1 Jone 2 - BAṈARA KO VAIRU AMA LEVELEVEO

Jisu ta animevo tauvezato

¹ A meqora poso mela, aṉata a rikieva nea riki mekasi tu meta pui me erekou ko sarueko. Melai animeta sarueko me erekou, ta Jisu Karisito inio o tauvemelou. Ako vo inio sidopu ala sole o roveani mela pesio animeko kio kale, vo Mama Baṉara kasi.

² Ako vo Jisu kale inio animeko sarueko ta ko akoiva. Ni pui animeko sarueko ko kiada melai kiadama maba poso ko sarueko melai ko rovea akoilo.

³ Ni animeta me zorikou vo Baṉara ko bazu inio animeta me baqumukou kokale ta animeta tuvevo avole inio mevai nianiiani mela vo Baṉara.

⁴ Ni kala ta eri kiovou, “Aṉata avai nianiia vo Baṉara” kiovou, melai pui o zorikou vo Baṉara ko bazu, ta vota lipalipa kala, ni puliama tuveano sala.

⁵ Melai kala vo o zoriko ala vo Baṉara ko bazu ta vo Baṉara ko roquano ta kota maba okota vo tona. So inio animeta meqai nianiia ta animeta tuvevo avole vo Baṉara ko maba madu mela.

⁶ Ni kala ta eri kiovou, vota o eva Baṉara tona kiovou, ta voko kalo ta Jisu ko kalo jari o ikou.

Se edolomu ko roquemo ko bazu

⁷ A roquemelania baerebaere poso mela, komia bazu aṉa a melai bazuekako aṉako mela rikito kale tu meta me erekou ta pui vairu ama bazu, kota lulavo ama ikio. Ni kota koa omadeuma soru ko meme qoema ko tanitanila keru azo. Ni ko ikio koa omadeuma bazu ko me mebe viqema.

⁸ Melai komia bazu aṉa a mela rikiekako tu meme ereko ama ta mata vairu ama ikio, ako ko kutumana ta kota paloasa ni tuvevo ama zakaremu ta lula kota taloa sole. Kota ko tuvevo pui Jisu kale ni kota tuvevo ko eva me ṉavi kale.

⁹ Ni kala maba ta eri kiovou, “Aṉata zakaremu kale a evani lala” kiovou, melai ovai kaikuapou vovo lolo, ta obeta eva inio kutumana kale.

¹⁰ Ako vo o roquevani vovo lolo ta o evani nio zakaremu kale, ni pulia quli ta kopa saruevou vo tu o ereko ko sarueko.

¹¹ Melai vo ovai kaikuapani vovo lolo ta kutumana kala ni obeta talia kutumana kale, ni pui okai nianiia vo o olakoi, ako ko kutumana ta leqa ko iva vo sole.

¹² Aṉata a mela rikita me, a meqora poso mela, ako meko sarueko ta kota mela akoiva sole vo Jisu Karisito ko kio kale.

¹³ Ni aṉata a mela rikita me mama ni niania kamela, ako me inio mevai nianiiani mela sole vo o eveni koko tanitanila kale sole. Ni aṉata a mela rikita me vairu ama maba poso mela, ako me inio koqo me iveni mela sole vo Setani.

¹⁴ Ni aṉata a mela rikita meqora poso mela, ako me inio mevai nianiiani mela sole animevo Mama. Ni aṉata a mela rikita mama ni niania kamela, ako me inio mevai nianiiovini mela sole vo o eveni koko tanitanila kale. Ni so jari aṉata a mela rikita me vairu ama maba poso mela ako meta piza kamela sole, ni vo Baṉara ko bazu ta me tona, ni koqo me iveni mela sole vo Setani.

¹⁵ Meta pui roqueko komia erisaṉama peuru ma peuru ni ko quli koko evako komia peuru ma peuru kale. Ako vo o roqueko ala komia peuru ma peuru, ta vo Baṉara ko roquano ta pui kopa elou vo tona.

