1 Koriniti 13 - BAṈARA KO VAIRU AMA LEVELEVEO

Roquano

¹ Esa aṉata a roveovou tu kai pesio se maba madu ni mateana madu ko pesio, melai puliama aṉako roquano tea, aṉata omadeuvo ko ota kama belo ko kelakelato jari nio.

² Aṉata Baṉara kasi azo ama bazu kai pesio ko pizato saṉa abe elou, ma abe paqumukou kiadama mutamuta kama quli ni kiadama nianiio Baṉara kasi azo ko kuevako saṉa abe elou, ma aṉata matuma oqu salala koko roveovou vatutiko ko sopu poso, melai aṉata puliama roquano salala tea, aṉata pulia quli jari nio.

³ Aṉata a buarikou kiadama aṉako batiro se ozaoza kamu kasi, ni aṉata a zariekou aṉako tupu tu kota ko siqailo, melai aṉata roquano pidea lala tea kota utube ama ikio.

⁴ Se maba poso ke roquanani ta nodenode amu ni baise amu; seta pui ke konoivani ni pui ke aikaivani ni pui ke raurarauraivani.

⁵ Seta pui ruqe ama kalo samu ni pui ke kiadaivani ni pui ke ṉuruṉuruani. Seke roquanani ta pui mamola saṉa ke ika edolomu ko sarueko poso.

⁶ Seta pui keka zoleiva ko ruqe, melai seta keka zoleiva ko tuveano.

⁷ Seke roquanani ta pataito samu kiada keru, ni seko oqu, keru ni nodenode ta pui zara ko evako.

⁸ Roquano ta noqola kama. Melai komia kiadama quli ta kota paitou, koa pidokato ko bazu poso ni koa edoloma vekalo pesio kai pesio ko pizato, ni nianiio.

⁹ Ako animeko nianiio ni pidokato ta kama kobu pala,

¹⁰ melai so keru ko barolou keru koa pado ama, ta koa kobu pala sama ta kota paitou.

¹¹ So keru anime silosiloa mela keru, animeta me besiovi silosilo amu jari, ni animeko nianiio ta silosilo amu ko jari ama, ni animeta me qerukerute silosilo amu jari. Erisaṉa animeta matuma maba poso meda eva, ni animeta lula me vaeka silosilo amu ko kalo.

¹² Erisaṉa anime me qeako vo Baṉara ko tuveano ta omadeuvo ko parapara kama mudamuda kale ama mudamudali jari, melai tova animeta me uria velou vo o ṉaviko tanama kale. Erisaṉa animeta kama supi pala meda vai nianiia vo Baṉara, melai tova mainio animeta mevai uria nianiiovou omadeuvo vo Baṉara ta o melai uria nianiia anime jari.

¹³ So sole erisaṉa ta kobeta eva oqu, ni keru, ni roquano, melai roquano ta kobe qulepa koa zouke azo.