1 Jone 1 - BAṈARA KO VAIRU AMA LEVELEVEO

Saevo ko Bazu

¹ Eṉeta ṉe mela rikita me saevo ko Bazu kale avo, voa Bazu, vo puliako komia peuru ma peuru ereilo o eveni kale avo. Ako eṉe inio ṉe viqe ni ṉe veveni ṉela ṉe ṉaviko vilu kale ni ṉe uria toiritoirive ni ṉe qamaveni ṉela eṉeko ṉase kale sole.

² Vo o katiṉeleni eṉe ko saevo ta kasa o ṉela evake eṉe, ni eṉeta ṉe veve vo nio ṉeqai bazubazute voko tuveano maba poso kasi, nio eṉeta mata ṉe melai bazueva me voa noqola kama saevo sala Bazu. Vo o katiṉeleni eṉe koa saevo ta o eve o Mama Baṉara kasi. Ni Baṉara inio kasa o ṉela ive eṉe.

³ Ni vo eṉe ṉe veveni ni ṉeda va viqeni, vo inio mata ṉe melai bazueva me, tu meta omadeu lolopareo me ṉelati elou eṉe voko vai nianiio kale. Ni koa omadeu lolopareo animeko ta mata animevo Mama Baṉara ni vovo Meqora Jisu Karisito sate inio.

⁴ Sokale avo inio eṉeta ṉe mela rikita me, tu eṉeta ṉe matu zoleilou.

Baṉara ta ota mela akoeka animeko sarueko poso

⁵ Komi kio koa bazu eṉe ṉe viqema Baṉara vo Meqora kasi azo ni eṉeta ṉe melai bazueka me: vo Baṉara ta zakaremu inio ni vokale ta maba puliama kutumana.

⁶ Ni animeta eri kimevou, animeta me vati lolopareani mela vo Baṉara, kimevou, saita inio mebeta saevou kutumana kalo kale, ta animeta lipalipa kamela pui me luluekani mela ko tuveano.

⁷ Vo Baṉara ta zakaremu kale o evani nio. Ni animeta me elou zakaremu kale, nio animeta omadeu lolopareo me elou animeko vai nianiio kale vo. Ni animeta me elou zakaremu kale inio vo Jisu Karisito, Baṉara vo Meqora ko dara ta bulebule ko imelou kiadama animeko sarueko kale azo.

⁸ Ni animeta eri kimevou, animeta puliama sarueko samela kimevou, ta animeta meda lipalipaiva inio me ṉavi, ni animeta puliama tuveano samela.

⁹ Melai animeta meqai eraeraovou animeko sarueko vo Baṉara kasi, nio vota ota mela akoekou. Vota kerula kala sole animeta me rovea vai keru vo, ta vota o mela erekou sidopu ama quli: vota bulebule o imelou kiadama animeko sarueko me erekako kale azo.

¹⁰ Melai animeta eri kimevou, “Eṉeta sarueko pidea ṉela inio,” kimevou, ta animeta mevai kuirika inio vo Baṉara ta lipalipa kala, ni animeta pui nio me duvevo pueka voko bazu.