¹⁶ Ako komi kio komia peuru ma peuru kale ama ruqe poso: ruqe ala maba ko kiadailo sama zario poso, ni viluloqu kai elo ko quli vo pui o ṉeamukako quli, ni kai aikailo vo o ṉeamukako quli. Ni komia kiadama quli ta pui ko kuevako animevo Mama Baṉara kasi azo, melai kota komia peuru ma peuru ko quli.

¹⁷ Ni komia peuru ma peuru ta kota ruvurou ni kiadama quli se maba poso kekai zariako komia peuru ma peuru kale melai kota ruvurou. Melai voa maba vo o ereko ala vo Baṉara okai zariani nio o saevou noqola kama saevo kale.

Vo Karisito ko kana madu

¹⁸ A meqora poso, komia peuru ma peuru ko paitopaito ko taku ta sipole! Meta lula me viqe ta vo o kanaevo ala vo Karisito ta o kilou. Ni matu kubo vo Karisito ko kana madu ta lula koi, so inio animeta meqai nianiia ta ko paitopaito ko taku ta sipole.

¹⁹ Ni se vo Karisito ko kana madu ta animeko poqala kale ke eveni inio. Melai seta lula ke vaemele ni seko vaemelo ta kasa ko ika ta seta pui maba anime kale amu inio. Ako seta tuvevo avole animeko poqala kale amu tea, seta anime kasi nio kebeta elo. Melai ke vaemele sole meqai nianiia ta sea kiadamu ta pui maba anime kale amu kepa eve.

²⁰ Melai meta Tabu ala Auvana samela vo Jisu o katimeleni. Sole mea kiada mela ta meqai nianiia ko tuveano.

²¹ Noi sole inio aṉata a mela rikita me? Aṉata a mela rikita me ako meta pui meqai nianiia ko tuveano sole, kio? Maba pui, melai aṉata a mela rikita me ako meta meqai nianiiani mela sole ko tuveano, ni meta meqai nianiiani mela ko eri, puliama lipalipato ta ko kuevako tuveano kasi azo kio.

²² So sole lala inio lipalipa kala? Vo inio voa maba vo eri kiolani, Jisu ta pui vo Baṉara o soroeveni Pakio inio, kiolani. Ni voa maba vo Jisu ta pui voa Pakio kiolani, vo inio vo Karisito vo kana, vo okai kaikuapani nioqa, vo Meqora ni vo Mama.

²³ Ako vo pui tuvevo o ivani vo Meqora ta pui vo Mama vo inio, melai vo o ṉeamuvo ala vo Meqora ta o ṉeamuva inio mata vo Mama.

²⁴ So sole meta tukiekomo koa bazu meko bulo kale ko meme viqema koko tanitanila kale. Ni meta me dukiekou koa bazu, ta meta vo Meqora ni Mama satea mela inio kiada keru.

²⁵ Ako o ṉavi Karisito leveleveo o ikema tu o katimelo anime ta noqola kama saevo ikio sole.

²⁶ Aṉata a mela rikita me tu a melai balauvimo sea maba poso, se kekai zariani saruemelo me.

²⁷ Ako vo Karisito ta o katimele me voa puaro sole, vo Tabu ala Auvana, ni voa puaro ta inevoana mekasi. Sole meta mata pui meba va zariovou kala edolola nianiiekato ko maba. Ako voa puaro o katimeleni ta obe nianiiekimela me sole. Ni voa puaro ta tuvetuve ala sole, melai pui lipalipa kala. So sole meta vinaimo Karisito kale, ako vovo puaro ta obe melati nianiiekata me tu meta me vinailou Karisito kale.

²⁸ Sole a lolo poso meta emo vo tona. Ni animeta me elou vo tona, ta animeta pui nio meba ṉalou so keru vo Karisito o vaitou keru, ni pui nio meba mutailou ni pui meba quratou so keru vo o vaitou keru.

²⁹ Ako animeta meqai nianiia ta vo Karisito ta sidopu ala. So sole animeta meqai nianiia ta mata kiadamu seke erekani ko sidopu ta vo Baṉara ko meqora poso.