1 Jone 4 - BAṈARA KO VAIRU AMA LEVELEVEO

Lipalipa kama poropita madu

¹ A baerebaere poso, matu kubo lipalipa kama poropita madu ta iniseana komia peuru ma peuru kale. So sole meta pui meda ma utu tuvevo puekou seko bazu sea kiadamu seke kasekani ko Baṉara kasi azo ama bazu kikelani. Melai meta didiekomo ni uria kerukeruekomo koa bazu poso kikolani tu kai nianiimo ta kota ko kuevako ikio vo Baṉara kasi azo ma pui kio.

² Ni eria kai nianiio nio me elou vo Baṉara vo Auvana inio o erekani koa bazu. Vo Jisu Karisito ta o saqore komia peuru ma peuru kale ni maba ota eve kio tuvevo o ivo ala auvana inio vo Baṉara vo Auvana.

³ Melai voa auvana vo pui tuvevo o ivo ala vo Jisu ta voa auvana ta pui vo Baṉara vo Auvana, melai voa auvana ta vo Karisito vo kana vo auvana inio. Ako meta lula me viqe ta vo Karisito vo kana ta sipole inio ota puratou kio, ni erisaṉa vota lula komia peuru ma peuru kale.

⁴ A meqora poso, meta vo Baṉara ko mela so sole meta lula koqo me ime se lipalipa kama poropita madu, ako vo Baṉara vo Auvana me tonala ta piza kala sole obe vai paloasani vo Setani, vo komia peuru ma peuru ko ruqe ama maba poso tonala.

⁵ Ni sea lipalipa kama poropita madu ta komia peuru ma peuru ko puratimeni inio, ni seke kasekako quli melai komia peuru ma peuru ko quli, so sole komia peuru ma peuru ko ruqe ama maba poso ta ke didiema se.

⁶ Melai animeta vo Baṉara ko mela, ni se kevai nianiiani vo Baṉara ta ke didiemelou anime, melai se pui kevai nianiiani vo Baṉara ta pui kepa didiemelou anime. Ni Sokale inio animeta memai nianiiovou seke kasekani Tabu ala Auvana ko tuveano ni seke kasekani lipalipato ko auvana kasi azo ama bazu.

Roquano ta vo Baṉara kasi azo ko kuevako ikio

⁷ A baerebaere poso, animeta me roquekinio muli, ako roquano ta vo Baṉara kasi azo ko kuevako ikio sole. Ni voa maba vo o roquanani ta vo Baṉara vo meqora ni vo inio ovai nianiiani vo Baṉara.

⁸ Voa maba vo pui o roquanani ta pui ovai nianiiani nio vo Baṉara, ako vo Baṉara inio vo roquano sala sole.

⁹ Eria kasa inio o ikevo vo Baṉara voko roquano anime kasi: vota o soroevake vovo pado Meqora komia peuru ma peuru kale ni vokale inio animeta me qoa ko tuvevo ama saevo.

¹⁰ Ni tuvevo ama roquano ta vo Baṉara ko roquano anime kasi ama ikio, ni pui animeko roquevo vo Baṉara. Ako vo Baṉara inio o roquemele ni o soroeve vovo Meqora tu ota mela akoeko animeko sarueko poso vovo Meqora ko voukale.

¹¹ Soa matu roquemelo inio o imelani anime vo Baṉara. So sole a baerebaere poso anime melai me roquekinio muli.

¹² Ako puliala maba inio o veani sole vo Baṉara. Melai animeta me roquekiniou, nio vo Baṉara ta o elou anime tona. Ni animeta me roquekiniou muli, inio voko roquano ta ko maba puratou animeko kalo kale.

¹³ Ni animeta meqai nianiia ta animeta me eva Baṉara tona ni Baṉara ta o eva anime tona, ako vo Baṉara ta lula o katimela sole vovo Auvana.

¹⁴ Ni eṉeta ṉe qeve ta vo Mama ta o soroeve vovo Meqora tu o pakiemo se peuru ma peuru kale ama maba poso. Ni ko ikio eṉe ṉemai nianiiekikako quli.

¹⁵ Ni kala ta eri kiovou, “Aṉata tuvevo a iva vo Jisu ta vo Baṉara vo Meqora” kiovou, ta vo Baṉara ta o elou vo tona, ni vota o elou vo Baṉara tona.

¹⁶ So inio animeta meqai nianiia vo Baṉara ko roquano anime kasi ama, ni animeta meqai keruvou koa roquano. Ako vo Baṉara inio vo roquano sala sole, ni vo o elo ala roquano kale ta o elou Baṉara tona, ni vo Baṉara ta o elou voa maba tona.

¹⁷ Ni vo Baṉara ko roquano ta ko maba puratou animeko kalo kale ta, animeta pui meba ṉalou so keru Baṉara o titizimelou keru. Animeta maba pui meba ṉalou, ako komia peuru ma peuru kale ta animeko saevo ta Karisito ko saevo jari sole.

¹⁸ Ako sai vo Baṉara ko roquano ko evakoi, sai ta puliama ṉalo, ako vo Baṉara ko roquano ta ko ṉamuka sole ko ṉalo. Ako ko ṉalo ta koqotato ko ranama quli kio sole, ni pui roquano ko ranama. Sole vo o ṉalo ala ta vo Baṉara ko roquano ta pui nio ko okota voa maba o ṉavani tona.

¹⁹ Animeta me roqueva vo Baṉara, ako vo Baṉara inio o roquemele anime kuleto sole.

²⁰ Ni kala ta eri kiovou, “Aṉata a roqueva vo Baṉara” kiovou, ni ovai kaikuapou vovo lolo, ta vota lipalipa kala. Ako noni kale inio vota o roquevou vo Baṉara vo pui o veani, ni ovai kaikuapou vo vovo lolo obe veani o vilu kale? Puliala inio so opa roveovou sole!

²¹ Ni o ṉavi Jisu inio o katimele anime komia bazu, eri kikolako: vo o roquevo ala vo Baṉara ta mata o roquevou vovo lolo.