru koa edoloma pesio kale nio aṉata a vararaita Tabu ala Auvana ko pizato kale, melai ko quli aṉa aqa vararaitako quli kio pui aba kai nianiiovou ko kikolani.

¹⁵ So sole noi nio a qalou? Aṉata a vararaitou Tabu ala Auvana ko pesio kale, ni aṉata mata a vararaitou a ṉaviko pesio kale; aṉata a qeraovou Tabu ala Auvana ko pesio kale, ni aṉata mata a qeraovou a ṉaviko pesio kale.

¹⁶ So keru ṉoṉo rauraeva keru vo Baṉara Tabu ala Auvana ko pesio kale, ta nonia zomano inio o elou kala maba tu vota so kiovo “Emeni” koa ṉoko uriavo ko vararaito kale, vo vairua kilo o evani meko padoilo kale? Ako vota pui okai nianiia ko quli ṉoṉo qasekako sole.

¹⁷ Noko uriavo ko vararaito ta matu uri kobe elou melai, kota pui kopa tauvevou voa edolola maba.

¹⁸ Aṉata a ilusiva vo Baṉara ako aṉata a melai paloasa mea kiada mela kai pesio koa pui ko paqumuako pesio sole.

¹⁹ Melai ko lotu padopadoilo kale ta aṉako rukueko sike pado zakaremu ama rukuruku poso, koko tauvemo ama se edolomu, ta kokai qulepa aṉako kai pesio kale vurovuro pui ko paqumuako pesio kale.

²⁰ A qaka ni visi poso mela, meta pui meqora jari elo meko kerukeru kale; meta molele poso jari emo meko sidopu kale tu pui ereko ko ruqe, melai meta rapukomo meko kerukeru kale.

²¹ Kota lula ko rikiziovi Tabu ama Riki topi, eri kikolako; “Eri kiola vo Baṉara, ‘Aṉata a joroemou se edoloma toutou madu se aṉako qoqono madu kasi tu ke mati pesio se pui ke paqumukako pesio kale, melai se aṉako qoqono madu ta pui kepa paqumukou ni mata pui kepa tala viqou aṉa kialani.’ ”

²² So sole ko pui ko paqumuako pesio kai pesio ta ko mamola pueka vo Baṉara ko pizato se pui ke tuvevo putani kasi, melai kota pui seke tuvevo putani ko ikio, ni ko Baṉara kasi azo ama bazu kaseko ta pui se pui ke tuvevo putani ko ikio, melai kota seke tuvevo putani ko.

²³ Ako kiadama lotu qoqono mela ta me badoilou ni mea kiada mela ta meqai pesio muli pui ko paqumuako pesio, ni kake seke vairua tuvevo putani maba poso ma kake se pui ke tuvevo putani ta ke amaqeovou sai, nio seta so mela kikevou, meta meda sarubeputa inio ko me.

²⁴ Melai mea kiada mela ta me qasekou muli vo Baṉara kasi azo ama bazu Tabu ala Auvana ko pizato kale, nio so keru kala vo pui o tuvevo putani ma o vairua tuvevo putani o amaqea keru sai vota o vakakukou voko sarueko ko quli vo o viqako quli kale. Koa kiadama quli vo o viqako quli ta ko titizivou vo,

²⁵ ni voko mutamuta kama kerukeru ruqe ama ta kasa kota elou, ni vota o zukaidou ni o ilusivou vo Baṉara, ni vota o kasekou ko eri, “Tuvevo vo Baṉara ta o zomana meko tiania!”

Lotu ko poro kale ama korokoroti

²⁶ So sole eri nio, a qaka ni visi poso mela. So keru meme doraekinia keru ilusato keru kala pado maba ta okai keraova ilusato ko kera, kala ta o nianiiekata, kala ta okai bazuta ko quli vo Baṉara kasa ova ikako, kala ta okai bazuta ko pui ko paqumuako pesio kale ama bazu, kala ta o pepelika koa bazu kikolani. Meta erekomo kiadama komi quli lotu qoqono ko tauvemo ama keve kale.

²⁷ Kake ta keka zariovou kai pesio ko pui ko paqumuako pesio, ta omuqa ma zouke madu pala ke besibesiekinio pesio, ni kala ta o pepeliko koko kaseivako quli.

²⁸ Melai sai ta puliala vo o roveani pepeliko, nio seta ke moizailou tu ke ṉavi kasi pala ke pesio ni Baṉara kasi.

²⁹ Omuqa ma zouke maba madu ta ke kasekou ko Baṉara kasi azo ama bazu ni mea kiada mela ta me didianou ni me uria kerukeruekou koa bazu kikolani tu meda ka kelou kota vo Baṉara kasi azo ma pui.

³⁰ Melai mata kala vo o papuani lotu kale ta o kovou vo Baṉara kasi azo ama bazu, nio vo o lojoani ta o epezou pesio.

³¹ Mea kiada mela ta me rovea kai besibesiekinio kaseko ko bazu, tu kiadamu ta ke roveovou paqumuko ni zuvario.

³² Ako vo o kasekani ko Baṉara kasi azo ama bazu ta o roveani pesio ni o roveani epezo o ṉaviko vatolo kale sole.

³³ Ako vo Baṉara ta pui o melai zaria anime tu kako ma kako me qalou animeko lotu padoilo kale, melai animeta me lotumatou uri ama korokoroti ni bule kale. Omadeuvo kiadama vo Baṉara ko mabamu ko lotu qoqono poso kale ko kavani jari ta

³⁴ se rekoreko ta moiza ke elou lotu kale. Seta pui ke zariziovou tu ke pesio. Ko Jiu amu ko bazu melai kikolani jari, seta pui ke odikatou.

³⁵ Melai seta keka zariovou paqumuko kama quli, nio seta ke kuimaemou seko lasive poso pade kasi. Ako kota quraqurati ama quli se reko poso kasi tu seta ke pesio lotu kale.

³⁶ Pui mekasi nio kopa puratekoi vo Baṉara ko bazu! Pui meme qiada kasi nio kopa kuevikoi!

³⁷ Kala ta o kerukerutou ta vota Baṉara ko bazu o koani nio ma Tabu ala Auvana sala kiovo ala, ta o paqumuko koa kiadama aṉako riki ta vo Lekasa Jisu ko bazu ikio ko kio.

³⁸ Melai vota pui o didiekou komi quli nio meta pui me didievou vo.

³⁹ So sole a qaka ni visi poso mela, meta kai dikidauputomo vo Baṉara kasi azo ama bazu poso kaseko ni meta pui me dizaemou se keka zariani pesio ko pui ko paqumuako pesio kale.

⁴⁰ Ni meta erekomo koa kiadama quli uria korokoroti ni sidopu ama keve kale.