1 Jone 3 - BAṈARA KO VAIRU AMA LEVELEVEO

Animeta vo Baṉara ko meqora poso mela

¹ Keatini, animevo Mama ta o matu roquemela anime! Sokale avo inio animeta vo Baṉara ko meqora poso mela mela kiola. Ni tuvevo animeta voko tuvevo ama meqora poso mela, melai komia peuru ma peuru kale ama maba poso inio pui ke nianiiemela ta animeta vo Baṉara ko meqora mela, ako seta pui kepa nianiieve sole vo Jisu.

² A baerebaere poso, erisaṉa animeta vo Baṉara ko meqora poso mela. Ni kota pui nio kasa ko eva noi nio anime me elo avo tova, melai animeta me rovea kai nianiio vo Karisito o vaitou keru animeta vo jari me elou, ako me uria velou vo sole voko tuvevo ama elo kale.

³ Ni vo okai zuatani ko quli anime me elo avo so keru, ta bulebule o elou, omadeuvo Karisito ko bulebule jari.

⁴ So keru vo maba sarueko o ereka keru, vota o pazoka inio vo Baṉara ko bazu. Ako sarueko ko ereko ta vo Baṉara ko bazu ko pazoko ikio sole.

⁵ Ni meta meqai nianiia ta Karisito ta o kuevi tu o ṉamuko ko sarueko ni vota sarueko pide ala.

⁶ So sole vo o evani vo Karisito tona ta pui kiada keru o erekani ko sarueko. Melai kala ta obeta ziovo ala ereko ko sarueko ta vo inio pui o toraevani, ni pui o paqumuvani vo Karisito.

⁷ A meqora poso mela, pui zariemo edolomu tu ke saruemelo me komi ko kerukerueko kale. Vo sidopu o erekani, vo inio sidopu ala, omadeuvo vo Karisito ta sidopu ala.

⁸ Ako vo Setani inio o saruekeni koko tanitanila keru azo, ni vo obeta ziovo ala ereko ko sarueko ta vota vo Setani vo maba inio sole. Melai vo Baṉara vo Meqora ta o kuevi niumaekole vo Setani ko iruruputo.

⁹ Vo Baṉara ko meqora poso lula ke evani ta pui kiada keru ke erekani ko sarueko, ako koa vairu ama saevo vo Baṉara o katimako ta se tona, ni seta lula Baṉara ko meqora poso ke evani sole.

¹⁰ So sole animeta memai nianiia inio vo Baṉara ko meqora poso ni vo Setani ko meqora poso. Ako se pui ke erekani ko sidopu ta pui vo Baṉara ko meqora poso inio, ni se pui ke roquemani seko lotu tamania kale amu melai pui vo Baṉara ko meqora poso.

Meda roquekinio muli

¹¹ Komi kio koa bazu anime me viqema koko tanitanila keru azo: animeta me roquekinio muli.

¹² Melai animeta pui Keini jari me qalou, vota Setani vo meqora ni o vouvaeve vovo visi. O ṉavi Keini ta o erekake ruqe ama kalo, ni vovo visi Ebolo ta o erekake uri ama kalo, ni Sokale avo inio vo Keini ta o vouvaevake vovo visi.

¹³ A visi poso, meta pui me vuzeilou so keru komia peuru ma peuru ama maba poso ke melai kaikuapou keru.

¹⁴ Ako animeta meqai nianiia ta animeta lula me baloasika ko vou, ni erisaṉa animeta lula meda baroa vairu ama saevo kale. Animeta meqai nianiia komi quli animeko roquemo kale animeko lotu tamania kale amu. Melai vo pui o roquanani ta obeta evani nio voukale.

¹⁵ Ni vo ovai kaikuapo ala vovo lolo ta o vouvatani jari ala inio, ni meta meqai nianiia ta puliala maba vo o vouvatani ta noqola kama saevo sala.

¹⁶ Ni eri nio anime meqai nianiiani ko tuvevo ama roquano: vo Jisu ta pui opa kaitike o ṉaviko saevo voko mela voukale anime. So sole anime melai me qatimo animeko saevo animeko baerebaere poso.

¹⁷ Ni kala batiro ala lotu maba ta obe velou kala vovo lolo olaquavo o evani melai pui o roquevou tu o tauvevo vo, ta vo Baṉara ko roquano ta maba puliama voko bulo kale!

¹⁸ A meqora poso, animeko roquano ta pui pesio kale ko kiada ko elou. Melai animeko roquano ta tuvevo ama ko elou ni ko kasa puilou animeko tauvekinio kale.

¹⁹ Ni koa tauvekinio kale inio animeta meqai nianiiovou ta animeta vo Baṉara ko tuveano mela. Ni kokale inio animeta me bataitou animeko kerukeru kale vo Baṉara kasi.

²⁰ So sole so keru animeko bulo ruqe ko elou keru melai animeta bulea mela mebeta elou vo Baṉara ko tanama kale. Ako Baṉara inio raura kala animeko bulo kasi azo sole, ni vo inio okai nianiiani kiadama quli.

²¹ A baerebaere poso animeko bulo pui ruqe ko elou ta pui meba ṉalou kilo vo Baṉara kasi,

²² ni vo Baṉara ta o katimelou ko quli anime me baseko ama. Animeta me qovou ko, ako animeta me zorika sole vo Baṉara ko bazu, ni me ereka sole vo ko zolevako quli.

²³ Ni komi quli kio vo Baṉara o melai bazuekako: animeta tuvevo me ivo vovo Meqora Jisu Karisito ni me roquekinio muli omadeuvo vo Jisu melati kiovevo jari.

²⁴ Ni voa maba vo o zorikani vo Baṉara ko bazu ta Baṉara sate o evani nio. Ni Baṉara ta o eva vo sate. Eri kale inio animeta meqai nianiia ta Baṉara ta o eva anime sate. Animeta meqai nianiia Baṉara melati elo anime voa Tabu ala Auvana kale vo o katimeleni anime.